corpus christi A - 1

Sa Communist China sa diin ginadumili-an ang pagpractice sang religion may istorya sang isa ka intsik nga pari nga nagapuyo sa isa ka banwa nga nagpakunokuno nga isa ka trabahador.  Paagi sa mga ginkasugtan nga mga sinyal, ang mga katoliko sa sina nga lugar nakahibalo kon ano ang dapat nila buhaton kag kun diin sila makadto sa pagpakigkita sa sini nga pari.  Ang pari magaplastar sa isa ka balaligyaan sa tienda nga nagabaligya sang habon.  Paagi sa sekreto nga sinyal ang mga katoliko magabakal sang habon kag tagaan sila sang pari sang duha ka bilog nga naputos sang papel.  Kag sa tunga sining duha ka habon makita ang nakonsagrahan nga ostias.  Dal-on nila ini sa ila balay, magatipon ang bilog nga panimalay sa lamisa, magapangamuyo sila sing tingob kag ginakalawat ini nga ostias. 

Matuod ini nga istorya  kag diri makita naton ang daku nga paghangad sang mga katoliko sang China nga masaulog ang Eukaristiya kag makaon nila ang lawas ni Kristo.  Nakahibalo sila nga ining ila ginabuhat makatalagam para sa ila panimalay.  Apang padayon nila ini nga ginabuhat.

Sa kalabanan sa aton subong diri sa Jaro, daw indi na gid man kasubong sini ang aton nga paghangad sa Eukaristiya.  Nakasumalang ako anay sang isa ka six year old nga bata nga ginapilit sang iya nanay nga mag-upod sa pagsimba.  Indi gid.  Ginhawa na ka ayo sang nanay, indi gid magpadala.  Sang ulihi ang nanay nagsiling:  “Indi ka magupod sa amon?  Sige, tapos simba ma pa Jolibee kami ‘ya.”  Dalidali man ang bata nga maghimos kag mag-upod. 

Mga utod kasubong man kita sini kon kaisa.  Indi na kita bata apang ang panan-aw naton sa paghiwat sang Eukaristiya isa ka pagpanan-aw sang isa ka bata.  Nagatipon kita tungod kay may threat ukon pagpamahog nga nagakatabo.  Threat tungod kay sa bata, basi indi siya kaupod sa Jolibee.  Sa aton naman iya tungod kay obligasyon naton ini kag basi makasala kita. Gani kon indi na mabatyagan ang threat, kon indi na kita mapahog ukon ma-into kabug-at sang tiil naton sa pagsimba. 

Para sa akon, mga utod, ini nga pamatasan gintuga tungod kay indi naton mahangpan ang mas madalom nga kahulugan sang aton pagsaulog sang misa.  Ang misa indi dapat pagkabigon nga threat tungod kay indi gid man ini kinahanglanon sang Dios sa bagay nga obligaron niya kita.  God does not need our Eucharist.  Kita ang may kinahanglan sini, indi kay ang Dios.

Sa istorya naton nahanungod sa mga katoliko sa China waay kita may makita nga threat kon indi sila magbaton sang Eukaristiya.  Sa kamatuoran ang ila pa gani pagbaton kag pagtipon isa mismo ka threat.  Apang padayon ini nila nga ginabuhat bisan nakahibalo sila sang ila madangtan.  Ngaa?  Tungod kay naintiendihan nila ang importancia nga sila magtipon sa pagsimba sa Dios.  Naintiendihan nila kon ngaa nagatilipon sila.

Mga utod, ang Eukaristiya isa ka pagtililipon naton sa pagsaulog sang aton pahiliusa, sang aton pag-isa sa pagtuo kag sa balatyagon.  The eucharist is the celebration of our unity as a community and it strengthens us to live in communion with each other.  Sa pagsiling sang pari sa consagrasyon, amo ini ang akon lawas, waay lamang niya ginahalad sa Amay ang lawas ni Kristo sa bayhon sang tinapay kundi ginahalad man niya, ginapresentar niya sa Amay ang tanan nga yari diri bilang lawas ni Kristo, bug-os nga lawas nga mistiko ni Kristo, ang iya katawhan nga nahamut-an gid sang Amay. 

Gani, mga utod mangin makahulugan lamang ang aton pagtililipon kon yara sa aton pamatasan, ang paghiliusa nga aton ginakabuhi sa matag-adlaw nga tanan, ang paghiliusa nga ginadala naton kag ginasaulog sa tagsa ka Domingo diri sa Eukaristiya kag ang paghiliusa nga ginapabakod pa gid sang aton pagsaulog sang Eukaristiya.  Sa Eukaristiya waay lamang naton ginahalad ang lawas ni Kristo sa bayhon sang tinapay.  Waay lamang naton ginabaton ini nga tinapay sa pagpabakod sa aton.  Subong man sa Eukaristiya kita nga lawas ni Kristo ginahalad sa Amay kag kita nga lawas ni Kristo nagabaton sa isa kag isa kag ginapabakod sang sang aton paghiliusa sa isa ka lawas sa Eukaristiya.

Ginadala naton sa misa ang aton paghiliusa kag ginasaulog ini.  Apang kon waay sing paghiliusa nga dal-on, ano ang aton saulogon?  Kon waay sing paghiliusa sa aton kabuhi sa aton mga katilingban, ano ang aton selebrahon? Waay sing kausa ang aton selebrasyon.  Gani patay ang aton pagsaulog. Pilit ang aton pagsaulog. Mabug-at ang aton selebrasyon sang Eukaristiya.

For example, may isa anay ka ultimo nga tawo nga nagsimba diri sa katedral kag nagpanugid siya nga sa paghatagay sing paghidait sadtong Chritmas agape sang nagsiling si Msgr.  “magkamustahanay kita tanda sang aton paghidait.”  Ining ultimo nga tawo naghana kontani nga magkamusta sa babayi sa iya kilid.  Ano nga dimalas ang iya kay ang kilid niya miembro sang alta sociedad.  Gintulok siya halin sa ibabaw paidalom and with hesitancy ginkamusta siya nga ginakaptan ang punta lamang sang iya apat ka tudlo kag isa lamang ini ka habyog. 

Mga utod ano nga sahi sang paghiliusa ang aton ginsaulog kon indi gani kita makabatas magtandog ukon bisan na lang gani nga mag-ingod sa aton isigka-katoliko. Paano naton masaulog ang aton paghiliusa kon may pagbahinbahin sa tunga naton kag ginapakanubo naton ang isa kag isa?  Paano naton saulogon ang aton paghiliusa if in real life, in our families, in our communities, in our places of work, we could not rub elbows with each other because one is poor and the other is rich, because one is cultured and the other ahaw ultimo nga tawo.  What kind of unity are we celebrating.  Where is the body of Christ, the community which we are presenting to the Father.

Sa sining piesta sang Corpus Christi pamalandongan naton ini.  Waay lamang naton ginahalad sa Amay si Kristo dira sa bayhon sang tinapay.  Mga utod, ginahalad man naton si Kristo sa aton kaugalingon, sa aton katilingban, sa aton paghiliusa sa isa lamang ka pagtuo kag balatyagon sang paghigugma kag pagalagad.  Sa pagsiling sang pari “Amo ini ang akon lawas nga igatugyan tungod sa inyo”  waay lamang siya nagahalad sang tinapay.  Kundi ginapresentar man ang aton paghugpong kag paghiliusa sa katilingban sang lawas nga mistiko ni Kristo sa Amay.  Apang pamangkuton naton ang aton kaugalingon - presentable bala kita nga halad sa Amay?  Mapabugal bala naton sa Iya ang aton kaangtanan sa isa kag isa, ang aton pagkabalaka, ang aton pagtamod sa isigkatawo naton sa aton katilingban?  Kita ang Corpus Christi, kita ang lawas ni Kristo.