19th sun A - 3

Ang akon pamalandong may duha ka bahin.  Ang una nga bahin ginkuha natons a ebanghelyo.

Sa isa ka pelikula nga ginatiguluhan star wars, may hurobaton dira nga indi ko gid malimtan.  Ini nga hurobaton nagasiling, ang kahadlok nagatuga sang kaakig.  Ang kaakig nagatuga sang kainit. Kag ang kainit nagatuga sang pag-antus. Fear leads to anger. Anger leads to hate. Hate leads to suffering.  Sang una sang didto ako naasign sa katedral bal-an na ina sang mga taga-opisina kon ano ang ila himuon panaglitan may manawag sick call.  Singganon na nila sa gilayon ang pamilya nga kon mag-abot na gani ako sa ila balay siguradohon gid nila nga wala ido nga nagalagaw sa pagsulod sang pari.  Kon may ido sigurado gid nga ang pari mabalik sa konbento kag indi magsulod sa ila balay.  Amo ina ang akon reglamento kag siguro may duha man lang ka bes nga wala ako nagsulod sa balay sa pagsabat sang sick call tungod kay may ido nga nagalagaw.  Kis-a una pa ang ido tamyaw sang sa tagbalay mismo.

Ngaa amo sini.  Kay naga-init ang ulo ko sa mga ido.  Ngaa.  Kay man nahadlok ako sa ido.  Sang gamay pa ako kinagat ako sang ido nga ginapakaon ko kag sa sobra ko nga kahaldlok nga basi akigan ako kag injentionan ginhipsan ko lang.  Maayo lang kay wala rabies.  Sang gamay ako nakatuon gid man ako saka sang kahoy sang ginlagas ako sang ido.  Sa sobra ko nga kakulba nakasaka gid man ako sa tunga-tunga sang lubi.  Ngaa naga-init ang ulo ko sa ido?  Ang kahadlok nagatuga sang kaakig, ang kaakig nagatuga sang kainit, ang kainit nagatuga sang pag-antus.

Indi bala matuod ini?  Siguro nakabati kamo sang balita nahanungod sang mga nagakalatabo sa Norway kon paano ginbombahan sang isa ka tawo ang opisina sang prime minister kag pagkatapos sini nagkadto sia sa isa ka meeting sang pamatan-on kon sa diin iya ginpaniro isa isa ang mga nagtambong didto.  Ang patay sobra 80 ka mga pamatan-on.  Ngaa ginhimo niya ini?  Ginhimo niya ini tungod sang iya kahadlok sa mga muslim nga siling niya amat-amat na nga nagamuad sa bilog nga uropa sa bagay nga pila ka adlaw mas madamo pa sila sang sa mga kristiano.  Ang iya kahadlok sa mga muslim nagtuga sang kaakig, ang kaakig nagtuga sang ka-init, kag ining kainit nagtuga sang dalagku nga mga halit kag nagdulot sang madamo nga mga pag-antus.  Fear leads to anger. Anger leads to hate. Hate leads to suffering. 

Ano ang ugat sang away sa Mindanao?  Ano ang ugat sang mga pagpamatay, mga pagpang-torture kag mga pagpang-abusar sang mga diktador kag yara sa poder?  Ano ang ugat sang madamo naton nga mga inaway bisan dira mismo sa aton panimalay kag sa aton katilingban?  Kon panumdumon naton sing mas madalom ang ugat sini tanan amo ang kahadlok - ang kahadlok nga nagatuga sang kaakig, ang kaakig nga nagatuga sang kainit, kag ang kainit nga nagatuga sing pag-antus.

Si Jesus sa aton ebanghelyo karon nga adlaw nagsiling, magpakaisog kamo, indi kamo magkahadlok.  Makapila niya ini sulitsuliton sa iya mga gintuton-an dira sa santos nga kasulatan.  Sa madamo nga bes iya ini ginhambal sang iya mga sumulunod - indi kamo magkahadlok, magpakaisog kamo.  Ngaa, tungod kay ang kahadlok nagatuga sang kaakig, ang kaakig nagatuga sang kainit, kag ang kainit nagatuga sing pag-antus.

Indi ka magkahadlok.  Ano bala ang aton mga ginakahadlukan?  Ano ina ang yara sa imo nga ginatumod ni Jesus sa iya pagsiling, indi ka magkahadlok?

Ikaduha nga bahin nga ginkuha sa nahauna nga balasahon.

Sa aton nahauna nga balasahon makita naton si Elias nga nagapanago sa sulod sang kuweba.  Ngaa?  Hinadlukan sia.  Ginhingabot sia sang hari nga nahadlok sa iya mga ginapanghambal.  Ginpangita sia sa tuyo nga sia patyon.  Kag nian si Propeta elias hinadlukan kag nanago sa sulod sa kuweba.   Sa iya pagpalagyo wala na sia nagkaonkaon pa.  Siguro nagbatyag sia nga ginpabay-an sia sang Dios.  Sa tunga sang iya kahadlok nga mapatay, akig sia sa hari, akig sia sa mga tawo kag akig man sia sa Dios nga iya na karon ginabasol, kag dugang diri indi na sia magkaon kay gusto na niya nga mapatay na lang.  Amo sini ang kahimtangan ni Elias nga gintuga sang iya kahadlok nga nagtulod sa iya sa pagsulod sa kuweba.  Apang ang Ginoo nagmando sa iya, Elias guwa ka sa kuweba kay ako magalabay.  Kag didto sa guwa sang kuweba nakita ni Elias ang presensya sang Dios..

Nakita lamang ni Elias ang presensya sang Dios sang sia magguwa.  Samtang yara sia nagapanago sa kuweba tungod sang iya kahadlok, indi niya makita ang Dios.  Nabatyagan lamang ni Elias nga wala na sia nagaisahanon sa iya kahadlok sang sia nagguwa sa kuweba sa pag-atubang sang iya mga kahadlok. 

Ano gid bala ang aton ginakahadlukan?  Makaguwa man bala kita sa aton mga kuweba nga ginapanagu-an tungod sang aton kahadlok agod maatubang naton ini?

Makilala lamang naton kag makita ang presensya sang Dios kag ang iya gahum kon magguwa kita sa aton kuweba nga ginapanaguan.  Subong sa aton pagpa-uli, panumdumon naton kon ano ang daku gid nga ginakulbaan ko subong.  Ano nga mga buluhaton nga indi ko masugdan tungod kay nahadlok ako sa una ko nga  mga tikang?  Ano ina nga mga butang ukon buluhaton nga indi ko mapakita tungod kay nahuya ako kay basi kadlawan ukon yagutaon ako?  Ano nga mga kuweba ang akon ginapanagu-an tungod kay indi ko luyag mag-atubang sang mga nagasalampaw nga problema sang kabuhi?  Kag tandaan naton, indi naton makita ang kagamhanan sang Dios kon indi kita magguwa sa kuweba sang aton mga kahadlok.  Indi ka magkahadlok, magpakaisog ka.