8th sun B - 1

Once upon a time may isa anay ka monasteryo sa diin nagapuyo ang isa ka bantug kag balaan nga monghe.  Ini nga monasteryo isa ka mapinangamuyuon nga katilingban kag ini nga monghe amo ang huwaran sining matutom kag madalom nga pangamuyo.  Isa ka adlaw samtang nagapangamuyo ini nga monghe ang kuring sang monasteryo nagdisturbo sa iya sa iya pagpangadi samtang ini nagatabo-tabok sa templo sa diin sia nagapangamuyo.    Gani ining balaan nga monghe nagtindog kag ginhidtan ang kuring sa isa ka haligi agod ini na ini magdisturbo sa luyag magpangadi sa templo.  Pagkatapos nga sia makapangamuyo nagtindog sia kag ginbuy-an naman niya ang kuring.  Gani, amo ini ang ginbuhat niya adlaw-adlaw.  Antes sia magsugod sa pagpangadi ginahigtan niya anay ang kuring kag ugaling magsugod sa pagpangamuyo.  Kag pagkatapos niya pangadi buy-an naman niya ang kuring. Kada adlaw, amo ini ang iya ginabuhat kag naglabot ini sa malawig nga mga tinuig.  Antes sila magpangadi may isa ka monghe nga may kasubong nga responsabilidad – ang katungdanan sa paghigot sang kuring kag pagbuhi sini pagkatapos sang pangadi. 

Sang ulihi napatay ang balaan nga monghe  apang ang kuring padayon nga ginahigot antes sang pangamuyo sang mga monghe.  Pagkatapos sang mga tinuig ang kuring napatay.  Gani ang mga monghe nga nabilin, tungod kay naanad na sila sini, nagpangita naman sang bag-o nga kuring agod may ihigot sila antes sang ila pangamuyo.  Subong indi na sila ka pangamuyo kon wala sang kuring kag kon wala saing may mahigot nga kuring.  Kag tubtob subong antes sila mangadi nagahigot gid sila sang kuring kag nahimo na ini nga tradisyon.  Apang nalimtan na nila ang tuyo sang balaan nga monghe sa iya pagsugod sa paghigot sang kuring sang monasteryo.  Nalimtan na nila nga ang tuod nga rason kon ngaa ginahigtan ang kuring amo nga ini nagasabad sa ila pangamuyo.  Apang subong indi na sila makapangamuyo kon waay sing kuring nga nahigtan.

May mga pamatasan kita nga matawag naton nga naandan naton naton nga ginabuhat tungod kay amo na ina ang namat-an naton nga buhaton halin pa sang una bisan waay na naton nahangpan kon ngaa ginabuhat ini. 

May isa anay ka babayi nga kada luto niya sang isa ka putahi sang manok ginalihapan kag ginabuhinan niya ang pecho antes isulod ini sa oven.  Pinamangkot sia kon ngaa.  Ang sabat niya, “amo man ini ang ginabuhat ni nanay halin pa sang una.”  Ngaa?   Ambot, basta halin pa na sang una amo na ina. 

Sang ulihi pinamangkot niya si nanay niya kon ngaa.  Kag si nanay niya nagsiling, bal-an mo indi kaigo ang manok sa gamay ko nga oven sang una.” 

Mga utod, umo ini ang malain kon indi naton maintendihan ang rason sang mga naandan na naton nga buhaton - lihapan kag buhinanan lang naton ang manok bisan daku daku na ang aton oven.

Amo ini ang natabo sa mga Fariseo kag sang gintuton-an ni Juan.  Nagapuasa sila.  Ang mga katigulangan sang mga Hudiyo nagpuasa tungod kay ginapaabot nila ang Mesias.  Apang waay na nila ina nadumduman.  Sa tion ni Jesus basta na lang nga nagapuasa sila kay amo na ina ang ila namat-an.  Gani bisan ara na ang Mesias, nagapuasa man sila sa gihapon tungod kay amo na ina ang ila naandan halin pa sang una bisan nalimtan na nila ang rason kon ngaa. 

Ang maayo nga mga pamatasan kag mga mga naandan na naton nga mga matag-adlaw nga mga buluhaton maayo gid.  Apang may kalainan man ini sila.  Ka gang kalainan naga-abot kon ginabuhat naton ini tungod kay amo na ini ang aton namat-an bisan pa subong wala kita nakahibalo kon ano ang rason sini, ano ang kahulugan sini. 

Kaina nagsulod kita sa simbahan.  Ang una naton nga ginpangita amo ang benlinditahan kay manguros kita.  Nanguros kita, apang nahangpan bala naton ang kahulugan sini sa aton kabuhi?  Nakahibalo bala kita, nahangpan bala naton nga ining p[agpanguros sa belinditahan nagapadumdom sa aton nga kita binunyagan, nga kita mga anak sang Dios, nga kita mga templos ang Espiritu Santo nga aton ginbaton sang kita ginbunyagan?  Nakahangop bala kita nga sa pagbuhat sini ginakilala naton nga ang Dios nagapuyo upod sa aton? 

Kon kita nagaselebrar sang Misa nakilala bala naton ang rason kon ngaa yari kita diri sa simbahan?  Ukon isa na gid lang ini ka obligasyon nga dapat ko buhaton? 

Kon kita nagakalawat nakilala bala naton ang aton ginabaton?  Ginakilala gid man bala naton nga ang Ginoo nagasulod sa aton tagipusoon ukon ginabuhat lang bala naton ini tungod kay halin sang gamay kita nga mga bata nabuhat na ini naton? 

Kon kita nagapungko para sa mga balasahon may pagtinguha bala kita nga makapamati sing maayo sang mga ginabasa sa aton?  Ginakilala bala naton nga sa sini nga bahin sang misa ukon sang aton pagtililipon ang Dios nagapakigsugilanon sa aton.  Ukon ini nga pagpungko isa lamang sa mga naandan na naton nga buluhaton nga wala na sing madalom nga kahulugan sa aton kabuhi.

Kon nagahimo kita sing tanda sang paghidait ginaserioso gid man bala naton ini?  Nagahangad gid man bala kita sing paghidait sa tagsa-tagsa ukon ginabuhat lamang naton ini tungod ka yang tanan sa simbahan nagabuhat sini?    

Kon wala naton ginatinguhaan nga mahangpan ang aton ginabuhat, kon wala naton ginahatagan sing kahulugan ang aton mga ginabuhat, matapos lamang naton ining aton pagtililipon nga daw sa wala lang, nga daw sa amo man sa gihapon.  Isa butang nga wala gid nagadala sing pagbag-o sa aton kaugalingon.  Gani indi makatingalahan nga kadamo sang mga ginatawag naton nga Sunday Christians ukon Kristiano lang kon Domingo ka yang ila pagkakristiano yara lamang, makita lamang sa ila pagsimba kag indi sa ila panimuot kag mga buluhaton.    

Sa aton balay ang pagbesa kon kaisa daw isa na lang ka hilimuon nga wala sing kahulugan.  Daw pareho lang nagsiling ka sa telepono nga hello tapos mamuyayaw ka, ukon sa sulat masiling ikaw “Dear Letty” apang ang balatyagon mo sa iya kag ang kaundan sang imo sulat, indi gid man kag wala gid man nagapakita nga “dear” ukon “palangga” mo si Letty.   Nagakatabo ini kon ang mga tanda, ang mga simbolo nga ginahimo naton wala na sing kahulugan.  Gani wala na ini nagapakita sang aton tunay nga balatyagon. 

Mga utod sa sini nga Domingo diskobrehon naton liwat ang mga kahulugan sang aton ginabuhat katulad sang ginapangabay ni Kristo nga dapat sa pagpuasa sang mga Fariseo kag mga gintuton-an ni Juan ila mahibaloan nga ini ginabuhat sa pagpaabot sang Mesiyas.