31st sun C - 1

Agud mahangpan naton sing  maayo ang aton ebanghelyo maayo siguro nga sugdan ta ini paagi sa paghibalo sang ginatawag naton nga bio-data ni Zacheo.

Una ang physical features ni Zacheo.  Claro sa aton nga si Zacheo putot.  Indi lamang nga manubo, kay kon manubo lang siya puede man siya kontani makatihin agud makita si Hesus nga nagalabay.   Apang ginhambal gid explicitly nga putot siya, amo gani nga nagsaka gid siya sa kahoy.

Ikaduha, ang iya profession.  Siya amo ang pangulo nga manugsukot sang buhis sang isa sa mga pinakamanggaranon nga banwa sang Israel, ang banwa sang Hericho.  Kon sayuron manggaranon siya nga tawo kag daku ang iya poder sa sina nga banwa.  Apang tungod sang iya propesyon ginakabig siya nga traidor kay siya nagpasugot nga mangin instrumento sang mga ginatamay nga mga dumuluong, ang mga romanhon, nga manugsukot sang ila mapigoson nga buhis.  Dugang diri, ginakabig siya nga makasasala, kag makasasala gid man siya, indi lamang kay nagcooperar siya sa mga pangontra, kundi tungod man kay daya-on gid man ini siya.  Mapigoson na nga daan ang buhis, patungan pa gid niya ini, pabug-aton pa gid, agud makadaya kag makaganar sing tuman.

Ikatatlo, ang iya character.  Kalabanan gid man sang mga putot mga maisog nga mga tawo - si Hitler putot, si Napoleon putot, ang buangngit nga kontra ko anay sang elementary ko putot man, pero maisog.  Ang kaisog nga matawag bala naton nga nagapabinturar.  Makita man naton ini kay Zacheo.  Bisan ginatamay siya sang mga tawo, bisan damo ang iya kontra, nagpanigal-ot gid siya agud makita lamang si Hesus.  Nag-upod siya sa kadam-an.  Siguro amo man ini ang rason kon ngaa nagsaka na lang siya sa kahoy kay sa pagkadamo sang iya kontra indi na siya pasal-uton kag waay sing luyag nga maghatag sa iya sing alagyan.

Gani makasiling kita tungod sining bio-data indi mahapos para kay Zacheo ang magkabuhi sing normal bisan matuod manggaranon siya. Ang redeeming factor lamang ni Zacheo amo nga may kaisog siya, may kaisog siya sa pagpaninguha, may kaisog siya sa pagbaton sang iya situwasyon kag may kaisog siya sa pagpangita sang butang ukon tawo nga makabulig sa iya sa pagpatigayon sang iya handum.  Kon kaisa maayo man nga magpakapal muks na gid lang kita kon maayo man lang ang aton tinutuyo, kay amo pa ini kon kaisa ang makaluwas sa aton.  Matawag naton ini nga karacter, the courage to dare - daring si Zacheo.  Kag para sa akon amo ini ang pinakamatahum nga ehemplo nga ginahatag ni Zacheo sa aton. 

Kon isipon mo pareho gid kita ni Zacheo - tanan kita may mga physical defects man - kon indi kita putot, piang, law-ay, libat ukon manukmanukon ang mata, mango kita, indi kita maayo maghambal ukon magkanta, imol kita etc.  Pero bisan amo sini ginabaton kita sang Ginuo.

Tanan kita may mga moral ukon spiritual defects man.  Kon indi kita daya-on basi tikalon man kita, palahikay, madumot, palapangakig.   Nadumduman ko sang sa seminaryo ako, ginatawag ako nga arab - indi tungod sang baho ko, kundi arab, kon sayuron arabuton.  All of us, have with us our spiritual defects, but these should not prevent us, or impede us from desiring and looking for Jesus in our lives, because despite of these defects Jesus comes into our lives.

Ang kinalain lang iya ni Zacheo amo nga may kaisog siya sa pag-atubang sini nga mga defecto - kag tungod sini nga kaisog, ginpangita niya, ang sa banta niya, makalipay sa iya, bisan pa suyaan siya kag yaguta-on, kag kadlawan sang mga tawo.  Kag ining makalipay sa iya waay liwan kundi si Kristo.  Ginhandum niya, ginpangita niya, nagpaninguha siya agud nga makita niya ang makahatag sa iya sing kalipay, kag tungod sini natalupangdan siya ni Kristo.

Duha ka praktikal nga buluhaton ang aton tinguhaan sa sining semana sa aton pagpamalandong sang Pulong sang Dios.

Una, be like Zacheus, magmangin katulad kita ni Zacheo.  Magmangin katulad kita ni Zacheo sa iya kaisog kag sa iya pagpaninguha sa pagpangita sa aton Ginuo.  The Lord is passing us by every moment of our lives, sa tanan nga hitabo sang aton kabuhi ang Dios nagalabay, pero indi naton siya makita kay waay man kita nagatinguha nga makita siya. 

Si Juan isa ka adlaw nakita nga nagasakay sa iya kabayo.  nagadalagan ini sing tudotudo, kag nagalibot sa banwa nga daw may ginapangita siya.  Sang ulihi ang iya abyan nagpamankot sa iya, “Juan ano ang imo ginapangita nga daw kasako gid sa imo.”  nagsabat si Juan, “Abyan ginapangita ko ang akon kabayo.” - kag kuma-yampad siya nga daw may ginalagas. 

Kakalam-utan kon kaisa ang nagakatabo sa aton.  Ginapangita ta kon kaisa ang aton antipara kag igo ta gali matalupangdan ara man lang sa aton mata.  Kon kaisa ginapangita mo ang imo aritos, kag pagkatapos mo baluskay sang imo hunoshunos, ara man lang gali ka sab-it sa imo dulonggan.  Amo man ini kon kaisa sa Dios. Ang Dios ara man lang dira sa aton taguipusuon pero waay naton siya makita tungod kay waay man kita nagapangita gid sa iya ukon la-in ang aton ginapangitaan sa iya.  iban sa aton kalab-ot na sa agoo kag kon sa diin diin.  God is always passing us by, we have only to desire for him, we have only to look intently and ultimately like Zacheus he will find us and we will find him.

Ikaduha, be like Jesus to the Zacheus around us, magmangin katulad kita ni Kristo sa mga Zacheo sa tunga naton.  Ngaa amo yadto ang reaksiyon ni Zacheo, ngaa nagngin maalwan siya sa bagay nga handa siya sa paghatag sang katunga sang iya manggad kag sa pagbayad sing apat ka pilo sa iya mga gindayaa.  Kon panumdumon mo, nagpanyaga man lang si Jesus sa iya balay.  Waay ‘ya man ginpahog si Zacheo, waay ya man gintanyagan sing maayo nga mga butang agud to magpati si Zacheo sa iya, waay man siya gani naghambal sing malawig ukon nag-argue sa iya. 

Nadumduman ko ang isa sa mga paborito ko nga Kristiano bisan waay pa siya hasta subong ginpadunggan nga santo.  Ang ngalan niya si Charles de Foucauld.  Siya isa ka soldado antes sang iya conbersiyon.  Nagpawala siya sa iya kabuhi, nagpatuyang sa mga parties, wala, tuo hasta sang ulihi nga nabatyagan niya nga daw ang daku nga kalisud bisan sa tunga sining kagahud kag pagkinasadya.  Paagi sa iya mga paka-isa nga nagkalaka gid sa iya, nagdecide gid man siya nga magbalik kay Kristo.  Nangin isa ka siya ka hermitanyo nga nagkabuhi sa tunga sang isa ka tribo nga puro muslim didto sa Algeria.  Waay siya nagwali sa ila, kundi ginkabuhi lamang niya ang iya pagtuloohan kag nag-alagad sa sining mga tawo bilang isa ka manugbulong.  At one point sa pagsaysay sang iya conbersiyon kag sang iya trabaho nagsiling siya sa iya spiritual director:  “If you want to convert somebody, do not try to convince him by argument.  The best system is not to preach but to let him know that you love him.”  Mga utod amo man ini ang technique sang aton Ginuo agud madala niya pabalik si Zacheo - ginhigugma niya siya, ginhatagan niya si Zacheo sing tinion, ginbaton niya si Zacheo bisan ginatamay siya sang mga tawo.  Jesus stood by him.  Ginpakita ni Hesus nga ginahigugma niya si Zacheo kag tungod sini nagbaylo ang pamatasan ni Zacheo.  Sa aton pagsunod kay Hesus our best argument so that people will change is when we could show love, affection, and care to them.  I believe that this is the thing that counts most.  Indi ang debate, indi ang pagbina-isay, indi ang malawig nga sermonanay, indi ang pagcondenar kag pagssilot, kundi ang pagpakita sang paghigugma kag pagkabalaka - this is the most powerful tool if we want to convert people.

Diri ko lang napamatud-an ang nabati-an ko anay nga advise sang isa ka asawa sa iya abyan nga may palahubog nga bana.  Ginsingganan niya siya, “day’ ang bana mo kulang lang ina sing cariño.”  Siguro amo man ina ang ginahulat sang aton man kabataan, sang inyo mga asawa.  Katulad ni Zacheo, kulang lang ina sila sing cariño, ang sincero nga pagpakita sang paghigugma kag pagkabalaka sa ila, because when they see this, when they feel your love, their heart like Zacheus’ heart will be ready to change.