33rd sun A - 1

Kon ang mga fans sang NBA nagasinggit “I love this game,” ako iya nagasinggit, “I don’t love this game.”  Indi gid ako hilig sa basketball.  Kadamo na ang contra ko tungod sini.  Ginahalin ko ya ang channel kung nagalantaw sila sang basketball kag mangita sang iban.  Ugaling pierdi gid ako - tanan nga mga naupod ko nga mga pari sa convento nanami-an sini nga hampang.  Waay gid ako may mahimo.  Gani kon makita ninyo ako nga nagalagawlagaw sa plaza nga gab-i na, sigurado nagalantaw na to sila sa ibabaw sang basketball.  I don’t love this game.

Ngaa ginsaysay ko ini.  Kagab-i sang ginbasa ko ang aton ebanghelyo subong nahanungod sa mga talento kag abilidad nga ginhatag sang Dios sa aton, nadumduman ko ini nga hampang kag nakapamangkot ako:  ngaa waay ko gid ini naappreciar.  Kahapos sini nga hampang - madamo nga training ang puede ko maintrahan halin sang elementary hasta high school, pero ngaa pinabay-an ko yadto nga mga oportunidad.  Indi man ako putot, makawaras man ako kag makapaniko katulad ni Jawo.  Makadalagan man ako sing madasig basta may nagalagas lang sa akon, napamatud-an ko ini sang ginlagas ako sang ido.  Kagab-i natalupangdan kon ngaa waay ko nadevelop ini nga abilidad.  May duha ka rason.

Una halin sang una isa ini sa mga butang nga waay ko gid ginrisgohan.  Sang gina-train kami hinadlukan ako.  Waay ako nag-intra.  Nahadlok ako nga masiko, naghadlok ako nga makadasma, nahadlok ako nga mamumo ang akon guya sa salog.  Naghadlok ako nga magrisgo sang akon kaugalingon para sa sini nga hampang. 

Nakasiling ako sini tungod kay sang college na ako nakatuon ako sa sini nga leksiyon kag gani nagtinguha gid ako nga makatuon sang swimming.  Ini isa sa mga butang nga nahibaloan ko tungod kay ginrisgohan ko ini.  Nagkadto ako sa madalom nga bahin sang tubig nga indi na makatuntun ang akon tiil.  Ang mga classmate ko mga kinder, grade 1, grade 2 - - ako ang pinakadaku.  Ginakadlawan ako, kay kon i-roll call kami nagasinggit ang amon maestra - “diin na ang balyena?”  My ego was hurt - sobra pa ini nga masikohan kag mamumu ang imo guya sa basketball court.  Apang tungod kay ginrisgohan ko ini, nadevelop ini nga abilidad. 

Subong mamangkot kita sa aton kaugalingon - kasubong man bala sini ang aton pagtratar sa aton mga abilidad?  Ano nga mga abilidad ang puede ko kontani nadevelop apang tungod kay nahadlok ka magbaton sang criticisms, nahadlok ikaw nga mamumo ang imo guya, nahadlok ikaw nga suyaan, ukon kadlawan kag masakitan sing buot, waay mo na lang ginpadayon.  Ano ina kontani nga mga desisyon ang imo napatuman kon nangisog ka lang sa pagbuhat sini.  Ano na kontani ang aton nadangatan kag posible nga mabuhat sa aton pamilya, sa aton mga careers, sa aton spiritual life kon gin-atubang lamang naton sang una pa lang ang aton kahadlok kag pangduhaduha sa aton kaugalingon?

May isa anay ka eksena sa airport sa diin ang isa ka dalaga nagahiribion.  Nadula niya ang iya ticket sa eroplano.  Inukay na niya ang iya bag, waay gid.  Naghiribion siya kay indi na siya makapadayon sang iya pagpanglakaton - na stuck up siya, indi na siya makahalin sa sina nga lugar.  Sang ulihi may nagpalapit sa iya kag ginuloulohan siya hasta sang ulihi ginhagad siya sa coffee shop agud makapaliwaliwa.  Apang sang pagtindog niya nakasinggit siya kag nakatumbo sa kalipay - nakita niya ang iya ticket - ginapungkuan man lang niya gali.  She was sitting on her ticket.  

Mga utod kadamo sang mga lost opportunities, kadamo sang mga posible naton makadtuan kag mga luyag naton buhaton nga waay naton nabuhat tungod sang kadhadlok, tungod kay indi kita luyag magrisgo.  We are sitting on our ticket to fulfillment and happiness tungod kay indi kita makapangatubang sang mga risgo.  Apang tandaan naton - ang tanan risgo - gani kinahanglan naton sang ginatawag nga konting tiaga.  If you want to go places we have to learn to take risks.

Ikaduha, ngaa waay ko gid na-appreciar ang hampang sang basketball.  Isa pa gid ka butang luwas nga waay ako nagrisgo sa pagtuon sini amo nga waay gid ako nakabaton sang encouragment sa pagtuon sini nga hampang.  Importante man ini agud madevelop naton ang aton talents kag mga abilities nga ginhatag sang Dios sa aton.  Ano abi kay pirme ko lang sang una mabati-an ang singgit - nano man ina man daw lay-ud ka, kon indi ako ka pa shoot singgitan ako, “ka mango ka gago sa imo.”  Do you think with this environment madevelop ko ang abilidad nga ginhatag sang Dios sa akon?

Kalabanan sang mga success stories natabo tungod sang encouragement kag pagsalig sang aton mga kaupod.  For example kon waay ang iya asawa nga si Sofia waay kita kuntani nakabati sang ngalan ni Nathaniel Hawthorne.  Isa ka adlaw si Nathaniel ginpatalsik sa iya trabaho.  Pagkabalo sini sang iya asawa nagsinggit siya sa kalipay nga nagasiling -“subong Nathaniel may tion ka na sa pagsulat sang libro.”  Naglungo-lungo si Nathaniel kag nagsiling, “Ano karon ang aton kan-on samtang nagasulat ako sang libro?”  Ginpagguwa ni Sofia ang sinuptan niya nga kwarta.  Si Nathaniel natingala kag nagpamangkot, “diin mo ina kinuha?”  Nagsabat si Sofia, “Nathaniel, nagapati ako nga isa ikaw ka maalam nga tawo kag sa pila ka adlaw makasulat ikaw sang isa ka masterpiece, gani kada semana nagsupot ako para itigana sa sini nga adlaw.”

To make the long story short tunogd sang pagsalig kag encouragement ni Sofia makabasa kita karon sang isa sa mga pinakamatahom nga novella sa bug-os nga kalibutan, The Scarlett Letter, nga sang nagligad nagguwa sa mga sinehan.  Maapreciar naton ini subong tungod sang pagsalig kag encouragement nga ginhatag ni Sofia kay Nathaniel Hawthorne.  And so we ask ourselves, can we do this also to our children, nga makilala naton indi lamang ang ila kapaltahan nga pirme naton ginaugtasan kundi pati na - kag ilabi na gid nga mapakita naton ang aton appreciation sa kaayuhan sang aton mga kabataan, sa kaayuhan sang aton mga kaupod, agud to nga ma-develop man nila ang mga abilidad nga ginhatag sang Dios sa ila.