corpus christi - C

Subong ginasaulog naton ang kapiestahan sang Eukaristiya –ang ginatawag naton nga corpus Christi.  Ang orihinal nga piesta ginasaulog sa Holy Thursday – pero tungod kay gindudahan sang iban nga mga sekta ang presensiya sang Ginoo sa ostias, ang simbahan nagtukod sini nga piesta sa pagpamatuod sang presensiya ni Kristo sa Eukaristiya.  Kag ang importante nga pamangkot sa sini nga piesta amo sini:  Paano naton ginapadunggan ang presensiya ni kristo sa Eukaristiya ukon sa santos nga sakramento.

May isa anay ka pari didto sa Germany nga luyag manggarit-garit sa mga protestante nga waay nagatuo sa Eukaristiya.  Kada aga pagkatapos sang misa upod sa iya latar boy ginaprosesyon niya ang Santissimo kag didto gid siya naga-agi sa dalan sa diin ang tanan nga nagapuyo mga Protestante.  Ang mga protestante tungod kay waay sila may mahimo sa pari nagpaumod na lang.  Pero kada mag-agi ang pari ginasira sang tanan ang ila mga pwerta kag bentana hasta nga makalabay ang pari.  

Isa ka adlaw samtang nagalabay ang pari, may isa ka protestante nga indi na gid kaagwanta gani ginabrihan niya ang iya bintana kag hari yaw-yaw ang pari.  Ang pari tungod kay maisog man kag indi magpapierdi, waay ya bala ginpauyatan ang santissimo sa iya altar boy, ginkulokos ang iya sutana, ginsaka ang protestante kag gintapungol.  Pagkatapos ginhipid niya ang iya sutana, ginkuha ang santissimo sa altar boy kag nagpadayon sang iya prosesyon.

Waay ako nagasiling nga sundon naton ang pari sa baylo nagapamangkot ako sa inyo paano naton mapadunggan ang corpus Christi, ang lawas ni Kristo sa Eukaristiya?

Sang una nga mga panahon sang tion nga ginapangdakop kag ginapamatay ang mga kristianos amo ini sila magsimba.  Nagatipon sila katulad naton tagsa ka Domingo pero sang una bisan Domingo ini nga adlaw ordinary working day ini, gani aga pa sila, upod sa ila pamilya nagapanghimos sa pagsimba. . . sa hipos lamang.  Magalakat sila - ang iban naga-bitbit sing alat, props lang ini,  agud to nga kon husisa-on sila sang mga soldado sa dalanon rasonan lang nila nga magapaninda sila . . . agud to indi sila pagdakpon. 

Nagakadto sila sa Eukaristiya bisan pa ginahingabot sila.  Waay may nagapamahog sa ila nga kung indi sila magkadto sa pagsimba mapaimpierno sila sa baylo ginapahog sila kung magkadto sila.  Apang bisan amo sini ang tanan nagalakat sa pagsimba.  Aton iya subong pahogon ka agud nga magsimba ka.  Kung indi madala sa pahog singganon naton nga ang indi magsimba indi kaupod sa Jollibee – dalagan man dayon kag mag-ilis.  And this people go despite the threat.  Subong mamangkot kita ngaa ari kita diri subong.  Ina bala tungod kay nagapati kita nga sa aton pagtililipon ang Dios yara sa tunga naton ukon tungod kay ginhanot kita, ukon tungod kay basi mapaimpierno kita ukon basi kay tapos sini mapa-SM City kamo kag ang indi magsimba indi kaupod.

Sa ila pagtililipon nagakilalahay sila.  Kugn may kasaypanan ang isa sa isa nagapakig-uli sila anay, nagareconcile anay ang mga waay angabugnohanay agud nga mangin takus sila sang presensiya ni kristo sa eukaristiya.

Kita iya ano subong?  Ay kalaw-ay man na sang bayo ya man, hoy lantawa bala kung maglakat siya.  Ara na man ang ganghal ho dira gid siya sa tubang.  Imbes nga mangin-isa kita nagdugang tapat ang kalain sang buot naton kay sa aton pagtipon imbes nga mag-isa kita, nagasugod tapat kita sa pagpanglibak.  Pagtahod bala ini sa Eukaristiya?

Mga utod subong ginasaulog naton ang Corpus Christi kag gina-agda kita nga magtahod sa iya indi lamang paagi sa pagluhod kundi ilabi na gid paagi sa pagsaulog sang misa nga may nagakabagay nga disposiyon kag debosyon.  Kabay pa nga sa aton pagtahod sa Eukaristiya magtubo kita sa pagtahod sa iya presensiya indi lamang sa tinapay kundi sa tagsatagsa kay kita tanan lawas ni Kristo, kita tanan Corpus Christi.