27t sun A - 2

Sa palaangiran ni Jesus sa aton ebanghelyo ginapahayag sa aton kon paano ang Dios magtratar sa aton.  How does God deal with us?  Apat ka punto sa istorya sang aton Ginoo.

Una nga bahin sang istorya - may isa ka tag-iya sang talamnan nga nagpatanom sang ubas. Iya ini ginkudalan palibot, nagpakutkot sia sing buho para pulogaan sang ubas kag nagpatindog sia sing mataas nga balantayan.  

Ang una nga mga dinalan nagapakita nga ginhanda sang Dios ang tanan – we were not as it were with nothing – sa pagkamatuod we had everything kay sia maalwan kag matinatapon.  Ginhatag niya ang kalibutan, ginhatagan kita sing kakahuyan, sang maayo kag mapinatubason nga duta, gintagaan kita sing adlaw, sang bulan, sang mga kasapatan, sang dagat, sang mga nagakalainlain nga isda.  Labaw diri ginhatagan niya kita sing kaalam, sing ihibalo agod mapatahum naton ang iya ginsugdan, kaalam nga nagpahapos sang aton palangabuhian kag nagpaanyag pa gid sang aton kabuhi.  Sa aton panimalay ginhatagan niya kita sang aton kinahanglanon, sa kalabanan sa aton ginhatagan kita sing ginikanan nga mapisan kag mainunungon. Sa kalabanan sa aton, siguro indi gid man damo gid nga mga pagkabutan, pero bastante agod magkabuhi kita sing nagakaigo. Sa aton pungsod ginhatag sa aton ang demokrasya kag kahilwayan.  Para sa aton kalag ginhatag niya sa aton ang pagtuo, ang pagka-relihiyoso naton as a people, ginhatag niya ang simbahan, makasimba kita, makapangamuyo kita nga wala sing sablag, ginhatag niya ang mga sakramento nga nagasagod sang aton kalag.

Ang Dios maalwan – katulad sang talamnan sang ubas ginhatag niya, ginhanda niya ang tanan para sa aton.  Amo ini ang una – ang Dios nagtratar sa aton sing may kaalwan.  He is provident.

Ikaduha, sa istorya ni Jesus iya ginsaysay nga ining talamnan ginpaagsahan sang tag-iya kag sia nagpanglakaton.  Ano ang kahulugan sini?  Pagkatapos nga ginhanda sang Ginoo ang tanan, iya ini ginpaagsahan – iya gintugyan sa aton nga aton tatapon agod ini magpamunga.  Ang Dios masinaligon.  Ginsaligan niya kita nga aton ini tatapon kag himuon nga mangin mabinungahon – amo ini ang kontrata – tatapon kag himuon nga mangin mabinungahon.  Wala niya kita ginabantayan nga daw pulis nga kon magsala ka pitohan ka dayon kag pabayaron sang multa.  Wala niya kita ginasurveilance camera nga magsala hulag naton kilatan kita sa gilaton, kay kon amo sina ang Dios siguro wala gid bilin sa aton subong.  Ang Dios masinaligon.  Kon bala kita nangin masaligan, sabton ina sang tagsa-tagsa.  Ano ang ginbuhat naton sa aton palibot?  Indi pagbasula ang Tag-iya sang talamnan kon nagbaha kay laban-laban kita man ang kawsa sina.  Kon gintatap naton ini ukon ginabusaran, aton na ina kahimu-an.  The Lord is too trusting towards us.  Gintugyan niya sa aton ining aton pungsod.  Ano ang ginbuhat naton?  Sin-o ang ginpadumala naton sini?  Ano na karon ang kahimtangan sang aton kalag.  Ginasagod naton bala ina sang mga sakramento?  Ginasalig niya ina sa imo nga tatapon kag himuon nga mabinungahon.

Ikatlo, sang tion na sa pagpamupo sang ubas, ginpadala niya ang iya mga suloguon sa mga agsador sa pagkuha sang iya parti. Apang gindakop sila: ang isa ginbunal nila, ginpatay ang isa, kag ang isa pa gid ginbato nila. Liwat iya ginpakadto ang iban niya nga mga suloguon.  Ano ang kahulugan sini?  God is patient towards us.  Sia mapinasensyahon.  Kahibalo sia magpatawad.  Makapila kita niya ginahatagan sing kahigayunan.  Second chance, third chance, fourth chance.  Dumdoma ang ginhambal sang kasulatan – the patience of God is directed towards our salvation.  Kon magkonpesar kita, kita ginapatawad.  Kon maghinulsol kita sang aton mga sala iya kita ginabaton liwat.  God is patient.

Ikap-at - "Karon, kon mag-abot ang tag-iya sang talamnan, ano ang iya himuon sa sadtong mga agsador?"  Nagsabat sila, "Pamatyon gid niya ining malain nga mga tawo nga wala sing luoyluoy, kag ipaagsa niya ang iya talamnan sa iban nga mga agsador nga magahatag sa iya sang iya parti sa tagsa ka patubas."  Ano ang kahulugan sini?  May hustisya ang Dios.  Magaabot ang tion nga manukot na ang tag-iya sang iya bahin.  Nangin mabinungahon ka bala? Paano mo gin-usar ang kaayo nga ginhatag sang Dios?  Nagnangin mapinasensyahon sia sing madugay na, pero magaabot ang tion nga manukot na sia.  Sa Dios may hustisya.  Sa katapusan sang aton kabuhi, may timbangan.  Siguro sa sining kalibutan nakalusot kita sa hustisya sang juez nga sarang mabayran, siguro nakalusot kita sa pulis nga nagatalikod, ukon nangawat kita nga wala nadakpan.  Apang sa aton kamatayon magaatubang kita sa juez nga indi mabayran kag indi malutsan.  In the end there is justice in God.

Subong ginpamalandongan naton ang pagtratar sang Dios sa aton.  Una sia isa ka matinatapon nga Dios nga naghatag sa aton sing tanan nga aton kinahanglan nga magmangin mabinungahon.  Ikaduha iya kita ginsaligan.  Hilway kita sa pagbuhat sang aton luyag.  God is making us exercise our responsibility, nga mabuhat naton ang aton katungdanan sa iya nga tag-iya sang tanan.  Ikatlo, kon kita nakasala, sia mapinsensiahon.  Nagahatag sia sing kahigayunan sa aton agod nga matadlong naton ang aton banas kag mahatag naton ang nagakaigo sa iya nga tag-iya, ang iya bahin sang patubas.  Kag ikaapat – sa Dios may hustisya.  Sa duta makapalagyo kita, makalusot kita, makapanago kita.  Apang sa atubang sang Dios may hustisya.