Baptism of the Lord A - 1

May isa anay ka manggaranon nga tawo nga nang-imbitar sang mga big shot sang iya banwa sa isa ka bangkete.  Madamo ang nag-alabot sa sadtong gab-i sa pagtambong sining madu-agon nga sinalosalo.  Didto ang congressman, ang mayor, ang monsignor, ang  mga de buena familya, kag ang mga manggaranon nga nag-abot nga nakasakay sa ila matahum nga mga salakyan. 

Sa sadto man nga gab-i nag-ulan sing mabaskog kag gani basa ang dalan kag madanlog.  Gani, sang pag-abot sang isa ka bisita nga nagasuksuk sang elegante kag malahalon nga bayu, dumalagan siya sa pagpasilong pasaka sa matahum nga balay, kag sa ano man nga dimalas nakadanlog siya kag nabulit gid sang lutak ang iya bayu, kag ang iya nawong.  Ang mga nakakita sa iya nagkadlaw tungod sang iya kahimtangan.  Kag tungod sa dakung kahuya hana na siya kuntani nga magpauli apang hinawiran siya sang tag-iya sang balay, “tiyoy indi ka lang magpauli. Waay na kaso ah.  Kadto ka anay sa akon piesta.”  Apang ang bisita nahuya sa iya kahimtangan kag indi siya makabatas nga makita pa gid siya sang kadam-an kag kadlawan.  Apang ang tagbalay nag-insistir nga magpabilin siya, kag agud indi mahuya ang iya bisita sa pagsulod sa iya balay sa sina nga kahimtangan, waay bala nagkuha ang tagbalay sang lutak sa dalan, ginpahid niya ini sa iya mismo nga bayu, gindamulit ang iya guya sang higko kag hinagad uli ang iya bisita sa pagsulod.  Ang duha nagsulod sa balay nga naga-uyatay sang kamot kag ang iban nga mga bisita waay na gid nakakadlaw liwat sa kahimtangan sadtong tawo.

Mga utod mamangkot kamo – ngaa nagpabunyag pa si Jesus – waay siya sala, gani waay siya nagakinahanglan sang bunyag – gani ngaa – ini nga istorya magapahayag kon ngaa.  Nanaog siya sa aton lebel, nanaog siya sa aton makahuluya nga kahimtangan agud nga indi kita mahuya sa pagatubang sa iya amay.  Nanaog siya agud mabayaw niya kita pababaw.

Kung panumdumon mo gid sing madalom makasiling kita nga ang aton dios mapainubuson nga dios.  Kon kaisa nagapamangkot man ako sa akon kaugalingon ngaa nagtugot man ang Dios nga magpari ako man, ngaa pari man ako sa gihapon. Ambot kon nakapamangkot man kamo kon ngaa nakabatas man ang Dios nga katoliko man kita sa gihapon. 

Sang didto ako sa Pototan ang amon pabo nga gina-aliali gid namon nadula, ayawan kami pangita kag kon diin na kami kalab-ot sang takol-takol agud makita lang.  Igo namon natalupangdan lumupad gali sa pader kag nagkadto sa likod sang konbento sa diin madamo didto ang mga squatters.  Siling sang amon driver nga nag-upod sa amon sa pagpangita, siling niya, “Father, labay man akon, maayo lang kay ang aton pabo nagtupa sa balay sang isa ka protestante, kon sa katoliko to nga balay ginletson na to.”  Kahuluya pero tuod.  Apang katoliko man kita sa gihapon kag ang Dios waay gid naghinulsol nga bisan amo kita sini kadungol palangga man kita niya sa gihapon.  Bal-an n’yo kung ngaa?  Kay ang Dios naton mapainubuson - God is humble.  Kon bugalon lang ang Dios siguro damo na siya subong nakita nga mga rason agud pauntaton niya ako sa pagkapari – siguro masiling siya ay basi mahuy-an lang ako sina sa iya.  Kag nahuy-an gid man siya – kag nahuy-an gid man siya sa aton katulad sadtong siling sang akon driver. 

Bisan amo kita sini ang Dios waay naghinulsol ukon nagpamasol kon ngaa ang iy sumulonod nga mga katoliko na gid amo pa ang pinakaritubado. Sorry to tell you pero ang aton Dios kapal muks nga daw kapal gooms.

Subong matu-on kita sa humility sang aton Ginuo nga nagpareho siya sa aton sa tanan nga bagay, when he too became vulnerable like us.

Si Jesus mapainubuson tungod kay siling sang ebanghelyo nagpabunyag siya kag nagpangadi sia, nagapangadi siya.  Ano ang kahulugan sini.  Ini nagakahulugan nga tungod sang iya pagkatawo, nakahibalo siya, nga kon sia lang, waay siya sing may mahimo.  Nga siya nagakinahanglan sang bulig, nga kon siya lang indi na siya makasarang.

Ano ang sala ni Lucifer, ni Adan kag ni Eba kag sang mga tawo nga nagtukod sang torre ni Babel – abi nila matupungan nila ang Dios – indi na namon kinahanglang ang Dios – Dios kami.  Hubris ang tawag naton diri – tam-an ka taas nga bugal.

Ang pagpabungyag ni Kristo nagapakita sa aton nga tungod kay kita tawo kinahanglan makilala naton ang aton kaluya, ang aton pagkakinahanglan sang Dios kag sang aton katilingban.  Indi kita makasipak sa aton katilingban nga magpalainlain gid kita, kay abi naton maayo na gid kita.  Indi, kinahanglan naton ang isa kag isa.  Indi kita makapabilin sa aton bugal nga masarangan naton ang tanan nga kitahanon lamang – magtuon kita mangayo bulig.

May duha anay ka gamay nga giting nga nagtabok sa taytay.  Waay sila kahibalo nga samtang nagatabok sila may nagasunod gali nga elepante sa likod nila.  Sang nagatabok sila kag ang elepante nga nagasunod, nag-uyog ang tatay.  Gani ang una nga giting nagbalikid sa giting sa likod niya kag nagsiling – “pare bilid ka ga-uyug man gali ang taytay tungod sa aton no.” 

Ambot sa mga giting.  Apang para sa aton nga mga kristiano ang pagpabunyag sang Ginoo naga-agda sa aton nga makilala naton ang aton kaluya nga kung kita lang waay gid kita may mahimo, kilalahon naton nga kinahanglanon naton ang Dios kag ang isa kag isa.