8th sun A - 2

Sa pagsiling sang Ginoo nga magtuon kita sa mga pispis kag mga sa hilamon sa kaumahan, wala ini nagakahulugan nga magpatawhay na lang kita, magpanunayhunay sa aton balay, itugyan na lang naton ang aton kabuhi sa Ginoo nga nagasiling, “bahala na.”  Ang Ginoo wala nagsiling nga ibahala ta lang ang tanan sa Dios kag magkanta que sera, sera, whatever will be, will be.  Indi ini pagsalig sa Dios kundi isa ka pagpatumbaya. 

Sa pagsiling sang Ginoo nga indi kamo magpalibog, kag indi ninyo pagpaligbi ang buwas, wala ini nagakahulugan nga indi na kita maghanda, indi na kita mag-ulikid, kag magpagtuyang na lang kita sa aton kabuhi.  Kon wala ka nagakatublag sa nagakalatabo sa imo palibot tungod kay siling mo saligan ta lang ang Dios, indi ina pagsalig kundi isa kag pagpatumbaya.

Ano ang pagsalig?

Ang pagsalig sa Dios nagakahulugan nga ako magtinguha kag maghimakas sing hugot agod madab-ot ko ang mga kaayuhan nga ginplano kag ginabuot sang Dios sa akon.  Dab-uton ko ina, magapangabudlay ako suno sa akon ikasarang agod madab-ot ko ang mga kaayuhan nga luyag sang Dios nga akon dab-uton.

Ang pagsalig sa Dios nagakahulugan nga magapadayon ako sa paghimakas bisan pa sa tunga sang mga kabudlayan kag mga kaupangan kag bisan pa kon kaisa nagakatumba ako.

Ang pagsalig sa Dios nagakahulugan nga sa bisan ano man nga panghangkat magabangon ako kag magasabat tungod kay may pagsalig ako nga pagabuligan ako sang Dios.

Ang pagsalig sa Dios nagakahulugan nga iya ako ginhatagan sing ikasarang kag igkasangkol sa pag-atubang sang mga kabudlayan kag kabug-at nga akon masugata. 

Ang pagsalig wala nagakahulugan nga bahala na sila da, ukon pabay-i lang da – indi ina pagsalig kundi pagpatumbaya.  Sa baylo ang pagsalig sa Dios nagakahulugan nga handa ako sa tanan nga tion sa pagsabat sa mga panghangkat sang Ginoo sa akon tungod kay nagatuo ako nga iya ako dampigan, iya ako buligan, iya ako hatagan sing kusog kag kaisog.

Ang pagsalig sa Dios nagakahulugan nga ang kabubut-on kag kasugoan sang Dios labaw pa sang sa matag-adlaw ko nga mga kinahanglanon, nga kon akon ginapasulabi ang Iya kabubut-on, kon akon ginapasulabi ang pagkabuhi sing matarong, kag kon akon ginahatagan sing labing daku nga pagtamod ang iya ginatudlo sa akon, ang Dios indi magpabaya kag ang Dios indi gid maghawid sang iya dalagku nga mga bendisyon kag grasya sa mga matarong.

Ang pagsalig sa Dios nagakahulugan nga kon papili-on ako sa paghimo sang sala ukon sang kaayuhan, pili-on ko sa ginahapon ang kaayuhan bisan pa sa panulok sang kadam-an mangin akon man ina kapierdihan. 

Ang pagsalig sa Dios nagakahulugan nga batason ko ang inhustisya, takuron ko ang mga kabudlay, pili-on ko ang kalutusan, kargahon ko ang mga kabug-at sang sa makasala ako kag magtampalas sang kasugoan sang Dios.

Ang pagsalig sa Dios, ang kadalumon kag ang kasangkad sini nagapakita sa kabuhi sang isa ka kristiano sang iya pagtuo sa Dios kag subong man ini nagapamatuod nga ang iya gugma sa Dios labaw sang sa tanan nga mga butang.