Sa sini nga tuig ginahatagan naton liwat
sing igtalupangod ang daku nga bahin ni San Pablo sa pagpatubo sang magamay nga
binhi sang Kristianismo nga subong nagdab-ot na sa bug-os nga kalibutan. Isa man ini ka pagkilala sang iya mga
panghunahuna kag panan-aw nga nagdihon sang pagtuluohan nga makita sa iya mga
sinulatan. Kag
lakip sa sini nga panan-aw ang pagpasakop sa mga Hentil sa pangagda sang kaluwasan
nga gindaog ni Kristo, ang kaluwasan nga gintanyag sa tanan kag indi lamang sa
mga Hudiyo kag sa Israel. Tungod sini
ginatawag sia nga apostol sang mga Hentil.
Ang misyon ni San
Pablo nagsugod sa iya pagsabat sa pamangkutanon kaangay sa ginpamangkot ni
Kristo sa Ebanghelyo sa iya mga gintuton-an – Sin-o
bala ang Anak sang Tawo suno sa mga tawo?
Suno sa inyo, sin-o bala ako? Ang
pagkilala ni Pablo kay Kristo mangin kamunuan kag mangin kaundan sang iya
paghangop sang pagtuluohan, sang iya kaukod sa pagbantala sang pagtuo, kag sang
iya kaisog sa pagpalapnag sang pagtuo tubtob sa kamatayon.
Nakilala ni San
Pablo ang aton Ginoo sa dalan padulong sa Damasco. Sa sadto nga dalan magapakita sa iya ang
kasanag sang nabanhaw nga Ginoo nga magahambal sa iya Saulo, Saulo ngaa bala
ginahingabot mo ako. Nagpamangkot si Saulo, "Sin-o ka bala,
Ginoo?" Ang tingog nagsabat,
"Ako amo si Jesus nga imo ginahingabot.”
Ining
pagpakita ni Kristo kay Pablo sa dalan sang Damasco mangin kamunuan sang
madalom nga pagkilala nga magatulod kay Pablo sa pagpangabudlay para sa
Simbahan. Madamo kag madalom ini nga
pagkilala. Apang sa aton pamalandong
subong nga Domingo magakuha lamang kita sa duha.
Una, ang
pagkilala ni Pablo nga ang simbahan amo ang lawas ni Kristo kag ang iya
paghingabot sa simbahan nga amo ang katawohan sang Dios, isa man ka paghingabot
kay Kristo. Si San Pablo sa iya sulat
nagakabig nga kita tanan, ang tagsa ka binunyagan bahin sang lawas ni
Kristo. Si Kristo amo ang ulo kag kita ang nagakalainlain nga bahin sang
lawas. Kon ang lawas mahamulag sa ulo, ini nga lawas mapatay. Kon ang tagsa ka bahin sang lawas
magapanumdom lamang para sa iya kaugalingon, kon ang mata magsiling wala ako
labot sa kamot, indi mangin maayo ang madangtan sang lawas, kag ang tagsa ka bahin
may kaangtanan sa bug-os nga lawas kay ang sakit sang isa ka bahin sang lawas
magahatag sing kaluya kag pag-antus sa iban nga bahin sang lawas.
Indi
bala amo sini ang pagkilala naton sang simbahan? Ini nga panghunahuna naghalin kay San Pablo
nga bunga sa iya pagkilala kay Kristo sa dalan padulong sa Damasco.
Sang
nagligad nga baha nagdangop diri sa simbahan ang mas sobra sa 600 ka mga
tawo. Sila nagtener sa Isabelita. May iban man nga nagpuyo sa konbento mismo. Sila
ginpakaon sang parokya sa bulig sang Social Action kag sa kaalwan sang iban nga
mga tawo sa sulod sang lima ka adlaw, tatlo ka beses sa isa ka adlaw. Ang mga pamatan-on sang aton parokya, ang
youth, ang mga altar boys amo ang nagpakapoy, nagpulaw sa kusina. Sila ang nagaluto, nanghugas, namutos sang
kan-on kag sud-an, nanghimos, nangompra sa sulod sining lima ka adlaw. Madamo ang mga nagkadto diri nga nagadala
sing bayo, pagkaon, kag kon ano pa nga mga kinahanglanon.
Isa sa
pinakamasakit nga desisyon nga amon ginbuhat amo ang pagpasaylo sa mga evacuees
sadtong huebes sang hapon didto sa gym.
Wala na kami sing ikasarang indi lamang sa materyal nga mga
kinahanglanon kundi lakip man ang manpower.
Ginhawa namon nga makalab-ot sa lima ka adlaw.
Ngaa
kasubong sadto ang sabat sang parokya, sang mga pamatan-on, sang madamo nga wala
nagpakilala nga mga tawo nga nagkari sa pagbulig? Tungod sang panghunahuna ni San Pablo – ang
tagsa-tagsa sa aton bahin sang isa lang ka lawas. Ang mata indi makasiling wala ako labot sa
kamot. Ang kalipay sang isa, kalipay
sang tanan, ang kasakit sang isa, kasakit sang tanan. Nagsugod ini sa isa ka boses nga nagpamangkot
sa dalan pa Damasco, ”Saulo, Saulo ngaa ginahingabot mo ako, ako si Jesus nga
imo ginahingabot.”
Ikaduha. Isa ka butang nga balik-balikan ni San Pablo
nga daw indi sia makapati nga natabo sa iya kabuhi amo nga sia isa ka manughingabot,
ginpanglagas niya ang mga Kristiano. Didto
sia nga nagatindog sa kilid nga nag-uyat sang mga kunop sang mga Hudiyo nga
nagbato kay San Esteban tubtob nga sia mapatay.
Apang bisan amo sini gintawag sia sang Dios
nga mangin isa ka apostol. Halin sa
manughingabot, sia nangin apostol. Bisan
pa sa iya pagkamakasasala, sia ginpili.
Bisan pa sa iya di-pagkatakus, sia ginbayaw. Bisan pa sa iya pagpasipala, sia
ginhigugma. Sa sini nga kahimtangan wala
kita sing inugpabugal sa Ginoo, kay bisan makasasala pa kita gintawag na niya
kita, bisan makasasala pa kita ginhigugma na niya kita. Sa ulihi sa iya sinulatan si San Pablo magapamatuod nga ang tanan gid man grasya
sang Dios.
Kabudlay
sini i-angot sa aton kabuhi pagkatapos nga kita mabahaan kag ang iban sa aton
nadula ang tanan nga aton ginpangabudlayan.
Mabudlay magsiling nga ang tanan grasya samtang nagapamala kita sang
lay-on kag kadamo pa sang mga evacuees sa gym sang plaza.
Kasubong
man ini ang una nga panan-aw ni Pablo sa pag-antus kag kamatayon ni Kristo sa
krus – isa ka kahuy-anan – ang kamatayon sa krus isa ka kahuy-anan. Apang sa sining kahuy-anan, sa sining
kapierdihan, sa sining kalutusan natukiban niya sang ulihi ang indi matungkad
nga paghigugma sang Dios sa iya katawohan.
Basi sa
pila ka adlaw makita man naton ini nga paghigugma, nga sang nadula naton ang
aton mga pagkabutang, nakita naton liwat ang labing importante nga manggad sa
aton kabuhi; nga sang nagakapyot kita sa lubid nga nagapungapunga natalupangdan
naton nga may makagagahom nga Dios ang kalibutan nga nagahigugma sa aton; nga
sa sini nga malubha nga trahedya kita man nakatungka-aw nga nagasiling – ano
bala ang makapahamulag sa aton sa paghigugma ni Kristo – kag nakapamatbat kita
nga nagasiling, sa tunga sini tanan wala sing may makapahamulag sa aton sa
paghigugma sang Dios dira kay Kristo Jesus.
Kag tungod sini malantaw naton liwat ining trahedya, ining kalutusan,
ining kapierdihan nga tuga sang baha nga isa ka kahigayunan nga mabatyagan
naton liwat ang pag-amlig, ang paghigugma, ang padayon nga pagtabang sang Dios
sa aton kabuhi. Ang tanan grasya.
Sa
sining tuig pamatian naton liwat si San Pablo nga ang bug-os niya nga sinulatan
napasad sa iya pagkilala kay Kristo sang sia nagapanglakaton padulong sa
Damasco, sa iya pagsabat sa pamangkot ni Jesus, suno sa imo sin-o ako?
No comments:
Post a Comment