18th sun A - 4

May isa anay ka tawo ang ngalan niya si Blondin.  Isa sia ka performer sa circus.  Ang iya obra sa circus amo ang paglatay sa isa ka cable ukon ang ginatawag naton nga tightrope walker.  Isa ka malaba cable nga nahigot sa pinakataas nga bahin sang circus, pihak kag pihak latayon ina ni Blondin nga nagabalanse lamang.  Isa ka bes gintistingan niya nag Bisay sang Niagara, isa sa pinakalapad kag mataas nga busay – halin sa pihak nga pangpang pakadto sa pihak, balansihon niya ang iya kaugalingon sa isa ka cable nga salsalon.  Madamo ang naglantaw kag bisan pa makusog ang huyop sang hangin ginlatay ini ni Blondin. 

Sang ulihi nagkuha sia sang wheelbarrow nga iya gintulod sa sadto nga lubid.  Ang mga tawo nagpamalakpak tungod sang abilidad ni Blondin.  Sang ulihi binutangan niya ang wheelbarrow sang madamo nga mga hollow blocks.  Gintulod niya ini nga nagalatay sa lubid patabok sa pihak sang Busay sang Niagara bisan pa mabaskog sadto ang hangin nga nagadapya.  Palakpak ang mga tawo.  Bilib sila kay Blondin. 

Sang ulihi namangkot si Blondin, “Subong sino sa inyo ang magapati nga makarga ko ang isa ka tawo sa wheelbarrow, itulod ko ini nga nagalatay sa lubid kag tabukon namon ang Busay sang Niagara paagi lamang sa sining gamay nga cable.  Nagapati bala kamo nga mahimo ko ini?” 

Ang mga tawo dungan nga nagbayaw sang ila mga kamot nga nagasinggit huo.  “OK,” siling ni Blondin, “sin-o sa inyo ang mag-volunteer nga magsakay sa wheelbaroow.”  Sa hinali dungan man ang tanan nga nagpa-idalom sang ila mga kamot.  Waay gid sing isa sa ila nga nang-isog.

Madamo sa aton ang nagasiling, “Ginoo nagatuo ako sa imo.”  “Madamo sa aton ang nagasiling, “Ginoo ginatugyan ko ang akon kaugalingon sa imo.  Madamo sa aton ang naga-laygay sa iban, ”saligi lang bala ang Ginoo.”  Kon ikaw isa sa mga nagsiling sini, mapakita mo bala ina nga pagsalig kag pagtuo paagi sa pagtugyan nimo sang imo kabuhi sa iya?  Mapakita mo bala ina nga pagtuo paagi sa imo pagvolunteer nga masakay sa wheelbarow kag irisgo ang tanan sa kay Kristo?  Mga utod ang pagtuo indi lamang hambalanon – isa ini ka total commitment.

Ano ang total commitment.  Makita naton ina sa ebanghelyo naton subong.  Duha ka butang.

Una, ang kaisog nga bunga sang pagsalig kay Kristo.  Isa ka karacter nga hayag sa pamatasan sang isa ka kristiano amo ang kaisog – kaisog indi tungod kay daku iya inomol ukon may armas sia.  Kaisog indi tungod kay damu kwarta niya nga ipamayad panganlitan marimalaso gid man sia.  Kaisog indi tungod kay naunahan niya dungan ukon may poder sia nga labaw sa tanan.  Indi.  Sa baylo may kaisog siya tungod sang iya pagsalig sa Dios.  Arisgado sia tungod bal-an niya nga ang Dios indi magpabaya.

May isa anay nga nakilala nga doktor, maalam, naggraduate sa UP, mataas ang iya kuha sang board exams, madamo nga mga trabaho ang gintanyag sa iya sa dalagku nga mga ospital kag mga iskwelahan.  Sa baylo ang iya ginpili amo ang pag-obra sa squatters area – didto sia namulong kag didto sia nagpuyo.  Pinamangkot ko sia. Siling ko, “grabe ka man ba!  Paano ka nakadesisyon sang kasubong sini man?”  Nagyuhum lang sia kag nagtudlo sa ibabaw.  Sumakay sia sa wheelbaroow sang Ginoo.

Sa aton kabuhi, mga utod, may mga bes nga ginahangkat man kita nga maghimo sang desisyon para sa Ginoo – sa opisina ako lang ang matarong magapadayon ala ako sa pag-obra sang matarong kag nagakabagay?  Sa tienda ang akon lang kilohan ang sakto kag dalagko ang ganansiya sang iban: magapadayon bala ako nga negosyante nga may kaluoy?  Ginahagad ako sang barkada sa isa ka katuntunhan: makasiling bala ako indi kag irisgo ang amon pagabyanay?  Mabudlay ini nga mga desisyon.  Apang makatudlo man bala kita sa ibabaw kag magsiling, ikaw lang ang bahala Ginoo kag maglumpat sakay sa iya wheelbarow?

Ikaduha, kaisog nga bunga sang optimism – ang Kristiano may maayo nga panan-aw sa kabuhi.  Layo kag masangkad ang panan-awan niya sa kabuhi – indi kitid.  Gani indi sia madali madiscourage bisan sa iya kapaltahan - ngaa tungod kay nagapati sia nga indi lamang amo ini ang kabuhi – may pihak pa nga kinabuhi – may ginapaabot sia nga mas maayo kag mas himpit nga kabuhi.  Ang optimsitic nga tawo maisog kay kahibalo sia maghulat sing mapinasinsiyahon sa maayo nga buasdamlag.  Katulad sang maayo nga suluguon nga nagapaabot sang pag-abot snag iya agalon.  Makapadayon sia sang iya maayo nga hilikuton bisan mabudlay ini tungod kay may maayo sia nga panan-awan sa mga hitabo – nga kon mag-abot ang akon agalon padyaan niya ako, nga ang tanan nga iya kabudlay all these will end up for the good. 

Nagapati siya sa hurobaton nga nagasiling – ang kabuhi isa ka pagsakay sa ferris wheel – kon kaisa yara ka sa ibabaw, kon kaisa yara ka man sa idalom.  Ang isa ka optimistic Kristiano wala nagasiling nga indi ina mahimo, sa baylo nagasiling sia, tinguhaan ta ini nga himuon.  

Ano iya ang imo panan-aw sa kabuhi – masami bala ikaw nagasiling hay waay waay gid na, hmm amo man ina sa gihapon, waay na na? 

Subong mangayo kita nga kabay pa mangainmasinaligon kita sa Dios kag sa iya mga promisa.  Pangamuyo kita nga pabakuron sang Dios ang aton pagtuo agod ang aton panan-aw indi masentro sa mga balod sang kabuhi kundi sa kay Kristo nga aton Ginoo.