12th sun A - 1

May isa anay ka babayi nga sang iya pagkamatay gindala sang anghel sang hukmanan sang kalibutan.  Samtang ginhusisa sang hukom ang iya records sa libro sang kabuhi, waay gid siya sing may nakita nga kaayuhan  nga nabuhat sining babayi sang buhi pa siya, luwas lamang sang isa – ang paghatag niya sang isa gid lang ka kamote sa isa ka makaluluoy nga nagapakilimos.  Tungod kay masyado ka maluluy-on ang hukom, gintugutan siya nga pagadal-on sa langit paagi sa kusog kag sa gahom sining isa ka kamote nga iya ginhatag sa ngalan sang kaluoy.  Gindala ang kamote sa korte sang hukom kag ginpauyatan ini sa tigulang.  Kag sa hinali nagsaka ini paibabaw nga daw ginabutong sang isa ka indi makita nga higot, upod ang tigulang nga babayi .  Samtang nagasaka sia, nakita sia sang isa ka lalaki nga sa gilayon nagkapyut sa sidsid sang bayu sang tigulang.  Kag ginbutong man siya upod sa tigulang paibabaw sa langit.  Madamo pa gid ang nakakita sa ila, ang isa nagdalagan kag nanghawid sa tiil snag lalaki – kag ini siya gihawiran man sang isa pa gid, hasta nga nagatinabidtabid sila nga naga-idas nga ginabutong sang kamote paibabaw.  Ang makatalanhaga diri amo nga bisan madamo ang nagatinabidtabid, dala man sila sa gihapon sang kamote kag bisan gani ang tigulang nga babayi didto sa unahan waay gid nakabatyag nga may nagapanghawid gali sa iya. 

Sang ulihi sang dali nga lang sila makalab-ot sang langit ang tigulang nga babayi nagtulok paidalom sa iya katapusan, kag, ay abaw didto niya nakita nga sa pagkadamo ang nagapanghawid sa iya.  Nangakig siya kag ginapangwaslik niya ang mga tawo nga nagatabid sa iya nga nagasiling – “buy-i nyo ako, akon ini iya kamote – guwa kamo dira.”  Sa tudo niya nga waslik nabuy-an niya ang kamote and to make the long story short nagsarurot sila tanan paidalom.  The end of the story.

Ang leksiyon sining istorya amo sini – isa lamang ang kamunuan sang tanan nga kalautan diri sa kalibutan.  Kag ano ini – ang pamatasan sang tawo nga naga-insistir – akon ini, akon lang gid ini indi kamo magtandog sini, guwa kamo dira.

Ang mga katsila dumdum nila sila lang ang maalam nag-insistir – kami lang ang makagahum sa sinign pungsod, amon ini duta - kag ano ang natabo ang rebolusyon sang independencia.  Ang hapon nagdumdum nga para lang sa ila ang bilog nga asia – kag sila lang ang dapat nga maggahum kag makabenipisyo sini – kag ano ang natabo, world war II.  Ang mindanao luyag burawon sang mga muslim, ang mga kristianos luyag man magburaw sini para lamang sa ila kaugalingon kag ano ang nagakatabo, giyera, kidnap abusayaff, MILF asta subong waay sing kalubaran nga problema.  Siguro kadalagko sini nga mga ehemplo, makadto kita sa gamay gamay.  Akon ini puesto, ako gid iya ang dapat pili-on, ako gid iya ang takus sa sini nga puesto, kag ano ang natabo, baklanay boto bisan immoral ini, pamahog paagi sa goons bisan sala ini, sugid kag promisa bisan kabutigan ini.  Ang isa ka lalaki luyag mag-angkon ang isa ka babayi bisan indi pa ini magpasugot – nag-insistir gid, akon ka, akon ka, nang-rape, namatay, nang massacre.  Akon ini erensiya, akon ini kag akon lang ini duta, akon ini pagkabutang, akon ini puesto, ako lamang ang pamati-an gani hipos, kon ano luyag ko ako lang ang matuman, ako lang ang patihon, ako lang ang sakto – akon ini, this is mine, this is mine, what is yours is still mine, ako, ako, ako.  And what happened bisan ang mag-ulolotod nagairinaway, ang pagabyanay nagakaguba, ang mag-asawa nagabulagay, ang religious organizations nagahisaay, ang katilingban nagabinahinbahin – all because of this single word which we insist and insist upon – akon, mine, ako.  Isa lamang ang kawsa sang tanan nga kalautan sa sining kalibutan – ako, akon, mine, as if the whole world revolves around me, me me.

Subong ang Ginoo iya naga-isistir – unless you deny yourself – kalimti ang imo kaugalingon.  Aba indi ini mahapos – krus ini – mabug-at magpaumod, mabug-at ang mamati sa iban, kabug-at  mag-angkon nga basi sala ako kag sakto siya, kabug-at magtahod sa iban – pierdi gana ini, pierdi pilo ako, . 

Apang ang Ginoo naga-insistir – kalimti ang imo kaugalingon kay amo ini ang kamunuan sang paghidait, kamunuan sang kalinong, sang paghirupay kag maayo nga pagtamdanay.  Kalimti ang imo kaugalingon kay amo ini ang kamunuan sang aton pagbalay sang aton katilingban, sang aton mga BEC.  Kalimti ang imo kaugalingon – kita ninyo madamo ang nabuhat sang inyo parokya tungod kay may mga tawo diri nga kahibalo magkalimot sang ila kaugalingon, nga nagtan-aw indi lamang sang ila kaayuhan kundi sang katilingban, mga tawo nga nangin maalwan sa paghatag indi lamang sang ila manggad kundi sang ila kaugalingon, sang ila tinion kag talento para sa hilikuton sang Dios. 

Sang nagligad nagmeeting kami, sa pagkadugay waay gid sing may na resolbar, “Fr., siling sang isa, ano abi kay puro maalam.”  Ginsingganan ko sia “indi gid man guro maalam a, pero sigurado puro sila tanan dalok.” 

Isa lamang ang kawsa sang tanan nga kalautan sa sining kalibutan – ako, akon, mine. 

But Jesus is giving us another alternative, deny yourself – kalimti ang imo kaugalingon.