Sa aton palibot, sa tagsa ka adlaw sang
aton kabuhi makita naton ang madamo nga mga hitabo sa diin ang kamatayon
nagadala sang bag-o kag mas mataas nga sahi sang kabuhi. Ang binhi nagakamatay agud nga ini magtubo kag
magpamunga sing madamo. Ang kahoy ginapulod
agud makapatindog ini sang balay. Ang
palito sang pospro masunog kag maupod agud makahatag ini sang kalayo. Ang battery nagakamatay agud nga ini
makapasiga sang flashlight kag makapatunog sang radyo. Ang mga hayop kag mga tanom nagakamatay agud
nga ini makahatag sang sustansiya sa lawas.
Ini tanan nagapakita nga ang tanan padayon nga nagakabuhi sa isa ka
mataas nga sahi sang kabuhi bisan pa sa kamatayon kag paagi lamang sa
kamatayon.
Subong, ang aton ebanghelyo nagapahayag
sa aton nga ang aton Dios, Dios sang mga Buhi kag indi sang mga patay. Gani ang tanan para sa iya buhi kag indi
patay. Sa simple nga pulong nagatuo kita
subong nga si Abraham, si Isaac, si San Pedro, si Andres Bonifacio, si Rene
Requiestas, si lola kag si lolo - sila tanan buhi sa kalag bisan pa namatay
sila sa lawas, kag sa ulihi nga mga inadlaw, sila mabanhaw liwat sa bag-o nga
kabuhi kag magabangon gikan sa ila mga lulubngan. Nagatuo kita nga ang aton
dutan-on nga kabuhi waay natapos sa kamatayon kundi ini ginabaylohan sang isa
ka mas mataas nga sahi sang kabuhi. Kag ining lawas naton nga madunot kag
mangin yab-ok sa sulod sang lulobngan mabanhaw liwat sa pagkari sang aton
Ginuong Hesukrito sa diin kita magakabuhi sa isa ka mas mataas nga sahi sang
kabuhi bilang mga anak sang pagkabanhaw.
Gani tanan kita kon kita mamatay pagahatagan sang bag-o nga kabuhi,
tungod kay ang Dios nga nagtuga kag nagahigugma sa aton, Dios sang mga Buhi kag
indi sang mga patay. Kag sa sini nga tion kita magakabuhi lamang para sa
Dios. Bahin ini tanan sang proceso sang
aton kabuhi.
Apang indi tuman nga kita magtuo lamang
nga ang kabuhi nga ginahatag sang Dios maangkon lamang kon yara na kita sa aton
mga lulubngan. Indi kita makasiling nga
dira lamang sa lulubngan kita nagasugod sang bag-o nga kabuhi, kag dira lamang kita ginahatagan sing
kahigayunan sa pagkabuhi para sa Dios kag upod sa iya. Ang Dios sang mga Buhi naga-agda sa aton
subong sa sining bag-o nga kabuhi. Kag
indi lamang ini kabuhi sa diin makaginhawa kita sing madalom, makalumbayag sa
tunog sang cah-cha, makakaon sing pagusto sa punsyon kag makadalagan sing
madasig. Tanan kita ginaagda nga
magmangin buhi pa gid para sa Dios paagi sa pagkabuhi sang kabuhi sang Dios. We are invited to live and live this life
more meaningfully, more vivaciously by living the life of God.
Mga utod indi ini linabutaw nga mga
sugilanon ang akon ginasiling sa inyo.
Binagbinaga bala sing maayo kay ang aton Ginuong Hesukristo waay
nagpabunal sang iya kaugalingon, waay nagpakorona sang tunok, kag waay nagpalansang
sa Krus agud to magakabuhi ikaw tubtuob 90 anyos. Si Hesus nagbaton sang kamatayon sa Krus agud
to nga kita nga nagatuo sa iya makaambit sang iya kabuhi kag paagi sini
makaambit man kita sang iya kalipay.
Jesus died for you not because he wants you to live a century but
because he wants to change the quality of your life. He wants you to learn from Him how to live
your life so that it will not just be living for the sake of living but a life
so wholesome and so human, a life filled with joy, even now, bisan subong pa
lang. Kag diri makita man naton nga
nagasulod ang kinaadan nga proceso sang kalibutan, nga ang mas himpit kag mas
mataas nga sahi sang kabuhi maangkon lamang paagi sa kamatayon, sa aton pagpakamatay
sa aton daan nga kabuhi.
Paano ini sa concreto? Paano kita makaambit subong pa lang sang
kabuhi sang Dios agud nga kita mangin buhi para sa iya.
Isa lamang ka butang: we have to choose God. We have to choose the values of the gospel
above all other choices and all other values, kag agud matuman ini, kinahanglan
handa kita nga mamatay sa aton daan nga pamatasan, daan nga kinaugali, daan nga
mga pagginawi agud nga kita magakabuhi sang bag-o nga kabuhi nga ginatanyag
sang Dios sa aton. Amo ini ang leksiyon
nga ginapahayag sa aton sang aton nahauna nga balasahon. Ang pito ka mag-ululotod nagpili kag
nagpasulabi sa Dios labaw sang sa mga ginatanyag sa ila nga mga pagkabutang kag
kagamhanan, bisan pa gani sang sa ila pagpakamahal sang ila mismo kabuhi.
Tungod sini agud nga kita magkabuhi para
sa Dios kinahanglan handa kita sa pagsakripisyo para sa iya kag sa iya mga
kasugoan. Kinahanglan handa kita nga
mamatay sa aton kaugalingon nga luyag agud nga kita mabanhaw sa bag-o nga
kabuhi upod sa iya. Sa pagkamatuod
masakit ini nga proceso tungod kay may mga naandan na kita nga buluhaton nga
bisan waay na nagakabagay subong, padayon pa naton nga ginabuhat. Apang indi kita ka padayon nga nagsinggit
sang pagbag-o samtang ang aton tiil nagapabilin sa mga daan nga pamaagi,
pagginawi kag panghunahuna. Sakto ang
PCP II sa iya pagsiling “In order to be
renewed as a Church, we must leave behind many ways of thinking, speaking and
acting which no longer effectively serve and perhaps even obstruct our
evangelizing mission. This will mean an
unsettling pain,a disengagement from what is cherished but is now obsolete or
obstructive, a dying to what is sinful, that we may come to newness of life.”
Ang pamangkot subong amo, handa bala
kita sa pagsabat sa panawagan sang Dios
nga mangin katilingban kag indi lamang mag-isa-isa, mag-iya-iya sa aton
pagpanglakaton padulong sa iya ginharian?
Handa bala kita sa pagbiya sang aton naandan nga mga kinaugali nga waay
nagapasilabot sa hilikuton sang simbahan, sang aton banwa kag magapabaya sa
aton katungdanan diri? Handa bala kita
sa paghakus sang iya misyon bisan pa ini magadala sang kakapoy sa aton? Handa bala kita sa pagbiya sang mga waay na
nagakabagay nga mga practices katulad sa aton mga fiesta nga puno sang patuyang
nga kagastohanan kag sa baylo sini ibutang ang aton ginagasto sa aton mga
pastoral programs? Handa bala kita
magpaambit sa simbahan indi lamang sang aton manggad kundi ilabi na gid sang
aton panahon, sang aton talento kag kaalam agud matuytuyan man ang iban? Handa bala kita mamatay sa aton kaugalingon
nga luyag agud nga kita makatuon man sa pagpamati sang tugda sang iban ilabi na
gid sa aton pagpalakat sang aton mga parokya, sang aton panimalay kag sang aton
banwa? Handa bala kita magbiya sang aton
mga bisyo, sang aton mga hilig nga indi gid man importante agud kita makabulig
ilabi na gid sa mga kubos naton nga mga utod.
Mabudlay ini tanan. Apang waay
kita may mahimo, waay kita sang shortcut sa sini nga proceso, waay kita sang
mga anesthesia nga makapalikaw sa aton sang kasakit nga tuga sang pagbag-o nga
aton ginahangad. Amo ini ang alagyan
naton nga proceso agud to madab-ot naton ang mas mataas nga sahi sang kabuhi. Dapat kita mamatay sa aton kaugalingon agud
nga kita makaagum sang bag-o nga kabuhi.
Leksiyon ini nga ginahatag sa aton sang proceso sang kabuhi, kag subong
ginapaathag sa aton sang Santos nga Kasulatan.
No comments:
Post a Comment