21st sun A - 1

Subong pagahambalan naton ang nahanungod sa mga ngalan.  Ano gid bala ang yara sa ngalan? - may duha ka kinaiya ang mga ngalan.

Una.  Sa layi sang simbahan indi kontani ini puede.  Importante ang ngalan.  Waay ini ginapamulotmulot sa mga sine, ukon ginapanugpon-nugpon. Ang ngalan naga-pahayag sang ginapaabot sang mga ginikanan sa ila bata - kon ano ang ila luyag nga madangtan sang bata, kon ano sia magdako, kag kon ano ang iya buhaton.  Amo ini ang una nga kinaiya sang ngalan, gani kabay pa nga kon diin man ninyo ginapamulot ang ngalan puloton ninyo tani sa mga mayo nga mga tawo.  Mas maayo pa gid kuntani nga ngalan sang mga Santos sa langit ang ial sangay.

Ikaduha.  May mga ginatawag kita nga bansag nga ginapangalan naton sa isa ka tawo.  Nabansagan sia nga libat tungod kay libat sia.  Nabansagan sia nga ceres tungod kay kadasig sa iya nga daw salakyan  Nabansagan - ngaa?  tungod kay isa ina sa mga kinaiya nga nakita sa sina nga tawo, kag ginhimo nga bahin sang iya ngalan.  Isa pa gid ini ka kinaiya sang ngalan - ang ngalan waay lamang nagapahayag sang ginapaabot sa sining bata, kundi nagapakita man ini sang iya kinaiya kag pamatasan.

Ngaa hagi ako pasilabot sang mga ngalan nga ini?

Tungod kay subong mabatian naton sa ebanghelyo nga si Simon ginhingalanan kag ginbansagan ni Kristo.  Gindugangan niya ang ngalan ni Simon sang Bato.  Simon bato.  Ngaa?  tungod kay amo ini ang pamatasan nga nakita ni Kristo kay Pedro, nga ang iya pagtuo bato, mabakod, indi mahuyang, indi madali marumpag.  Subong man ginhingalanan sia nga bato kay amo man ini ang ginapaabot sang Ginoo nga buhaton ni Simon - nga sia mangin bato - nga ang iya pagtuo mangin kabakod sang tanan nga mga tumuluo ni Kristo.

Si Jesus nagsiling anay kay Simon-Pedro - “Nagpangamuyo ako sa imo, Simon, nga ang imo pagtuo indi mag-untat.  Kag sa pagbalik mo, dapat mo pabakuron ang imo mga kautoran.” Si Simon bato - mabakod ang iya pagtuo kag gikan sa sining kabakod ginapaabot nga pabakuron man niya ang pagtuo sang iya kautoran.

Subong mangamuyo man kita nga bansagan kag hingalanan man kita sang Ginuo nga bato - Andy bato, Linda bato, Ed bato, Julie bato, Totoy bato - agud nga paagi sa pinasahi nga bugay sang Dios mapabakod ang aton pagtuo sa iya, kag tungod sini mapabakod man naton ang iban sa amo man nga pagtuo -  mapabakod naton ang aton pamilya, ang aton kaingod kag mga kaupod sa amo man nga pagtuo.

Subong mamangkot kita - mapabakod ko gid bala ayhan ang pagtuo sang akon isigkatawo - indi bala nga ang pagtuo isa ka personal nga desisyon?  Paano ko sila ginapabakod sa ila pagtuo?

Luyag ko ini ipaathag paagi sa akon duha ka experyensiya.

Una, antes ako nagsulod para sa pagkapari nakabatyag ako indi ako takus - waay waay ako, indi ako bagay sa sini nga panawagan kay ang ginapaabot ko nga pari amo nga waay gid ako sing dagta sang sala.  Isa ka bes gin-assign ako sa pagbulig sa retreat sang mga kaparian.  Sang tion na sang konfesyon nakita ko ang isa ka makatalandog nga eksena.  May pari nga nagapungko sa konfesionaryo kag nagapamati sang sala sang isa man ka pari nga nagaluhod.  Pagkatapos niya konfesar tumindog sia kag nagbaylohanay sila lugar - sia naman ang nagpungko kag ang isa naman ang nagluhod kag nagkonpesar.  Nakapanumdum ako - ano bala ang ginapaabot ko sa akon kaugalingon, nga mangin santo na ako.  Yari ang mga pari nga nagpuluti na ang ila buhok sa pagtuman sang ila katungdanan pero sa gihapon nagakonpesar, nagatinguha nga mangin himpit, nagapangayo sing patawad sa ila kapaltahan.”  Ang pagtuo kag katutum sang duha ka pari nagbakod sang akon pagtuo sa pagtawag sang Dios sa akon, sa pagpadayon bisan pa nga indi ako takus kag balaan.

Ikaduha nga halimbawa.  Kon kaisa indi kita kahibalo nga ang aton gali gamay nga pagtuo kag pagpaninguha sa pagbuhat sang aton katungdanan sa Dios nagapabakod man sang pagtuo sang iban.  Isa ka bes nagalakat lakat ako sa idalom.  May nagpalapit sa akon nga katekista nga nagsiling, “Padre luyag ko lang ihambal sa imo nga ako isa ka katekista sa isa ka parokya, kag kahapon gin-submit ko na ang akon resignation sa amon pari.  Kapoy na ako, natak-an na ako.  Luyag ko na mag-untat. Apang kaina nakita ko ikaw nga nagamisa bisan pa sang imo kahimtangan, - apang bisan amo sini nagamisa ka pa. Kag ako iya luyag mag-untat, luyag magpahuway.  Padre ginbalik ko kag ginbawi ang akon resignation letter.  Mabalik ako sa pagkakatekista.”

Mga utod kita ginapabakod sang pagtuo sang iban kag kita bisan kon kaisa wala kita kahibalo sini, nagapabakod man sang pagtuo sang iban.  Bato - gikan sa mabakod nga pagtuo ginapabakod naton ang pagtuo sang iban.  Madamo pa ini nga mga hitabo - nga tungod sang sakripisyo sang nanay, tungod sang pagkarelihiyoso sang tatay, tungod sang katutom sang isa ka empleyado sa gobierno, tungod sang kaukod sang isa ka istudyante - madamo ang naapektohan, madamo ang napabakod, madamo ang nangin matarung.  Ginapabakod naton ang isa kag isa.

Subong bilang balon naton pauli manumdum kita, paano ko mapabakod ang pagtuo sang akon kabataan, sang akon kaingod sang akon kaupod?  Paano ako mangin salandigan nga bato?