11th sun A - 1

Isa ka adlaw si Pedro kag si Juan nagsakay sa eroplano padulong sa Manila.  Samtang nagapanakayon sila nanotisiyahan ni Pedro nga ang isa sang mga makina sang eroplano nagakalayo. Nakibot si Pedro kag nagkarankaran.  Pinukaw niya si Juan nga nagasiling, “Juan, Juan, ang eroplano nagakalayo, macrush na ang eroplano!”  Sang nabatian ini ni Juan daw sa waay lang ini sa iya.  Nagapahunayhunay man siya sa gihapon sa iya pulungkuan kag nagsiling kay Pedro, “Pedro, ano ang labot mo kon nagakalayo kag macrush ang eroplano.  Indi man ini aton.” Kag si Juan nagpadayon nga nagapahunayhunay sa iya pulungkuan.

Of course sa simple nga logic bisan grade one nakahibalo nga sala si Juan.  Matuod indi ini ila eroplano, apang nagasakay sila sa sina nga eroplano kag kon ano ang matabo sa sina nga eroplano, madalahig sila tanan.

Apang sa masubo nga palad ining simple nga logic indi man naton makuha kong kaisa - ilabi na gid kung ini nga mga problema napertenecer sa aton simbahan. For example madamo sa aton mga tumuluo ang indi na makahibalo sang aton pagtuluohan.  May ginpamangkot ako nga kalasalon, pila ang sakramento – ang madasig niya nga sabat tatlo father.  Naglungolungo ako, kag madasig siya nga nagsabat liwat, ay apat gali, Father – bunyag, konpirma, kalawat kag santo rosaryo.  Amo ini ang siling sang mga intsik more talk more wrong, less talk less wrong, no talk no wrong.  Kung indi ka kahibalo hipos ka na lang kag akua kay tudluan ta ka.  Sa sini nga situwasyon ano ang himuon naton.  Ay iya na iya problema sang pari, iya na ya sang simbahan, . . . ah ipadala to sa madre, indi gani ihatag to sa katekista.  Opps daw waay gid man kinalain ang aton logic sa logic ni Juan – ano labot mo ngaa aton ini eroplano.  Yes my dear may labot ikaw this is your church. We are responsible for each other, each of us is responsible for the church, we are on the same plane.

Sa India may isa didto ka templo nga nahamtang sa uma nga bahin.  Waay ini eletricidad – waay sila Napocor.  Kon may selebrasyon sila sa kagab-ihon amo ini ang ila ginabuhat.  Nahamtang sa tunga sang templo ang daku nga bulutangan sang mga sulo, sa diin sarang makaigo ang sobra duha ka gatos nga suga.  Sa tion sang ila selebrayon kon gab-I ang tagsa tagsa bata kag tigulang nagadala sang isa ka sulo kag pag-abot nila sa templo ibutang nila ini sa bulutangan sang mga suga – tanan may dala gid – kag sa ila pagsulod amat amat nga nagasanag ang templo kag nian makasugod na sila sang ila pagsimba sa dios.

Kamo iya ano ang ginadala ninya sa simbahan sang Dios – what do you bring to your church?  Kolecta lang gid bala ang madumduman naton nga dal-on, novenario gid lang bala, ang maram-an ta gid lang bala ang madala naton diri.  Dalha diri sa aton simbahan ang inyo mga kabataan nga natudlu-an ninyo mangadi kag natudluan ninyo sang katekesis dira mismo sa inyo balay.  Dalha ninyo diri ang kabataan nga nahanas ninyo sa Kristiano nga pamatasan paagi sa inyo maayo nga ehemplo kag sang nagakaigo nga pagsaway.  Dal-a ninyo diri ang inyo mga talento katulad sang pagdala diri sang miembro sang aton koro nga nagahalad indi lamang sang ila boses kundi pati ang ila tiempo.  Dal-a ninyo diri sa simbahan ang inyo kaalam, ang inyo kapisan, ang inyo voluntario kag hamili nga bulig.  Ang simbahan indi lang iya sang pari.  Ang hilikuton sang simbahan waay lamang nahatag sa pila ka nahot nga mga parokyano diri sa dingle – responsibilidad ini kag obligasyon sang tanan. 

Sang nakita ni Kristo ang mga tawo, nagbatyag siya sing kasubo kag kaluoy tungod kay waay sila sang manugbulig.  gani ginpadala niya ang iya mga apostoles sa ila.  Kita man ginapadala sa tagsatagsa ka miembro sang aton parokya.  Gani subong mamangkot kita may nahimo na bala ako, nagtinguha gid man bala ako nga mabuligan ang akon isigkatawo sa ila pagtuo?  Napasa bala naton ang akon paagtuluohan nga natun-an naton sa sabak sang aton katigulangan sa mga nagasunod sa aton?  Ginadala bala naton ang aton pagtuo sa aton olobrahan, sa aton mga tienda ukon opisina paagi sa aton maayo nga pagginawi? We are on the same plane.  Gani indi lamang kita subong magpangamuyo nga ang Dios magpadala pa gid sang dugang nga mangangani sa iya alanyon.  Ginapadala niya ikaw, ginpadala niya kita tanan - ipangamuyo lamang naton nga kita tanan mangin bukas sa sini nga panawagan ni Kristo kag kita mangin mapisan sa sini nga tulumanon.