sto. nino C - 2

Sa aton experyensia kon bata pa gani, kanami ulit uliton “abi smile smile smile” bisan waay unto ka cute man gihapon.  Pero kon daku na gani, magkulukadlaw lang dira sa kilid, sing-alan dayon – “ano kadlaw mo da, suya ka?” 

Bisan sa ido, kon totoy gani, ang tanan luyag magsagod kag mag-atipan, kada adlaw paliguan – “totoy brownie.”  Pero kon magdako na ang totoy, waay na sing may nagasapak - “sili!”  Siguro nakita man ninyo ina nga pamatasan - kon bata pa gani, “baw kauromol,” kon magdako na gani “baw kaurugot.”

Amo ini ang rason kon ngaa tam-an kalapit sa aton kay Sto. Niño – ka cute sa iya.  Bisan diin ka lang subong may makita kita nga imahen niya. May ara nga nagabayu sang hari-anon nga bayu – may pula kag subong may berde man – suwerte ina kuno.  May ara nga nakaluab, may ara nga naka-uniporme sang pulis, may ara nga Nino nga dark brown nga daw ati – tawag nila Santo Nino de Mullato, kag may ara gani nga nagauyat sang bola sang lotto.  Kanami kon bata ka cute, ka-gwapo, ka gwapa.  Pero ano ayhan kon magdaku na ang bata? 

Sigurado kon magdaku sia indi na sia cute – mapabilin pa sia ayhan nga makakulunyag sa aton panan-awan?  Mahatagan pa bala sia naton sing nagakaigo nga atensiyon?  Masapak ta pa bala sia  kon indi na sia cute.

Ang aton ebanghelyo subong nahanungod sa isa ka bata, Apang ini nga bata waay lamang nagpabilin nga bata.  Ini nga bata nagtubo, nagdaku, naghamtong.  Ang bata nga ginkurokungkung naton sa belen, ang bata nga ginkulukantahan naton sang “Silent Night,” nagdaku na.  Ang bata nga waay lang nagpabilin nga cute.  Amo ini sia ang Santo Niño nga nangin Santo Kristo

Subong amo ini ang aton pamalandongan – ang paghamtong, tungod kay tanan kita dapat man nga magdaku kag maghamtong, indi lamang sa aton lawas kundi sa aton man pamatasan kag sa aton pagtuo sa Dios.

Ano ayhan ang itsura sang isa ka hamtong na nga tawo tapos singganon sia sang iya asawa , “abi Berto isuksuk to ang bayu sang Santo Nino kon magkadto ka karon sa kapilya, isuksuk ang kapa, ibutang ini nga korona, kag dal-a ini nga kalibutan.”  Sang bata pa siguro si Berto kag amo to ang bayu niya, siguro masiling man kamo, cute sia. 

Apang subong, kon amo man sini sa gihapon ang ipabayu sa kay Berto ano ayhan ang isiling ninyo – nagbuang sia.  Ngaa? Tungod kay indi na bagay sa iya ang iya bayu, indi na nagakabagay sa iya nga magbayo sia nga daw Santo Nino.  Indi na sia angayan.

Amo man ini sa aton pamatasan.  May mga pamatasan nga mapaabot naton sa bata kag bagay gid man ina sa ila, angayan sila sina.  Pero may mga pamatasan man nga ginapaabot naton sa mga hamtong.  Waay ako nagasiling nga kon hamtong ka na indi na ikaw ka hampang piko, ins ukon lumpiang.  Mamadjong ka na lang.  India mo sina ang buot silingon. 

Para kay Jesus ang pagkahamtong amo nga responsible na sia.  Wala bala kamo makahibalo nga kinahanglan yara ako sa balay sang akon Amay?  Bilang Mesias nakahibalo na sia kon ano ang iya buhaton, kon ano ang ginapaabot sa iya , kon ano ang dapat niya unahon bilang prayoridad. 

Amo ini halimbawa ang problema sa kasal.  Pakasal lang, pabungga ang himos nga daw artista, loving loving lang, pamata nga pamata lang, apang indi responsable, indi kahibalo kon ano ang unahon niya kag kon ano ang iya isakripisyo.  Matuod waay na sia naga-piko, pero waay man sa igtalupanod niya kon ano ang maayo ukon ano ang sala.  Kigan mo pa, pahugon mo pa, pukawon mo pa, daw sa waay lang sa iya.  Amo ini ang isa ka bata-bata – waay naghamtong.  Ang iya pamatasan indi bagay sa iya pang-idaron.  Indi na sia angayan sa sini nga batasan.   Dumdomon naton nga sa aton pagtuo kadamo lang sang nagatigulang apang wala nagahamtong sa ila pamatasan sa pagtuo.

Indi man amo sina tanan.  May mga tawo na gid man nga nagtubo na, naghamtong kag madamo sina subong ang makita naton sa aton katilingban kag sa aton simbahan.  Kon kaisa may iban gani sa aton nga masiling naton “daw mas mapisan pa sa pari.”  Kadamo na subong ang makita naton nga mga tawo nga nagapatubo sang ila pagtuo nga bisan waay pari – sila mismo nagatuon sang biblia, nagapatigayon sang katekesis, kag makasakripisyo sang ila tinion kag talento ara sa aton Ginoo kag para sa ila katilingban.

Gamay man lang ini nga mga butang apang mga sinyal ini nga ang bata waay nagpabilin nga bata – waay nagpabilin nga nagpa-cute-cute – apang nagtubo nga isa ka hamtong nga tawo nga nakahibalo kon ano ang dapat niya buhaton, ano ang dapat niya unahon, kag nangin responsible sa iya kaugalingon, sa iya panimalay, sa iya katilingban kag sa iya pagtuo kag simbahan.  Nangin katulad sia ni Jesus nga nakahibalo na nga dapat unahon niya ang iya Amay, ang Dios nga Amay – una sa tanan.  Dumdumon naton ang Santo Nino waay nagpabilin nga Nino – sia nangin Santo Kristo. Subong man ini kuntani sa isa ka kristiano.