33rd sun A - 2

Ginasiling nga si Beethoven, ang bantog kag composer, indi kahibalo magpakigbagay sa tawo sa bagay nga wala sia gawa nagapakig-impon sa iban, kag kon may mga social function, husto lang sia magpanimuko sa kilid kay indi sia kahibalo magpakigsugilanon.  One time, ang anak sang iya suod nga abyan napatay.  Iya sia sa gilayon ginkadtuan sa tuyo kontani nga mapasulhay niya ang balatyagon sang iya abyan sa tunga sang iya kasubo kag pagbakho.  Apang pag-abot niya sa balay sang iya abyan husto man lang sia magpungko sa kilid tungod indi man sia kahibalo kon ano ang iya ihambal sa sini nga okasyon.  Sang ulihi nakita niya ang isa ka piano, tumindog sia kag nagpungko didto, kag samtang nagahilibion ang iya abyan naghimo sia sing bag-o nga komposisyon didto mismo kag gintukar ang isa sa mga pinakamatahum nga pisa, isa sa pinakamatahum niya nga elegy nga iya na-compose para sa kamatayon sang anak sang iya abyan.

Indi sia kahibalo kon ano ang nagakadapat niya ihambal.  Wala sia sang mga tinaga nga makasulhay.  Ang indi niya mahambal iya ginpungkoan sa piano kag gintukar.

Klaro sa aton ebanghelyo nga ang isa kag isa may nagakalain-lain nga talento, nagakalain-lain nga kinaiya kag expertise.  Indi na naton ma question ina.  Ang yara sa iban posible nga wala ina sa imo.  Ang yara sa imo posible nga wala ina sa iban.  Ang mahimo sang iban posible indi mo ina mahimo.  Ang mahimo mo posible nga indi mahimo sang iban.  Ang tagsa-tagsa may kinalain. 

Symbolically sa ebanghelyo ginapakita sa aton nga ang isa may lima ka libo, ang isa may duha ka libo, ang isa pa gid may isa ka libo.  Apang bisan lain-lain ang kinaiya kag duna nga kaalam sang tagsa-tagsa, may isa ka butang ukon capacidad nga yara sa aton palareho.  Kag ano ina – effort.  We may not be equal in talent but we can be equal in our efforts.  And this is the thing that is demanded from us by God. 

Si Beethoven isa ka social moron, indi sia kahibalo maghalobilo, isa sia ka disaster when it comes to speaking and finding the right words for the right occasion, but what he could not express in words, he expressed beautifully in music.  Gingamit niya ang iya kinaiya agod sia makahatag sing kasulhay.  Ang talento lain, apang ang effort, ang pagpaninguha posible nga mangin palareho.

Sang nagligad nga semana may nagkadto sa akon nga pari nga nagahingyo sa akon nga bisitahan man si Fr. Diony kay ara sia sa ICU nga nagatagumatayon.  Ti siling niya bolano mo na sia, halin kamo sa pareho nga banwa, maayo gid tani nga sugilanonon mo sia for the last time.  Hay kon amo ini ang istoryahan ma-krisis gid ako.  Indi gid ako kahibalo sini, kag ano gid abi isiling ko - good luck, good health and God bless you, kay ara sia sa ICU?  Bisan ang mga upod ko diri nga pari nagareklamo sa akon kay ahaw text-back indi ako makahimo.  Kon may kinahanglan ka masabat ko ina sa text, pero kon nagapangamusta ka man lang, ukon nagapadala sang text kay wala ikaw himuon nga mapuslanon, ti indi ako kahibalo magsabat sina nga sahi  sang text.  Anyway siling ko sa pari regarding kay Fr. Diony, ikaw lang to kadto a, indi ako kahibalo.  Pero kon mapatay na sia siguradoha nga ako ang mapa-ilis sa iya kag obrahan ko pa sia sing prayer vigil.  Ti anhon ko kay amo lang na ya bal-an ko.

Accepting who we are and what we have is very important in the message of our gospel today.  And equally important is taking responsibility and being accountable for what we are and what we have.  We may not be the best communicator, or the best consoler, or the best singer, or the best social host, pero I can be the best sa mga butang nga yara sa akon.  We may not be equal in talent, and I am not jealous with what you have, apang we can be the best sa mga butang kag capacidad nga yara sa aton.  This is what I mean by taking responsibility for what we have and what we are and being accountable for these.

This is one of our problems in this our parish.  Kabudlay mangita tawo para sa mga nagakalain-lain nga mga minister sa aton mga barangay.  Kontento na kita nga serbisyohan pero kon kita na gani ang ginatawag nga mag-serbisyo kag mag-alagad damo na pang-alang-alang, damo na balibad, damo na rason. 

Dumdomon naton nga yara sa tagsa-tagsa ang nagakalain-lain nga mga dulot nga ginbugay sang Dios sa aton kag kita may salabton sa iya kon paano naton ina gingamit, kon paano naton ina ginpatubo, kon paano naton ina gin-usar sa pag-alagad sa aton isigkatawo. 

Sa katapusan, ang Dios naghatag pa gid sa aton sang makabig naton nga pinakadaku nga dulot – that gift is Jesus in all of us, the gift of baptism, the gift of faith, ang dulot nga kita Kristiano, mga tumuluo, that gift which is the church.  Ginakilala bala naton ini nga dulot nga gintugyan sa aton pagtatap?  Ginakabig bala naton ang aton espiritwal nga kabuhi nga isa ka katungdanan nga dapat tatapon, dapat saguron, dapat patubuon?  Ginakabig bala naton ini nga katungdanan sa diin kita tanan may salabton?  Do we take care of our spiritual gifts as much as we care and develop our material and human gifts?  Indi kita imol, indi kita makasiling nga kita kulang.  Kon panumdumon naton kon may kulang gid man kita as individuals, ukon bilang panimalay ukon katilingban, ang kulang lang gid indi kay ang dulot kundi ang pagpaninguha – amo gid lang ina ang kulang sa aton, ang pagpaninguha.