31st sun C - 2

Si Fr. Jaime Bulatao isa sa mga pari nga nagatuon sang ginatawag naton nga paranormal.  Sang yara pa ako sa seminario ginpakita niya sa amon ang ginatawag nila sa paranormal science nga divining rod.  Duha ini ka rod, daw gagmay nga tubo nga makapakot sang imo bwasdamlag.  Kaptan sang tagsa ka kamot ang duha ka divining rod, dayon pamangkot ka kon ano man ang luyag mo ipamangkot.  Kon ang duha ka rod magkit-anay sa tunga – ang sabat huo.  Kon magbulag sila sa bagay nga nagpalayo sila sa isa kag isa – ang sabat indi.

May isa ka seminarista nga nagpamangkot – mapari bala ako ukon indi.  Sang magsugod na hulag ang divining rod binuy-an niya sa kahadlok – nahadlok sia nga mabal-an ang sabat kag dugang pa diri nahadlok sia nga mabal-an sang tanan ang sabat.

Siling ni Fr. Bulatao simple man lang ang explanation sini.  Yara na nga daan sa tawo ang sabat sa iya bwasdamlag.  Kon tuyo kag handum niya nga magpari ang divining rod masabat man ina nga huo mapari ka.  Apang kon daw pabuyan-buyan man lang ini nga tawo, wala sing mabaskod nga tuyo kag handum ang divining rod masabat man nga indi sia magpari.  Ara na nga daan ang bwasdamlag dira mismo sa handum kag tuyo sang tawo.  Ang ginabuhat lang sang divining rod siling niya amo ang pag-express sina nga handum.

Dugang pa, siling niya, may nagakadto sa iya opisina kon kaisa nga luyag magpabulig pauntat sang ila pagpanigarilyo.  Antes niya bulngon, pauyaton niya anay sa divining rod kag ginasingganan ang tawo nga mamangkot – mapauntat ko bala ang akon panigarilyo ukon indi.  Actually wala ina nagapakot sang matabo kundi ginatakus niya kon bala may handum kag may makusog nga tuyo inang tawo nga maguntat sigarilyo ukon wala.  Kon wala ti indi niya mabuligan ang tawo.  Kon mabaskug gid man ang handum makita ini sa divining rod kag niyan buligan niya  ang tawo.

Everything starts with the desire.  And everything is fulfilled depende sa ka kusog, sa kabaskog sina nga handum kag tuyo.

Amo ina ang natabo kay Zacheo. 

Ngaa nakita ni Zacheo si Jesus, tungod kay luyag niya nga makita si Jesus.  Lantawon naton kon ano ka kusog sang handum kag tuyo ni Zacheo nga makita si Jesus.  Dumdoma, si Zacheo manugsukot sang buhis.  Kontra sia sang tanan.  Kag indi lang sia manugsukot sang buhis – sia ang ila pangulo, sia ang ila hari-hari.  Sa mata sang mga hudiyo sia ang hari-hari sang mga makasasala, sang mga kurakot, sang mga dayaon, kag sang mga traidor.  Kon wala lang isa daku nga handum kag tuyo indi man to sia magrisgo sang iya kaugalingon nga magpanigal-ot sa kadamo sang tawo nga ayhan may tuyo nga malain sa iya.  Hunahunaa lang nga daw si presidente Arroyo nga naglagaw-lagaw sa Jolo ukon Basilan nga wala sing gwardiya.

Apang tungod kay luyag niya, tungod kay makusog ang iya buot kag tuyo nga makita si Jesus ginbuhat niya ang tanan. 

Ngaa nakita niya si Jesus tungod kay yara na nga daan sa iya, human na nga daan sa iya ang handom kag tuyo nga makita sia.

Every dream, every achievement, every ambition, every realization, every success, every attainment, starts here in your heart as a desire, a strong desire to be fulfilled and achieved.

And so it is every failure.  Ang tanan nga kapalpakan starts from the heart.  Kon indi gani piho sa imo tagipusoon indi gid ina magpiho sa ralidad.

Ma human ayhan ang inyo simbahan?  Gusto ninyo pakton?  Indi na kinahanglan ipahula, ukon ipahimalad.  Take a look at your heart.  Kon human na ina dira sa imo tagipusoon mahuman gid ina sa realidad.  Humana anay sa imo tagipusoon kon ano an ang luyag mo kay mahapos na lang ina humanon sa realidad.

Amo man ina ang sinodo.  May matabo bala sa simbahan ta, sa parokya ta karon kay natapos na ang sinodo kag ara na kita sa implementasyon sini?  Mapatuman gid man bala naton ini?  Again examine your heart.

Ang isa ka kalidad ni Zacheo amo nga kahibalo sia maghimo sang desisyon sa iya kabuhi.  Dumdomon naton nga sang nagligad nga Domingo ang Fariseo nagsugid nga may pagpabugal nga ginahatag niya ang ikanapulo nga bahin sang iya kinitaan.  Si Zacheo iya naghatag sang katunga sang tanan niya nga manggad!  Sa kasugoan ni Moises, kon may ginkawatan ka, bayaran mo sia sing duha ka pilo.  Si Zacheo nagsiling nga bayaran niya sila indi lang sing duha kundi apat ka pilo! Zacheo was decisive.  Naghimo sia sang iya kaugalingon nga desisyon.  Nagapati ako nga amo ini ang basehan kon bala ang sinodo mapatuman ukon indi, kay amo gid man ini ang basehan sang tanan.  Ngaa natuman?  Kay luyag niya nga matabo kag tungod sina iya ini ginpatabo.  It is a combination of a strong desire, an overwhelming desire and our decisiveness.

Amo ini ang pamatasan nga ginapangita kag ginahangkat sang sinodo sa aton.  Luyag bala ninyo nga may pagbag-o sa aton simbahan, sa aton mga kaparian?  Luyaga - dayon desisyoni.  It all starts in the heart and in the will – dira sa tagipusoon kag sa kabubut-on.  Believe in the power of your dreams, your desires and in your will kay kon wala ang mga ini bisan ano mo pa nga pilit, bisan ano mo pa ka tulod kon indi ya gusto, kon malagana ang iya sabat wala gid na sing may matabo. Apang kon klaro nga luyag mo, kon klaro ang desisyon nga ginbuhat mo, bisan mabudlay pa, bisan may mga upang pa these can be overcome.