4th sun B - 1

Sang ginprocesion ang Birhen sang Fatima nga kuno milagrosa nagtupa ang landong sini sa isa ka tawo nga piang, kag gulpi lang ang piang nagtindog, naglumbayag, nagtumbo kag nagsaotsaot – ang tawo naayo sa iya balatian.  Pagkabati sini sang duha ka piang nga nagapakilimos didto sa ulounhan lang sang ginaagyan sang prosesyon, dayon sila nagkarankaran nga nagapalagyo sa procesion.  Siling sang isa, “dali-a, ano na lang ayhan ang matabo kung maayo kita?  Ano na lang ang aton palangabuhian.”  Kag dumalagan sila nga duha palayo sa istatwa sang mahal nga birhen.

Katulad sining duha ka tawo may pamatasan man kita kung kaisa nga ginatawag naton dependency.  Ano ini ang ginatawag nga dependency – for example may tawo nga naanad sa sigarilyo sa bagay nga kong indi siya makapanabako nagalingin ang ulo niya kag daw ginalagas ang iya pagginhawa.  Sa sini nga kahimtangan masiling naton nga nangin dependent na siya sa sigarilyo.  May ara man abi nga dependent sa makahulubog nga ilimnon – kung indi siya makainom gakurog ang iya lawas.  May ara nga nagsiling nga kung waay siya make-up daw ginubahan siya, daw ginkuhaa-an siya sing madamol ng alukaba.  Dependency ang tawag naton sa sini nga pangginawi.

Sa mga ordinaryo naton nga mga pamatasan may ara man kita nga dependency. Kontento na lang kita sa sinang sahi sang pamatasan tungod kay amo na ina ang aton nasaw-an sa bagay nga ini nangin isa na ka habit kag mabudlay na naton mabuy-an.  Pamatasan na naton nga manglibak, nga manghikay kag manuya.  nangin batasan na naton ang magligoy, nga magpahubog, nga mangawat.

Katulad sang duha ka piang  sa aton istorya pinili na lang nila nga magpabilin nga bulag kag mapakilimos sang sa madulaan sila sang palangabuhian.  Daw indi maintiendihan no, pero amo ini ang nagakatabo sa masami.

Paano kita maayo sa sini nga mga dependency.  paano naton mabreak ini nga dependency, ini nga mga habits.

Sundon naton ang inagyan sang bulag sa aton ebanghelyo.

Una, katulad sang bulag akuon naton nga bulag kita, “bulag ako siling niya.”  Amo ini ang pinakabudlay nga proseso sang konbersiyon kag amo man ini ang pinakaimportante.  Mabudlay tungod kay ang tawo budlay pa-akuon sang iya sala.  Kung may itudlo lang siya itudlo ya na, kon may pasibangdan lang sia, ipasibangod ya na sa iban, kon may rason lang sia rasonan ya na.  Importante ini tungod kay kung mainsistir sia nga wala sia sang sala waay ka gid may mahimo.  Waay sing pagbag-o kon una bes waay man sia gaako sang iya sala.  Indi mo mabuligan ang tawo nga waay nakakilala nga bululigan sia.

Ikaduha, ang bulag sa aton ebanghelyo nag-ayo tungod kay luyag niya nga mag-ayo, luyag sia nga makakita, gani ginbuhat niya ang mga ginpabuhat ni Kristo sa iya.  Nag-cooperar sia kay Kristo, nagcooperar sia sa grasya.  Waay na sia nagpangalangalang pa.  Kon kaisa ano man lang ang nagapugong sa aton sa pagbag-o – ang pagsiling buwas lang, may tiempo pa man.  Ukon mahulat na lang, ukon masiling kabudlay gani pabay-i da.  Apang may mga butang sa kalibutan nga kon maghulat ka lang, mabayaan ka gid.  May mga pamatasan nga dapat atubangon kag pakigsumpungan.