santissima trinidad A - 1

Subong ginsaulog naton ang kapiestahan sang Santisima Trinidad kag sa sini nga kapiestahan ginakilala naton nga ang Dios nga aton ginatuohan isa, apang may tatlo ka persona:  ang Amay, ang Anak kag ang Espiritu Santo.  Siguro sa subong nga panahon daw waay na gid man kinahanglan nga i-explicar pa naton kon ngaa ang isa ka Dios may tatlo ka persona, ukon ngaa ang tatlo nangin isa.  Bahin na ini sang aton ginatuohan, kag ginakilala naton ini sa tagsa naton ka pagpanguros. 

Ining pagpanguros mga utod, gamay lamang ini nga simbolo.  Ginabuhat naton ini pila ka bes sa isa ka adlaw.  Gamay lamang ini nga simbolo sa bagay nga kon kaisa ginapatarasakan lamang naton ang pagbuhat sini, apang nagapakita ini sa aton nga ang tanan, nagasugod kag nagatapos sa ngalan sang Amay kag sang Anak kag sang Espiritu Santo.  Ini isa ka pagkilala nga ang isa ka Dios,  Amay, Anak kag Espiritu Santo, amo ang ginsugoran kag amo ang katapusan sang kabuhi, sa iya mga kamot ang tanan nagahulag kag nagakabuhi.  Paagi sa iya kita gintuga, paagi sa iya kita ginluwas kag paagi sa iya kita ginhatagan sang bag-o nga kabuhi.  Gamay ini nga simbolo apang amo ini ang kamunuan, ang pundasyon sang tanan naton nga ginatuohan.

Mga utod, sa nasiling ko kaina waay na gid man kita dapat patpaton diri kon ngaa ang isa nangin tatlo.  Ang importante sa sining pagtuo naton subong sa Dios nga Santisima Trinidad amo ang implikasyon sining pagtuo, ang iya kahulugan sa aton kabuhi, ang iya katumanan sa aton kabuhi.  Kay kon kaisa nagatuo lamang kita, nagaya-ob lamang kita, nagasimba lamang kita, apang ginakalimtan naton kon ano nga sahi sang pangabuhi ang nagakabagay sa akon subong tungod kay ako nagatuo, ako nagasimba, ako nagaya-ob sa Santisima Trinidad.  Mga utod sa pagabot naton sa langit ang Dios indi magpamangkot sa aton :  “Tyo Baldo abi recite pila ang Dios?”  “Isa ka tabungos.” bisan amo ina ang isabat mo baton man ina sa gihapon kay ang importante sa Ginuo amo nga masabat mo siya kon paano mo ginakbuhi ini nga pagtuo.  Nagatuo ikaw nga siya Dios, subong nagakabuhi ka bala subong nga may Dios ang kalibutan kag ang imo kabuhi?  Nagatuo ikaw nga ang Santisima Trinidad amo ang kamunuan, kag ang katapusan sang imo kabuhi, karon nagkabuhi bala ikaw subong nga siya gingikanan sini tanan kag utang mo ang tanan sa iya?  Nagkabuhi bala ikaw subong nga siya ang imo katapusan, siya ang imo ginapadulungan, siya ang imo tuyo ukon may ginapadulungan ka pa nga iban?  Kahapos magsiling nagatuo ako but we must remember that there is a wide chasm, a wide gap between what we say and what we do.  Ang pagtuo ginapamatud-an lamang sang kabuhi.

Tungod sining mga panghunahuna, mga utod, ang aton mga obispo nagpadala subong sang sulat pastoral para sa aton sa paguiya sa aton agud ining aton pagtuo sa Santisima Trinidad, nga siya ang Dios, siya ang kamunuan kag katapusan sang tanan, siya ang tag-iya sang kabuhi, mapamatud-an naton sa aton pagginawi.  Ini nga sulat pastoral isa ka comentario nahanugod sa sulat sang Santo Papa nga ginatiguluhan, Evangelium Vitae ukon sa binisaya ang ebanghelyo sang kabuhi.  Ini nga sulat nagapahayag sa aton nga “ang ebanghelyo sang kabuhi, ang pagpakamahal sang kabuhi, yara sa kaundan sang mensahe sang aton Ginuong Hesuskristo kag nagapanawagan siya sa aton tanan sa pagtrabaho agud matigayon naton nga ang  lubos nga pagtahud sa kabuhi sang tawo amo ang mangin sadsaran sang nabag-o nga sosyedad.”

Mga utod ini nga mensahe ginasulit sa aton subong tungod kay makita naton sa aton palibot ang mga pagpakanubo sang kabuhi sang  tawo.  Ano ini nga mga pagpakanubo sang kabuhi?  Ginlista ini sang mga obispo.  Una diri amo ang  pagpamatay sang mga lapsag sa taguangkan sang ila iloy ukon aborsyon nga sa subong nakalab-ot na sa 65 miliones sa tagsa ka tuig.  May ara man nga mga euthanasia ukon mercy killing sa diin ang mga tigulang na gid ukon ang mga nagamasakit sang malala nga balatian ginapamatay na lang.  Mabatian naton ini sa iban nga pungsod sang Europa kag recently sa bahin sang Australia nga nag-legalize sini.  Subong man yara ang pagpamatay nga wala sing kabangdanan, ang pagpakanubo sang kabuhi sang mga kababayinhan kag mga kabataan, ang kaimolon nga nagapakanubo sang dignidad sang tawo, ang pagpalapnag sang mentalidad batok sa kabuhi paagi sa pagsakdag sang pangulohan sang mga artipisyal nga pamaagi nga naga-upang sang pagbusong.  Ini tanan kakulang sang aton pagtahod sa kabuhi.  Ini tanan kakulang sa pagkilala nga ang Dios, ang Santisima Trinidad amo ang tag-iya sang kabuhi.  Ining mga pagpamigos sang kabuhi isa ka pagpamatok sa Dios nga amo ang kamunuan sang kabuhi kag siya ang nagahatag, nagatugot sini.  Ini nga mga pamatasan mga pagpamatok sa Dios nga amo ang katapusan sang kabuhi, ang indi pagkilala nga ang Dios lamang, ang makakuha, makapugong kag makabawi sini. 

Tungod sini ang aton mga ka-obispohan nagahangkat sa aton sa ngalan ni Kristo nga aton panindugan ining lakat sang paminsaron sang tawo.  Ang aton mga pastor nagahangkat sa aton nga aton pamatukan ining sahi sang mentalidad nga nagapatigayon sang kultura sang kamatayon.  Ang SantisimaTrinidad lamang ang tag-iya sining kabuhi, kag gani kon nagasiling kita, “nagatuo ako sa isa lamang ka Dios tatlo ka persona, Amay, Anak kag Espiritu Santo” dapat lamang nga panindugan naton ining mga pagpakanubo sang kabuhi sang tawo nga gintuga sang Dios.  Panumdumon naton mga utod that the issue here is the fact that this is fast becoming a mentality, a habit, a belief  that is becoming more and more acceptable and agreeable nga nagatugot sa aton sa paghampang kag pagpakanubo lamang sang kabuhi sang tawo.

Tungod sini ang mga kaobispohan nagtukod sang ulihi nga Domingo sang Mayo nga amo ang ginatawag nga National Day of Life sa pagpamatok sini nga mentalidad sang kamatayon kag sa pagbalik liwat sang pagpakamahal sang kabuhi kasubong sang pagpakamahal sang Dios sang kabuhi nga amo ang iya nga una nga dulot sa tawo nga iya ginahigugma.  Subong man ginatawag niya ang tanan sa pagkilala nga ang tagsa ka tawo gintuga sa imahen kag sa larawan sang Dios kag dira sa iya nagapuyo ang Santisima Trinidad, siya nangin buhi nga templo sang Dios.  Ginatawagan man sang mga obispo ilabi a gid ang tagsatagsa ka panimalay, ang mag-asawa nga dapat sila magkabuhi suno sa ginatudlo sang Simbahan nahanugod sa responsable nga pagplano sang panimalay nga bisan pa nagpili sila sanga maglikaw anay sa pagpangaanak tahuron gid nila sa gihapon ang kasuguan sang moralidad kag magpabilin sila nga bukas kag maalagaron sa kabuhi.  Bukas sila sa pagbaton kon ano man ang ginatugyan sang Dios nga kabuhi nga ila tatapon, patuboon kag himakasan.

Mga utod, ining akon ginsaysay sa inyo isa ka pamaagi nga makilala naton ang Dios, ang Santisima Trinidad nga Dios sang aton kabuhi, the God of our life, the God of life.  Paagi sini makasiling kita sa iya sing hugot sa aton taguipusuon, tampad sa aton ginasiling, kag ginapamatud-an sang aton kabuhi nga siya Dios, Dios sang akon kabuhi, ang Santisima Trinidad, Amay, Anak kag Espiritu Santo.