pentecost A

May isa anay ka bag-o nga pari nga gin-assign sa isa ka parokya.  Katulad sang tanan nga bag-o nga pari ini siya tam-an gid ka enthusiastic kay daw sa ano bala nga amo ini ang iya first parish assignment.  Apang sa pag-abot sini nga pari ginsugata siya sang iya mga parokyano kag ginsingganan nga kanugon lamang sang iya pagkari sa sini nga parokya kay ini nga parokya, ini nga simbahan -- patay.  Patay ang gin-asaynan niya nga parokya. Gani isa ka adlaw out of desperation, ining pari nagpa-imprinta sa isa ka local newspaper sang isa ka obituary, ukon notisya sang padkamatay sang ila simbahan kag ang lubong natalana sa Domingo sang hapon.

Tungod sini nga notisya madamo ang mga tawo ang nagtambong sa lubong sang simbahan, curious kon ano ini nga sahi sang lubong.  Kag matuod didto sa pagsulod nila sa simbahan nakita nila ang isa ka daku nga lungon nga ginapalibutan sang mga bulak.  Pakatapos nga ginpangadian sang pari ang minatay sa sulod sang lungon, ang patay nga simahan, gin-agda niya ang tanan nga mga tumalambong sa paglantaw for the last time sang ila minatay, ang simbahan, kag sa pagtahatag katahuran sini.  Madamo ang naglinya sa paglantaw apang sa tapos nga sila makalantaw kon ano ang sulod sang lungon, ang tagsatagsa nagduku kag natublag sang ila nakita.  Naglakat sila paguwa nga daw may ginakahoy-an.  Ini gali tungod kay ginbutangan sang pari sa sulod sang lungon sang isa ka daku nga espeho agud to makita sang tanan nga makalantaw ang ila nawong nga yara sa sulod sang lungon, ang lungon sang patay nga simbahan.

Mga utod, subong ginasaulog naton ang pentecostes, ang pagkunsad sang Espiritu Santo.  Kag sa kinaadan ginakabig naton ini nga birthday sang Santa Iglesya, sang Simbahan tungod kay sa pag-abot sang Espiritu ginhimo kita nga mga bag-o nga mga tinuga nga ginhugpong nga mangin isa ka banwa nga pinili sang Dios.  Kita tanan amo ang simbahan.  Gintipon kita sang Espiritu agud nga kita mangin inayupan nga mga anak sang Dios.  Ining aton simbahan ginatuytuyan sang Espirtu Santo paagi sa iya pagiya sang tagsatagsa ka miembro sining simbahan.  Gani, ginsiling ni San Pablo nga ang simbahan daw isa ka lawas kag ang nagakalainlain nga mga bahin sang lawas amo ang katapo sining simbahan.  Katulad sang lawas, ang mga nagakalainlain nga mga bahin sini, kinahanglan magfunction agud to nga ini nga lawas, ini nga simbahan magtubo, magtin-ad, magpahayag kag magpadayon sa paghikot sang misyon ni Kristo nga gintugyan sa iya pagtatap.  Ini nga simbahan magatin-ad tungod kay ang tanan nga bahin nga ginbugayan sang Espiritu sang mga nagakalainlain nga mga dulot naga-function, nagabuhat sang ila katungdanan paagi sa paggamit sining mga dulot sang Espiritu.  Apang ini nga simbahan mangin patay man kon ang iban nga bahin nga ginbugayan sang Espiritu sang iya mga dulot waay naga-function, waay nagabuhat sang ila katungdanan paagi sa paggamit  sining mga dulot sang Espiritu.  

Mga utod ang aton istorya subong naga tudlo sa aton sang kamatuoran.  Kon patay ang aton simbahan ini tungod kay patay man ang iya katapo, ang iya nagakalainlain nga bahin.  Apang kon buhi kag mabaskug ang aton simbahan, ang aton parokya, ini tungod kay ang mga katapu nagatugot nga sila pagagamiton sang Espiritu sa pagpatin-ad kag sa pagbalay sini. 

Mga utod, kon sa pamatyag ninyo patay ang simbahan dapat ini magtublag sa aton kay ang yara sa lungon amo ang aton mga nawong.  Kita ang nag-determine sini, kita ang nagtugot nga mapatay ini, kita -- tungod sang aton pagpabaya, kita -- tungod kay kita ang una nga patay.  Apang kon sa pamatyag ninyo buhi ini nga parokya, dapat kita magkasadya sa aton kaugalingon tungod kay kita tanan ang kabangdanan sining kabakod.  Your church is dead because you have died first by not responding to the Spirt at work in each of you.  Your Church is alive because you have permitted the Spirit to work through you.

Sa praktikal nga bahin, ano karon ang buhaton naton, ano ang buhaton ko agud nga kita makabulig sa pagpatin-ad sang aton parokya paagi sa pag-usar sang mga dulot sang Espiritu sa aton.  Ano ang buhaton ko agud makabulig ako sa pagbuhi kag sa pagpabakod sang aton parokya.

Una, tinguhaon naton nga kita mangin instrumento sang paghidait kag pagpakiguli sa aton parokya.  Mga utod, ang paghidait kag ang pagpakiguli nga maagom paagi sa pagpatawad amo ag bunga nga dulot sang Espirtu.  Amo ina ang rason kon ngaa si Kristo nagsiling sa iya mga sumulunod, ang paghidait yara sa inyo.  Kag ginhuypan niya sila sang Espiritu sa pagsiling, “kon sin-o ang ginapatawad ninyo ginapatawad man sila.” 

Paano ini mabuhat diri sa aton parokya?  Paano kita mangin instrumento sang paghidait kag pagpakig-uli sa aton parokya?  Siguro natutahan ninyo nga ang aton parokya may mga intriga kings and queens, may mga tsismis mills kag suya-ay blues.  Ang isa ka organisasyon nagasuya sa isa, kag nagasiling “ay mas maayo kami sang sa inyo”  ukon ang isa magsiling “ngaa ano gid ya ang ginbuhat ninyo, maayo kami i!”  May ara nga mga nga  primi lang niya ginasuyaan ang iya mga parokyano.  Tanan naga-irinaway, tanan nagapalapad papel, tanan naga pa-indis-indis.  Mga utod, indi ini bunga sang Espiritu Santo kundi iya sang kadalok, kag kasakon kay abi niya maburaw niya ang grasya sang Dios.  We are dividing the church, our parish by this attitude.  Subong ginaagda kita to become intruments of peace and reconciliation.  Let us try to affirm the good of one another.  Let us also try to correct each other by making known to them our grievances.  Magbuligay kita nga magtubo, indi kay magkompetinsiyahanay.  Isa man lang ka langit ang kadtoan ta.  Ngaa la-in gid ang langit nga kadtoan ninyo haw.  Ang lain lang kay basi didto pa kita magkilit-anay sa impierno kon magapabilin nga amo ini ang aton pamatasan.

Ikaduha, be empowered, usara ang imo kaalam, usara para sa aton parokya ang mga dulot sang Espiritu sa inyo.  Kon may talento ka sa pagtukar sang instrumento, usara ina sa pagpatigayon sang maayo nga pagkanta sang aton katilingban.  Kon maayo ka nga manunulat yara may Candle Light kita.  Kon maayo ka maghambal, yara may mga ministers of the Word kita nga nagapahayag sang santos nga kasulatan  sa iban.  Kon maayo ka magkanta usara sa koro.  Kon mapisan ka maglibot sa mga kabarangayan kag maayo ang imo pangilala, usara ina agud maganyat mo ang iban sa pagbalik sa simbahan.  Kon maayo ka magdekorar usara ina nga talento para sa imo parokya.  Kon maayo ka matudlo, usara ina sa aton Sunday School, sa aton paghiwat sang mga seminar.  Be empowered, get involved.  Indi paggamusa ang Espiritu Santo sa imo.  Indi siya pagtagu-a. Indi siya pag-ikahuya.  Get involved because the Spirit empowers us all.

Sa katapusan luyag ko tapuson ini paagi sa istorya.  Sa India may isa didto ka lugar nga wala sang koriente kag ang ila templo tam-an ini ka dulom kong gab-i.  Sa sulod sini nga templo may yara nagakabit halin sa atop nga daw isa ka daku-daku nga chandelier nga may bulutangan sang isa kag gatos nga mga kinke.  Bulutangan lamang ini apang wala ini sang sulod nga mga kinke.  Gani kon may mga pagsimba sila kon gab-i, ang tanan nga mga sumulimba nagadala sang ila mga kinke kag ginabutang nila ini sa chandelier kag sa amat-amat, samtang naga-inabot ang mga tawo nga may dala nga kinke, nagasanag man nga nagasanag ang templo.

Subong ginapamangkot ang tagsatagsa, ano bala ang imo dala para sa sini nga simbahan? Ano ang kasanag nga madulot mo para sa imo katilingban?  Ano bala ang dulot sang Espiritu nga yara sa imo nga puede mo mabulig sa pagbalay sang aton parokya?  Ginapamangkot ini tanan sa aton.