33rd sun C - 1

Nadumduman ko anay sang nagasalida pa sadto ang makahalawat-hawat nga istorya ni Marimar sa telebisyon nagmisa ako sa isa ka baryo.  Kadugay na sang hulat ko waay pa sa gihapon.  Sang ulihi sang nag-alabot na sila nag-umpisa ako sang misa pero siling ko tungod kay late kamo indi na ako magsermon kay may isa pa ako ka appointment.  Sa likod ayon sang gamay nga kapilya may nag-yuhum nga nagasiling, “ay salamat makaabot pa kita sang Marimar.”

Ano gid bala ang ato yadto sa Marimar sa bagay nga ang bilog nga pilipinas nagadulog anay kada gab-i agud makalantaw sini?   Ngaa nagayapayapa gid kita kay Marimar?  Hamak mo mga apat man ka bata nga nabunyagan ko ang ngalan nila Marimar.  Ano gid ang makita naton sa sadto nga palagua-on nga ginhimo didto sa Mexico pero nangin tam-an ka lapit sa aton balatyagon. Sugiran ko kamo.  Isa yadto ka istorya sang isa ka imol nga babayi nga sang pagbutaw niya isa ka adlaw natalupangdan niya nga manggaranon gali siya.  Isa yadto ka istorya sang isa ka babayi nga ginpasipalahan kag ginpigos, kag sang pagbugtaw niya isa ka adlaw natalupangdan niya nga makabalos gali siya kag manghingabot man sa tanan nga nagpigos sa iya.  Isa yadto ka istorya sang isa ka babayi nga waay sang poder waay sing kagamhanan kag isa ka adlaw nakabugtaw siya nga may poder na siya kag kagamhanan.

Katahum nga istorya, santo gid sa aton sentimiento kag sa aton ideal sa kabuhi.  Ngaa kahapos sang tanan.  Daw sa ano bala – imol ka apang pagkadason nga adlaw manggaranon ka na, big time.  Ginadaogdaog ka, apang pagkadason nga adlaw ginataha ka na sang tanan, big time ka.  Kanami manumdum nga sa uisa ka pitik sintas ang tanan mo nga ginahandum matuman dayon.  Sa seminario sa amon meeting kon kaisa tungod kay ang problema naangot tanan sa kwarta, inugsweldo, inugpakaayo, ipakaon – kon kaisa nami man magpanghakroy – maayo tani kon magdaog kita sa lotto.  Nami tuod no.  Taya ka lang, tapos tulog ka, dason nga adlaw milyonaryo ka na – solve ang problema.

Kasubong man sini ang experyensiya sang katilingban nga ginasulatan ni San Lukas kag sang katilingban ni Paulo sa ikaduha nga balasahon.  Nabudlayan na sila.  Ginahingabot sila, ginamaltratar sila.  San-o pa mag-abot si Kristo agud matapos ini tanan.  Ang mga taga-tesalonika iya sa ikaduha nga balasahon waay na gani nagtrabaho kag nagpangabudlay pa – pakuribong na lang sila kag magtangla sa langit, maghulat kay Kristo – san- pa magtawhay ang amon kabuhi?  Ti man siningganan sila ni San Pablo – ang indi mag-obra indi magkaon. 

Isa ka daku nga tentacion sang isa ka kristiano amo ang maghatag sang padali nga solusyon sa mga problema nga iya masugata.  Isa ka daku nga tentacion sa isa ka kristiano amo nga makakita siya sing madasig nga sabat sa iya problema, kag sa problema sang aton katilingban, nga pagbugtaw ya ara na dayon, areglado na ang tanan.  Imol ka, ah taya ka sa lotto, pagbugtaw mo milyonaryo ka na, ukon gusto mo pangawat ka, galing ilegal.  Kontra mo, kasablagan siya sa imo handum, gin-agawan ka niya parkingan, ah tiroha, patya, ipakuot,.  Kriminal siya, ah lethal injection, ipapatay sa gilayon.  Short-cut - pahapos.  Pero amo gid man bala ini ang solusyon?  Nagakabagay gid bala ini?  Si Kristo iya may lain nga panghunahuna.  Siling niya, sa inyo pagpakalig-on maluwas ninyo ang inyo kaugalingon – your patient endurance will win you your life.

Si Thomas Edison ang inventor sang bumbilya nga ginagamit naton sa pagpasanag sang kadulom sa aton puloy-an kag mga dalanon nagsiling anay Genius is 1 percent inspiration and 99 percent perspiration.  Ang kaalam, ang success isa ka porcineto nga inspirasyon, pero 99 porciento nga pabalhas kag paninguha.   Basi ini sa iya experyensiya tungod kay ginasiling nga diesyocho mil ka experimento ang iya na-obra hasta nga naperfect niya ang bombilya – 18,000 ka palpak nga bobilya hasta nga nakahimo gid man siya sang sakto. Genius is 1 percent inspiration and 99 percent perspiration.  Ugaling kon kaisa dumdum naton ang suli amo ang matuod – 99 percent inspiritation, kag 1 percent lang nga perspiration.  Ngaa matuon ka pa kung mabayran mo man lang.  Ngaa mangabudlay ka pa linya kag hulat, kon puede mo man lang to mabayran agud to unahon ka ukon palutson ikaw.  Kon kaisa gani ginapabugal pa naton ini – ah binayran ko lang lusot mo, dasig ah.  Pero amo gid man bala ini ang sakto kag nagakabagay.  Diin na ang ginatawag naton nga sipag at tiyaga – sipag at tiyaga – mga importante nga pamatasan sang isa ka pilipino kag kristiano.

Lantawa bala sa palibot naton, makabuhat bala kamo sining matahum nga simbahan kon waay kamo tanan nagpabalhas kag nagpangabudlay.  Subong mapatindog naman kamo sang inyo nga BEC – mapatindog bala naton ang aton mga BECs kon waay sa aton luyag magpangabudlay?  Amo ini ang siling nila – kung walang tiyaga walang linaga – kung kay san pablo pa those who do not work should not eat.

Mga utod there are no easy solutions to life – indi naton madala ang tanan sa pahapos lamang – your patient endurance will win you your life.