23rd sun A - 1

Sa isa ka isla sa Solomon Islands, may isa didto ka tribu sang mga ati nga kon magpulod sila sang dalagku nga mga kahoy nga kon paminsaron sa tam-an ka bahol.  Waay sila nagagamit sang wasay ukon sang binangon.  Ano ang ginabuhat nila?  Libutan nila ang daku nga kahoy kag singgitan nga singgitan, mamuyayaw sila nga mamuyayaw, singgit sila nga singgit.  Sa sulod sang 30 ka adlaw kadtoan na nila kada adlaw kag singgitan kag mamuyayaw sa idalom sang kahoy hasta nga ini mapatay kag asta ini nga kahoy matumba.  Ginabuhat nila ini kuno kag tam-an ka epektibo, siling sang manunulat sang libro, didto sa isa ka isla sang Solomon Island.

Mga utod para ninyo mahibaluan waay ako nagasaysay sa inyo kon paano ang mahapos nga magpulod sang isa ka daku nga kahoy.  Kulang na nga daan ang kahoy naton indi na kita maghagi pamulod.  Ang leksiyon nga luyag ko ipahangop amo nga kon paano kita makasiguro nga makapatay kag makapatumba indi sang kahoy kundi sang espiritu sang tawo.  Paano - singgitan, nga singgitan, buyayawon kag buyayawon.  Sa aton panahon indi gid man ini siguro epektibo sa mga kahoy, pero ini nga pamaagi epektibo kon ang tawo kag ang iya espiritu amo ang aton pagahambalan.  Ang bata nga ginasingganan kag ginasinggitan nga “gago” ukon “gaga” may daku nga tsansa nga kon magdaku sila magmangin gago gid man sila kag gaga.  Siling sang isa ka manunulat – kon ang mga kabataan nagakabuhi sa sulod sang panimalay nga pirme lang sila ginabuyayaw, makatuon man sila nga magkondenar.  Kon ang kabataan nagakabuhi sa sulod sang panimalay nga pirme lang may mulayay kag masakit nga mga pagbinaisay, magadaku man sila nga pirme lang nagapangita away.  Kon ang mga kabataan nagakabuhi sa balay nga pirme lang sila ginapahog, magadaku man sila nga pirme lang nagakahadlok.  Kon ang kabataan nagakabuhi sa sulod sang panimalay nga pirme lang ginasuyaan kag ginamulay, magadaku man sila nga mahuluyaon.

Ano subong ang solusyon nga ginahatag ni Jesus sa aton sa sini nga mga hitabo - paano naton sawayon ang aton kabataan, paano naton sawayon ang aton isigkatawo?

Ang Ginoo naghatag sa aton sang tatlo ka tikang sa pagsaway una kadtoi sia nga kamohanon lamang.  Indi pag-isinggit, indi pagiwaragwag ang iya sala - kadtoi sia kag istoryaha sing mahinay.

Kon indi sia magpamati kadto ka sa ikaduha nga tikang – dal-a ka sang duha ukon tatlo ka tawo nga makalaygay sa iya agod magliso sia sa iya mga sala.  Kon sayuron bululigi na ninyo.

Kon indi pa gid sia magliso, kadto ikaw sa ikatlo nga pamaagi - dal-a ang isyu sa bug-os nga katilingban agod nga ang bilog nga katilingban magapakita sa iya sang iya sayup.

Kag kon indi pa gid - tratahon sia nga isa ka Gentil ukon manugsukot sang buwis - kon sayuron pa, nahimo mo na ang tanan, karon itugyan sia sa kamot sang Dios - bahala na ang Dios sa iya.

Waay ako nagasiling nga sundon gid naton ini sing maid-id.  Apang diri makita naton ang luyag ipaabot sang Ginoo sa aton.  Kag ano ini? nga kon makasala ang imo utod dapat naton sia sawayon kag koreheran apang himuon naton ini sa malulo kag matawhay nga paagi.

Kita nga Pilipino may kinabatasan nga kon makasala gani ang aton utod, either ginahipsan ta lang (ay ano man labot ko!) ukon ginapanugid-nugid naton sa tanan tanan, luwas lamang sa natungdan nga nakasala.  Ang lain pa ginasaway tuod naton – apang ginasaway sa tanan luwas lamang sa natungdan.  Halimbawa, ang kumare ko nagapa five-six, ang kaingod ko may kirida, si talpolano nakamitlang sang malain nga tinaga - ang tanan tanan nasugiran na naton pati ang taga-ilaya, pati ang pari, pati ang wala sing albot, luwas lamang ang natungdan.  Dapat naton sawayon kay siling sang aton nahauna nga balasahon kon indi mo sia pagsawayon may bahin man kita sa iya kalaglagan - kita ang manabat kon sia pagakondenaron sa ulihi nga panahon.

Sang nagligad may gintiro sa isa ka lugar, inosente nakursunadahan lamang - nagbakal lang siya sang mainit nga sabaw sa tiyange nga ipahigop sa iya nanay nga nagamasakit.  Gintiro sia.  Madamo ang nakakita apang waay may manugid kag waay may matudlo.  Kon yadto nga tawo nga nagtiro mapaimpierno, ikaw nga naghipos lang dira, indi ka magsiling “ti man” - kay pati ikaw, siling ni propeta Ezekiel, madala sa iya kalaglagan, tungod kay waay mo sia ginsaway kag ginpenehan sang hustisya agud nga sia maghinulsol kag magbaylo sang iya pagginawi.

Mga utod, ang aton mga balasahon subong nagasiling nga may kahilabtanan kita sa isa kag isa.  Wala sing may nagapalangit nga naga-isahanon lamang.  Wala man sang nagapa-impierno nga naga-isahanon lamang.  May dala gid kita.  May dal-on gid kita.  Subong ginahangkat kita nga ini nga kahilabtanan sang mga anak sang Dios nagahatag sa aton sang responsabilidad sa pagsaway sa isa kag isa.