19th sun A - 1

Sang nagligad nga bulan ang mga seminarista naghiking sa kabukiran sang Leon, sa Bucari.  Ano man ang gatod akon nag-upod ako sa ila sa hunahuna nga kung masarangan nila masarangan ko man.  Naghunahuna ako nga ang lalakton siyempre mabudlay ilabi na gid tungod kay masakit ang akon tiil, pero waay ako naghunahuna nga tam-an gid gali ka budlay.  Nagkulurog ang tiil ko sa bagay nga halos indi na gani ako makatindog ayahn pa makalakat pasaka pana-og.  Pagkatapos sang malawig nga paglakat, pagbatas kag pag-antos nakalab-ot gid man ako sa amon padulungan, sa isa ka matahom nga lugar sa diin mabugnaw ang tubig nga naga-ilig gikan sa matahum nga busay.    Tungod kay naghinayhinay ako sa paglakat, pag-abot ko ang mga seminarista nga nagahulat sa akon nagpalakpak kag gintawag nila ako Lion King – sa bisaya pa ang hari sang Leon, Bucari, tungod kay nabatas ko ang pagtukad sini – I have conquered the mountains of Leon.  Apang sa hunahuna ko lang nakahibalo ako nga indi ko madab-ot ang akon padulungan nga isahanon lamang.  Suwerte lang ako kay may seminarista nga nag-unong kag nag-agubay sa akon, siya nga nangin akon sungkod sang ako nagapanglakaton.  Siya ang nag-unong kag nagencourage sa akon sa pagpadayon sa paglakat bisan pa ang tiil ko daw mabilin na sa dalan.

Ining experyensiya ko didto sa bukid sang Leon nagpadumdum sa akon nga katulad ini sa aton pagpanglakaton sa kabuhi.  May mga bes sa aton kabuhi nga sa luyag man naton ukon indi may mga bukid kita nga taklaron, kabudlayan nga dapat atubangon, mga chanllenges nga dapat naton sumpongon.  May mabudlay, kag may tam-an ka budlay.  Kag sa sini nga mga kahimtangan kinahanglan naton sang upod nga maga-tuytoy sa aton, upod nga maga-encourage sa aton kag kung mabudlay na gid, upod nga maga-agubay sa aton sa aton kaladtuan.

Subong ang aton mga balasahon nagatudlo sa aton kung sin-o ining aton upod sa aton pagpanglakaton sa kabuhi – siya waay liwan kundi ang aton Dios nga naga-unong sa aton bisan pa sa kabudlayan. 

Sa iya pag-upod ang Dios una naga-agda sa aton sa paghimo sang tikang bisan pa ini mabudlay.  Si Elias samtang nagapanago siya sa kuweba tungod sang madamo nga kabudlayan kag madamo nga kahadlok, gintika sang Dios kag gin-hangkat nga mag-guwa sa iya ginapanaguan.  Gin-agda siya sang Dios nga atubangon ini kag ginpasalig siya sang iya presensiya.  Si Pedro gin-agda ni Kristo nga magguwa sa sakayan, sa paglakat sa tubig, sa paghimo sang una nga tikang. 

Sa masami nagakatabo man ini sa aton – nahadlok kita maglumpat kay basi indi naton masarangan, madamo ang aton ginapang-alangalangan, may mga bes nga husto lang kita magpanimuko sa kilid kag magsiling, indi ako kasarang sina.  Apang ang Dios nga aton upod subong nagasiling, kaya mo yan, masarangan mo ina.

Nadumduman ko anya sang gin-assign ako sa butang nga ginakangil-aran ko sa bilog ko nga kabuhi.  Gin-assign ako sa pagsulat sa isa ka newsletter.  Kon ginpasugtan ko ini nga kahadlok kag waay ginbaton waay ko kuntani nakita ang gahum sang Dios nga nagatuytuy sa aton sa aton pagpanglakaton.  kag indi lamang amo sina.  Kon waay ako nagrisgo if I did not make the first step out of these fears.  siguro magantus ako subong  sang ginatawag nila nga the greatest pain and punishment of all - the pain of regret - ang paghinulsol sa bilog ko nga kabuhi, ang paghinulsol nga kontani nabuhat ko ini, apang tungod kay ginpasugtan ko ang akon kahadlok waay ko ini nabuhat kag waay na ako sing chansa pa liwat nga mabuhat ini.  Subong ang Ginuo nagasiling sa aton sa mga chanllenges nga masugata naton kaya mo yan, masarangan mo ina.

Ikaduha sa pag-upod sang Dios sa aton kung kaisa ginatugutan niya kita nga malugdan sa tubig katulad ni Pedro kag katulad man ni Elias nga ginlagas sang mga tinawo sang hari kag subong nagapanago sa kuweba tungod sang kahadlok.  Ginatugutan sang aton upod nga malugdang kita kung kaisa, nag mag-antos sang kabudlayan, nga malutos kita agud nga magpabilin kita sa iya, agud nga indi kita maglisa kag magtalang.

May isa anay ka iloy, dugay na tani nga pangamuyo niya agud mahatagan siya sang bata ang ginhatag sa iya isa pa ka abnormal nga bata, isa ka mongoloid.  Dugay man nga hibi iya kag pamasol sa Dios kag pamasol sang iya kaugalingon, apang sang ulihi nabatasan ya man kag dugan pa diri tungod sang iya bata nagpatindog siya sang isa ka organisasyon nga nagabulig sa mga mongoloid nga mga kabataan kag sang ila iloy. Ining mga paglugdang nga ginatugot sang Dios sa aton, ining mga kapaltahan kag kapalpakan, mga setbacks lamang ini, indi ini kalutusan.  Waay kita ginalumos, naglugdang lang kita agud matudluan kita sang mga mas importante nga mga butang, sa pag-usar sang aton abilidad kag sa pagsalig sa Dios.

Temporary setbacks.

Ang aton upod si Jesus – ginaagda niya kita sa pagtaklas sa mataas nga mga bukid – kaya mo yan kag kung mapalta kita yara siya sa dab-ot sang iya kamot agud nga makabangon kita liwat.