16th sun B - 1

Si Papa Juan XXIII nagpa-obra anay sang isa ka building didto sa Vatican.  Ginpresentar ang plano sa iya.  Ginalantaw ini sang Santo Papa kag pagkatapos sa pila ka minutos ginsulatan niya sa kilid sang plano, non sumus angeli nga kon sayuron indi kami mga angheles, kag binalik ang plano sa mga architect kag ginpaliwat sa ila.  Ang mga architect nagkinarankaran kay luwas nga indi luyag ang Santo Papa sang ila plano indi sila kahibalo kon ano ang iya ginareklamo.  Ang ila lamang makita nga instructions sa ila amo ang mga tinaga sa Latin non sumus angeli, indi kami mga anghel.  Ginbusisi nila ang plano, ginhusisa liwat, nagdebate sila, nagbinaisay sila, pero indi sila maka-agree kon ano gid bala ang diperensya kag kon ano ang ginareklamo sang Santo papa.  Sang ulihi may isa ka architect nga lantaw liwat sang plano kag sa hinali may nasiplatan sia nga indi sakto.  Wala sing banyo ang building.  Non sumus angeli, indi kami mga anghel, nagapangihi kami – diin kami mangihi?

Sang nagligad nga semana ang mga gintuton-an ginpadala sang Ginoo sa pagdala sang maayong balita sa mga nagakalain-lain nga lugar.  Sila magaayo sang mga nagamasakit, magatabog sang mga yawa kag magabantala sang maayong balita.  Karon nga Domingo mabasahan na naton ang ila pagbalik pagkatapos sadtong panglugayawon sa pagbantala sa ebanghelyo kag madamo sila nga mga inugsugid sa iya nahanungod sa ila.  On his part ang Ginoo nakamutik nga kapoy na sila kag gani ginsingganan niya sila, "Dali, masaylo kita sa isa ka duog nga kitahanon lang agod makapahuway-huway kamo."  Ngaa, makapahuway-huway kamo?  Kay indi kamo si superman, indi kamo si darna nga waay ginakapoy.  Non somos angeli, indi kami mga anghel.

May kaupod anay kami nga pari nga si Fr. Vanheit,  Ginatawag sia namon ang carabao sang Dios tungod sang iya kapisan.  Halin sa ospital nga kon kaisa ginapukaw ka pa sa tungang gab-i ukon sa kaagahon, malumpat pa na sia sa Sta. Maria, lumpat naman sia sa St. Clement’s sa pagpakonpesar.  Daw carabao ka wala untat ang imo obra.  Pero one time sang nag-leave sia sa pagbakasyon nagsiling sia “ang carabao sang Ginoo mapahuway anay kay bisan gani ang matuod nga carabao may tiempo pa nga magpahulom-hulom sa turugban.”  We are not angels.  We need rest.  Kag amo ina ang rason sang inyo Domingo, kag amo ina ang rason sang amon Lunes. 

Si Tomas Cahill may libro nga ginatiguluhan, the gift of the jews.  Sa sina nga libro ginsaysay niya nga ang mga Hudiyo ginmanduan sang Dios nga magpa-in sang isa ka adlaw sa pagpahuway.  Waay lang sila ginsingganan nga magpahuway.  Ginamandaran sila nga magpahuway kag ang mag-violate sina, ang mag-obra sa sina nga adlaw makahimo sang sala.  This is unprecedented tungod kay antes sang mga Hudiyo wala gid sang mandar nga kasubong sina.  Didto gid lang sa bukid sang Sinai nga nagsugod ining pinasahi nga mandar nga magpa-in sang isa ka adlaw sa pagpahuway.  Ginpahayag ni Tomas Cahill nga bahin ini sang pagkilala sang mga Hudiyo nga sila na hilway.  Sa sulod sang madamo nga mga tinuig they have been slaves to Egypt kag sila nag-obra kag nagbakabaka adlaw-adlaw.  Sa pagsaulog sang ila kahilwayan may isa ka adlaw nga ginpa-in sa pagpahuway.  Pagkilala ini nga kinahanglan sila sa pag-obra agod nga sila mabuhi.  Obra.  Indi magtinamad.  In fact si San Pablo nagsiling, ang waay naga-obra indi pagpakan-a.  Apang ang pagpahuway sa isa ka adlaw isa man ka pagkilala nga kita hilway, nga kita indi ulipon kag wala nagapa-ulipon sa aton trabaho, nga wala kita nagapa-ulipon sa kwarta kag sa aton makita sa sina nga adlaw.  Yes we need to earn in order to live but we should not equate our living to earning.  Hilway kita kag indi mga ulipon.

Sa ikaduha nga bahin sang aton ebanghelyo makita naton nga bisan naglakat na sila kag magpanago, ginlagas pa sila sa gihapon sang mga tawo.  Kag sang pagkakita ni Jesus sa ila, naluoy gid sia sa ila.  Gani gintipon niya sila kag gintudluan sang madamo nga mga butang. 

Ini isa man ka pagkilala nga sa sining pagpahuway kinahanglanon man nga sagudon naton ang aton kalag.  Indi man lang kita lawas, wala lamang kita nagakinahanglan sang bugas kag sud-an, indi lang hiligi, atop, ding-ding, kag puloy-an.  Non sumus angeli, kon sayuron tawo kita nga may lawas kag kalag.  Indi lang lawas.  May kalag kita, nahimo man kita sa espiritu.  May kinahanglanon kita nga materyal kag importante ina, pero may kinahanglanon man kita nga espiritwal kag importante man ina.  Kag amo man ini ang isa sa mga importante nga aton ginasagod sa adlaw sang pagpahuway.

Gani indi kita malipat sa comentaryo ni Papa Juan XXIII.  Non somos angeli.  Indi kita mga anghel.  Kinhanglan naton ang pagpahuway sing makadali kag indi magpaulipon sa trabaho kag sa kasakoon sang kalibutan.  Non sumus angeli, tawo kita nga may lawas kag kalag.  Kon nagakinahglan ang aton lawas sang pagkaon ang aton espiritu nagakinahanglan man.  So when we say, take care of yourself, maghalong ka, remember your are flesh and spirit, take care of your bodies, take care of your soul.