7th sun A - 2

Sang na-assign ako sa seminaryo, ginbinag-binag ko kon ano gid ang pamatasan nga pangitaon ko sa isa ka seminarista bilang indikasyon nga sia may capacidad nga mag-pari.  Ano gid man bala ang pamatasan nga pangitaon ko agod mahusgahan ko sing sakto kon nagakabagay gid man bala ang isa ka bata nga mangin pari. 

Masentro lang bala ako sa iya capacidad nga mag-isahanon, nga iya maagwantahan nga wala sing asawa ukon panimalay nga matawag niya nga iya?  Husiaon ko bala kon wala sia sing nobya, wala sia sing huyog nga magpang-asawa ukon may capacidad sia nga magkabuhi nga naga-isahanon lang? 

Ukon husisaon ko bala ang iya sahi sang kabuhi, ang iya pagka-simple?  Ukon testingan ko bala ang iya capacidad nga mangin matinumanon bisan pa mabudlay kag mabug-at para sa iya?  Sang ulihi pagkatapos ko ini mapamalandongan ginpili ko ang isa ka kalidad nga sa banta ko bagay sa isa ka magaalagad sa Dios sing bug-os.  Kag ano ini nga kalidad kag pamatasan?  Husisaon ko kon bala maalwan sia – kon bala maalwan sia - ina nga sahi sang kaalwan nga sarang niya masakripisyo bisan pa ang iya kinamatarong, ang iya pribilehiyo ukon ang iya kaayuhan.  Inang sahi sang kaalwan nga wala sing katahap ukon pang-alang-alang nga maghalad sang iya kaugalingon sa mga ulubrahon ukon responsabilidad.  Sa malip-ot nga pulong inang sahi sang kaalwan nga magahatag sa iya sing kapacidad nga ikabuhi ang ebanghelyo karon nga adlaw.  Indi sia ma-isip, wala nagapanumdom kon ano ang balos nga makauha niya, kag wala sia nagapanumdum kon ano ang makuha niya sa iya pagpangabudlay, nga kon palakton mo sia sing isa ka kilometro malipayon niya nga lakton ang duha ka kilometro.

Ini nga pamatasan indi lang bagay sa isa ka manugpari kundi sa tagsa man ka Kristiano, sa tagsa ka sumulunod ni Kristo - ang pamatasan sang kaalwan - kay kon wala  ang kaalwan maisip ina sia nga kristiano; kon wala ina nga kaalwan bantayan ya lang na ang iya kinamatarong kag indi na sia magsakripisyo; kon wala sang sina nga kaalwan mangabudlay lang na sia kon may balik kag kon may kuhaon sia para sa iya kaayuhan.  Kon may kaalwan sa aton tagipusuon kadali man sa aton magpatawad.  Apang kon maisip kita, mabudlay man ang pagpatawad.  Ang kaalwan nagahatag sa aton sing kapacidad sa pagkabuhi sang mga panghangkat ni Kristo sa aton. 

Sa aton kalibutan karon masyado kag mabaskog ang aton pagpatuman sang kinamatarung sang tagsa tagsa.  Ginapatuman gid naton sing id-id halimbawa ang just compensation, ang igsakto kag nagakabagay nga sweldo.  Gina-emphasize naton ang human rights, ukon ang kinamatarung sang tawo kag id-id gid naton nga ginapatuman ini sa aton pagsinalayo, sa aton negosyo kag bisan gani dira mismo sa sulod sang aton panimalay.  Maayo gid ini kag dapat gid man ini nga dapat naton halungan kag dampigan ang kinamatarung sang tagsa-tagsa.  Apang basi magtubo man sa aton paminsaron nga kutob lamang diri ang panawagan sang Dios sa aton.  Dumdumon naton nga si Kristo nagbaliwala sang iya pagka-dios agod nga kita maluwas.  Dumdomon naton nga si Jesus nagpakanubo kag nagbiya sang iya gahom bilang Dios agod nga sia mangin katulad naton sa tanan nga butang magluwas sa sala.  Dumdomon naton nga si Kristo nagbaton sang kamatayon sa paghigugma sa aton.  Ang pinakamataas nga panawagan sang isa ka Kristiano amo ang paghigugma - kag sa aton apgsabat sa panawagan sang gugma may mga bes nga aton ibaliwala ang aton mismo kinamatarung para sa kaayuhan sang iban.  Dira sa kabuhi sang mga martir makita pa gid naton nga ila ginbatas ang inhustisya para sa kaayuhan sang tanan.

Ang sumulunod ni Kristo maalwan kag indi maisip.  Ang sumulunod ni Kristo handa sa paghalad sang iya kaugalingon para sa kaayuhan sang tanan.  Ang sumulunod ni Kristo maalwan tungod kay ang sumulunod ni Kristo nagasabat sa panghangkat sang gugma.