27th sun C - 1

Ining aton ebanghelyo subong luyag ko pamalandongan angot sa akon personal nga pangamuyo sa Ginuo sa sulod sang malawig nga mga tinuig, nga dugangan man Niya ang akon pagtuo, kag ini isa man ka pagpahayag sang akon personal nga pagpaninguha agud nga madugangdugangan ko man ang akon pagtuo.  Ini may tinutuyo indi sa pagbutang sa akon sa ibabaw sang pedestal nga mangin sulondan ninyo, kay sa pagkamatuod mas madamo ang akon kapaltahan sang sa inyo.  Sa baylo ini may tinutuyo nga kamo tanan, kita tanan, mapadumdum sang aton personal nga pangamuyo sa Dios kag sang aton pagpaninguha nga madugangan pa gid ang aton pagtuo.  In sharing my personal struggle with my faith I have the intention of reminding you of your own struggle and to make the prayer of the disciples to Jesus your own personal prayer and struggle, that He will increase our faith.  Duha lamang ini ka punto.

Una sa punto sa diin ang Ginoo nagsiling:  ‘kon may pagtuo kamo subong ka daku sang binhi sang mostasa, makasiling kamo sa sini nga kahoy nga sikomoro, gabuta ang inyo mga gamot kag itanom ang inyo kaugalingon sa dagat.”  Ang sikomoro nga kahoy mga utod, makatulad naton sa lunok, dalagko ang mga gamot sa bagay nga bisan ang mabaskog nga hangin kag mga bagyo indi makatumba sini tungod kay mabakod ang gamot.  Apang siling sang Ginuo kon may pagtuo kita kasubong kagamay sang mostasa, magabot naton ini. 

Siguro ang iban sa aton makasiling “baw kon may katulad lang ako sini nga pagtuo damo gid ang maobra ko - hamak mo daw nagabuhat ka lang sang magic, ang exams mapasaran ko ina bisan waay ako nagatuon, mangin maayo ang akon negosyo, makapangayo ako sa Ginuo sang awto, mangin maayo na ako sa akon pangabuhi - daw magic lang ang tanan.” 

Sang una amo man ini ang panumduman ko.  Daw katulad bala sang istorya nga natabo sa isa ka bata nga sang isa ka gabi nabuka niya ang baso, gani ginsingganan siya sang iya iloy - “toto, kuhaa ang silhig sa guwa sang balay kag silhiga ina.”  Ang bata nagsabat “nay indi ko ya, kadulom didto sa guwa kag nahadlok ako.”  Gani ginpasalig siya sang iya nanay ‘Toto kinahanglan may pagtuo ka, indi ka magkahadlok kay ara dira si Jesus sa guwa.”  Gani ang bata nga kuno nagtubo ang iya pagtuo naglingling sa pwertahan kag nagsinggit, “Jesus kong ara ka dira sa guwa, palihog dal-a ang silhig diri sa sulod.”  

Mga utod sang una amo man ako sini.  Nangin hugot gid ang akon pagtuo sa bagay nga kon kaisa nagasiling ako, buwas makalumbayag na ako.  Sa pagkalawat ko hugot ang pagtuo ko nga kon matandog ko ang ostias makatumbotumbo na ako.  Kon makakompesar ako makuha ang sakit sang akon tiil kag maka-ballroom dancing na ako.  Sa pagkamatuod amo ini kadaku sang akon pagtuo apang sa masubo nga palad waay pa ako hasta subong nakalumbayag kag nakaballroom dancing.  Nagaexpectar ako nga ang akon pagtuo mangin magic para sa akon, magapahapos snag akon kabuhi, magakuha sang akon kasakit, apang sa masubo nga palad waay gid ini natabo.  Sang ulihi ko na lang natalupangdan nga ang akon pagtuo imbes nga magkuha sang akon sakit, naghatag gali ini sa akon sing kaisog sa pagbaton sini.  Ang akon pagtuo, imbes nga mangin magic nga magdula sang akon kabudlayan, naghimo sa akon nga maisog sa pagpaninguha sa pagbuhat sang akon katungdanan bisan amo sini ang akon kahimtangan.  Ang akon pagtuo imbes nga magkuha sang akon masakit, naghatag sa akon sing pagpailub ukon patience sa paghulat, sa pagbatas kag sa pagbaton sang akon kahimtangan.  Indi gali magic ang dala sang pagtuo, indi gali duladula, kundi kabakod.  gani tungod sang pagtuo indi nangin imposible ang pagtrabaho sa Ginuo bisan sa sining kahimtangan.

Siguro mas mahangpan naton ini sa isa ka istorya:  Ang anak ni Pater nga taga-Mindanao tungod sang aksidente nabungguan sang motorciclo kag napatay.  Apang waay niya ini gindala sa pulis ukon ginpapriso ang nagbunggo sang iya anak.  Ginpamangkot siya kon ngaa:  Siling ni Pater:  “Ining pagpriso ukon pagkiha sa nagbunggo sang akon anak indi makapabalik sa iya gikan sa kamatayon, kag ngaa pabayaron ko ang pareho ko man ka pobre nga panimalay?”  Gani ang pamilya sang nagbunggo nagbayad lamang sa gasto para sa lubong.  Apang ginpatawag ni Pater ang nagbunggo sang iya anak kag ginsingganan, “Ginpatay mo ang akon anak.  Gani subong ikaw ang magabulos sa iya.  Tanan nga paghigugma nga ginbuhos ko sa anak ko sang una ihatag ko sa imo, kay sugod subong ikaw na ang mangin akon anak, kag ako mangin imo amay.”  Mga utod ang tawo lamang nga may paagtuo ang may kaisog sa pagsiling sini.

Gani sa akon experyensiya, sa malawig nga pagpaninguha ko nga magtubo ang akon pagtuo, natalupangdan ko nga ining pagtuo indi gali magic nga makadala sang matawhay nga pangabuhi, awto, manggad, maayo nga grades, matin-ad nga negosyo.  May mas importante pa gali nga mga butang - ang espiritual - ang pagpailub, ang pagpatawad, ang pagbatas, ang pagpacinecia, ang kaluoy nga bunga sang mabakod nga pagtuo.  Gabay pa nga amo man ini ang ipaabot naton sa aton pagpangamuyo, “Ginuo dugangi ang amon patuo.”

Ikaduha nga punto, nag siling ang Ginuo paagi sa isa ka istorya  nga “mga suloguon man lang kita, gintuman lamang naton ang aton katungdanan.”  Ang punto sang aton Ginuo diri nga indi kita magpaabot nga padyaan kita tungod sang aton maayong binuhatan.  Katungdanan naton nga magbuhat sang ginapabuhat sa aton, katungdanan naton ang pagbuhat sing maayo - indi ini extra labor, indi ini overtime sa trabaho, kundi bahin ini tanan sang aton katungdanan.

Natabo man ini anay sa akon.  Sang gin-abot ako sang akon kasakit nagpamasol man ako sa Ginuo.  Ginpresentar ko sa iya ang akon report card.  Nangin maayo ako, nangin mapisan ako para sa iya.  Bisan waay ako ginabayran naglatas ako sa kabukiran sa pagtudlo sang mga tawo sang iya pulong, apang ngaa ginhatag niya ini sa akon, ngaa amo sini ang akon nadangtan.  I felt all the while that I don’t deserve this.  Ngaa abi paantuson niya ako.  Nagsunggod ako, nagpamasol ako, nagpanumboy ako sa Dios bangod kay nagadumdum ako nga tungod sang akon gin-obra sa iya nagakabagay lang nga padyaan niya ako, indi kay hatagan sining akon ginabatyag.  Siguro iban sa aton some way, somehow, nakabatyag man sini.  Palasimba ka, pala-nobena ka, miembro ikaw sang religious organizations, nagtrabaho ikaw sa simbahan, nagatithing ikaw,  gani kon mag-abot ang problema, mamangkot kita, “ngaa amo sini ang ginbalos nimo sa akon Ginuo.”  Apang ang Ginuo nagasiling sa aton “You are not entitled for a reward.  You are just doing what you ought to do.  You are just servants.” Diri ko natalupangdan nga ang Dios waay sing utang sa akon - kundi ang tanna utang ko sa iya.

Naanad kita nga padyaan sa tanan naton nga maayo nga binuhatan - halin sang gamay kita nagbakabaka kita agud nga mangin honor roll kita, mangin best player kita.  Halin sang gamay kita ginpa-anad kita nga maghangad sang mga padya tungod sang aton mga binuhatan, ano pa bisan sa aton buluhaton relioso nagapaabot kita sini - gani nagapangita kita sing recognition bisan na gid lang isulat ang aton ngalan sa pader sang simbahan, nagapaabot kita sang mga plaque of appreciation sa bagay nga kon waay ini, nagamalagana man ang aton pagtrabaho.

Apang ang Ginuo iya lain - himu-a lang ang imo masarangan kag indi ka magpaabot nga padyaan.  Kita mga waay pulos nga mga sulugo-on.

Pamalangdongon naton ini.