5th sun A - 1

Sang una nadumduman ko kon Domingo sa summer masami na si nanay nga naga-obra sang homemade nga ice cream.  Indi pa gid to sang una uso ang ice cream, kag kon sa bagay waay pa kami sang una koryente para sa freezer ukon refrigerator.  May ice cream maker sia . . . plastic nga baldi man lang ina nga puno sang ice, pero sa tunga sang ice may ara dira sang metal nga sulodlan sa diin ginabutang ang ice cream.  Napalibutan ina sang ice nga yara sa baldi . . . kag agud to magtugnaw pa gid, ang ice ginaburibudan sang asin.  Siguro ang iban sa inyo nakakita sina sa sorbete nga ginalibod sa dalan – ang ice butangan asin para magtugnaw pa gid kag magtener ang tugnaw. 

Natingala gid ako sina sang bata pa ako kay ina nga asin nakita ko man sa oven nga bato.  Ang asin ginasalog ini sa oben.  Kon kaisa pila ina ka sako nga asin ang ginasalog, kag sampawan sang bato . . . kag ginasiling nga nagadugang ini sang init, nagalawig kag nagalapta ang init sa sulod sang oven, tungod sang asin.

Ang asin isa ka catalyst, ano kong sayuron ini – tungod sang iya presensiya mainpluwensiya sang asin ang ice sa bagay nga ang tugnaw patugnawon ya pa gid tapat.  Tungod sang iya presensiya mainpluwensiya sang asin ang kalayo sa bagay nga ang mainit painiton ya pa gid tapat.  Catalyst.

Kon ginatawag kita ni Kristo nga asin ini tungod kay luyag niya nga kita makainpluwensiya sang aton palibot sa kaayuhan.  Nga kita makadala sang aton kaingod sa kaayuhan.

Sa isa anay ka convention sang mga misyonero sa bilog nga kalibutan nagpaambitanay sila sang mga techniques agud nga madala nila ang tawo sa Kristiano nga pagtuo.  May iban didto nga nagsiling nga may radio station sila, may iban nga nagapublish sang libro, leaflets, kag komiks.  May iban nga nagawali sa dalan.  May ato didto iya nga misyonero nga ang ila techniques la-in sang sa iban.  Ang ginabuhat nila amo sini.  Ginaassign nila ang isa ka kristiano nga pamilya sa isa ka lugar.  Ina nga pamilya didto ma-istar, didto sila mangita sing palangabuhian, didto sila magatener.  Ano ang ginahimo nila, nagacatkesis bala sila, nagawali bala sila, naga-prayer rally bala sila?  Waay.  Nagapuyo lang sila dira, nagapangabuhi sing normal sang ila pagtuo, ginapractice lang nila ang ila pagtulouohan kada adlaw . . . kag sa amat-amat ang mga tawo nga nakakita sang ila sahi sang pangabuhi magainteres, magapanghusisa, kag dira magasugod ang ila evangelization.

Subong husisaon naton ang aton kaugalingon - sin-o bala ang aton na-inpluwensiya sa kaayuhan sang nagligad nga semana, sin-o ang nahagad naton nga magsimba, sino ang mga tawo nga kuntani mahimo sang malain apang tungod sang aton inpluwensiya napa-untat naton siya.

Sa masami masiling kita “ina nga bata nagdaku sa tienda ano pa lantawa bala ang pamatasan niya.”  Ukon ano abi kay ang palibot niya sugarol ano pa palasugal man siya.  Sa sini nga mga hambalanon makita naton nga nagapati kita nga ang aton palibot, ang aton mga kaupod mahimo nga makadala sa aton sa kalainan kag bisyo.  Siling nila tell me who your friends are and I will tell you who you are.  Apang tandaan man naton nga kung maka-inpluwensiya sa aton ang kalainan, ma-inpluwensiya man kita sa pagbuhat sang kaayuhan.  If evil is infectious, goodness is also infectious kag diri kita nga mga Kristianos mangin asin sang kalibutan.

Kagab-I nagabasa ako sang libro nga sinulat ni Joseph Cardinal Bernardin.  Ini nga libro sinulat niya antes siya mapatay sang 1996.  Nangin popular ini siya nga cardinal indi lamang sa America kundi sa bilog nga kalibutan – na CNN siya tungod sa ano, tungod kay gin-akusar siya sang sexual abuse.  Isa yadto ka false accusation, indi matuod nga akusasyon nga ginhimohimo para lang nga mahalitn ang ngalan sang simbahan kag sang cardinal mismo.  Ginhimo yadto sang isa man ka catoliko nga may daku nga aligotgot kag kaugot sa simbahan.  Pagkatapos nga matalupangdan nga butang butang man lang gali kinadtoan sang cardinal yadtong tawo kag nagreconcile sila nga duha.  Ang tawo nangayo sang patawad, nagamigohay sila kag nagbalik siya sa simbahan.  Yadtong hitabo masakit para sa Cardinal apang waay siya nagdumdum nga mag-akusar man liwat kag ipapriso yadtong nag-akusar sa iya, sa baylo ginpangita niya siya kag ginpatawad.  Ang tawo nagbalik sa simbahan, nagbaton sang mga sakramento kag nangin mahidaiton sang napatay sia tungod sang AIDS.

Mangin asin kita – makadala sang iban sa kaayuhan.  Ang mga hitabo sa nagligad nga semana nagapakita nga waay kita sini nagapati.  Nagdumdum kita nga pinakamaayo nga sabat agud mapa-untat naton ang krimen amo ang pagpatay sang tawo, amo ang lethal injection.  But goodness can change a person, forgiveness can influence him to the good.  Violece will only breed more violence and goodness will breed more goodness.  Salt of the earth – let us not underestimate the power of good and power of a good influence.

Subong man kita ginatawag sang aton Ginuo nga suga sang kalibutan.  Ang suga nagahatag kasanag, nagagiya sang aton alagyan. Tungod sang mga suga sa runway ang eroplano makalanding tungod kay nagahayag kag naga-claro ang landingan.  Amo man ini ang Kristiano kuntani - nagapaclaro sang alagyan.  Ginahimo niya hayag ang alagyan, ang kamatuoran paagi sa iya panindugan.  Ginapakita niya ang sakto nga dalan. 

Sa masami luyag ta man kuntani nga magbuhat sing maayo ugaling kong kaisa ginatarantar kita, gina-abot kita sang aton pagkatalawit – pero kong may manguna lang damo man ina ang magsunod.  Kon may manguna lang – amo ini ang kristiano nga suga.

Ang suga nagaserbi man nga warning. Kon ang ginasundan mo nga salakyan naga-signal light nagakahulugan ina nga ginawarningan ya ikaw nga  indi ka anay mag-overtake kay maliko siya sa tuo.  Sa mga traffic lights – indi ka anay magtabok kay green pa ang nagasiga.  Warning.

Kon ginatawag kita nga suga ini tungod kay may katungdanan kita maghatag sang warning sa aton isigkatawo.  Kon kaisa may mabatian kita nga nagahinulsol sang ila nga mga ginbuhat nga nagasiling – way man tani ako nagkasubong sini kong ginwarningan mo ako sang una.  Pagsaway - mabudlay man ini buhaton indi bala? Paano ka makawarning, kag makasaway nga makadala ini sing kaayuhan kag indi makapalala sang situwasyon.  Inang sahi sang warning nga indi akig, indi bunga sang kaugot, indi suya, indi pagkondenar kundi isa ka buhat sang kabalaka kag paghigugma.