2nd sun of advent B

May isa anay ka panday nga ginpamangkot, “tiyo’y ano ang ginaobra mo diri?”  Kag ang panday nga daw nagakulomoron kag daw may kaakig sa iya tingog nagsabat, “Nagaobra ako sang salog!” 

Sa ulu-unhan niya may ara man didto nga isa man ka panday nga naga-obra kag ginpamangkot man sia, “tiy’oy ano ang ginaobra mo diri?”  Kag ini nga panday nagsabat nga may kasadya kag kalangkag sa iya tingog, “nagaobra ako sang salog sang isa sa mga pinakamatahum nga katedral nga gintukod para sa Dios.”

Ang aton ebanghelyo nagasaysay sang istorya ni San Juan Bautista nga suno kay San Markos amo ang kamunu-an sang ebanghelyo ni Jesukristo.  Katulad sadtong pamuno naton nga istorya, kag sang tagsa ka istorya sa sining kalibutan, ang kabuhi sang tawo ukon ang pagpatindog sang edipisyo wala nagasugod sa human, kundi ini naghalin sa isa ka gamay nga bato nga ginpahamtang nga mangin bahin sang salog nga nangin bahin sang daku-daku nga edipisyo.  Subong man makita naton nga ang kabuhi ni Jesus wala nagsugod nga human na ukon dira lang sa pagbun-ag sa iya.  Nagsugod ini kay Juan Bautista, nagsugod ini sa mga damgo kag paglaum sang mga propeta sa daan nga kasugtanan sang santos nga kasulatan, nagsugod ini bisan pa gani sang pagtuga sang kalibutan sa diin si Eba kag si Adan ginsaaran sang isa ka Manluluwas.  Ang kabuhi ni Kristo nagsugod na sa panghunahuna kag plano nga ginbuko sang Dios sa wala pa makaumpisa ang pagtuga sang kalibutan.  Kag sugod diri sa kamunoan sang maragtas sang kalibutan ang tanan nga mga hitabo, ang tanan nga mga ginpanghambal, ang tanan nga gintinguhaan, kag ang tanan nga gintagna nagapadulong sa sinang iya kapupun-an nga ang Mesiyas matawo sa kalibutan.  Ang Dios yara sa aton tunga, kag sia padayon nga nagahikot sa istorya sang aton kalibutan tubtob nga mahatagan sang bug-os nga katumanan ang iya mga plano.  Everything in the world started out small, a small spark, a small dream, a small act of kindness.  Ang tanan nagsugod sa iya gamay nga kamunoan.

Ano ang kaangtanan sini nga mga panghunahuna sa aton karon kag sa aton pagsaulog sang panahon sang Adbiento, ang panahon sang pagpaabot?

Una, Ang tanan nga nagakatabo sa aton kalibutan ginagiyahan sang Dios.  May isa anay ka tawo nga sa pila ka tuig wala gid sia nagbutang sang mga dekorasyon para sa krisma kay siling niya “pigado subong, tam-an ka mahal sang mga balaklon, gani wala nagakabagay ang pagpangdekorar sa aton balay.” 

Kahapon sang nagsugilanon sila sang iya abyan yadtong tawo nakamarasmas nga kada tuig daw nagapigado man lang kita nga nagapigado.  Kada tuig ang ginahulat nga kahamungayaan daw wala man naga-abot.  Dugang diri nagalala nga nagalala pa gid tapat.  Gani yadtong tawo naghimo sang resolusyon – “mangdekorar na lang ako kay kon maghulat pa ako nga mag-asenso ang Pilipinas, pamatyag ko patay na ako.”

Kalabanan sa aton karon may kasubong nga panan-aw sa hitabo.  Pirme na man lang kita naga-antus.  Dayon ang ginahulat naton nga kaayuhan kag kahamungayaan daw wala man naga-abot.  Siguro iban sa aton natak-an na sang hulat.  Kag sin-o lang abi ang wala?

Sa sini nga mga hitabo nagasalig bala kita nga ang Dios padayon nga nagahikot sang tanan santu sa iya plano?  Sa sini nga mga kahimtangan sang kakulang sang paglaum, makasalig pa bala kita nga may Dios nga nagapalakat sang aton panahon kag bwasdamlag?  Nga ang tanan nga aton ginabatas subong may katapusan; nga ang tanan nga aton ginatinguhaan subong may kapupun-an?  Nga ang tanan nga aton ginahandum subong kag gintuohan may katumanan?  Yara ang aton kabuhi sa kamot sang Dios – padayon sia nga nagapanghikot, padayon sia nga nagatuytoy sa aton.

Ikaduha, nagapadulong kita tanan sa ginplano sang Dios, apang tungod kay kita may kinamatarung, sarang nga sa sining panglakaton nagabulig kita nga mahuman ini, ukon sarang man nga nagapamalabag kita sa katumanan sini tanan.

Katulad sang istorya naton sa pagbukas sining pamalandong, posible nga nagapanumdom lang kita nga ining aton paghimakas para man lang ini sa isa ka bahin sang indi ko makilala nga nga edipisyo.  Apang posible man nga sa pagbuhat mo sang gamay nga hilikuton sa pagpamutang sang salog nakilala mo nga ining imo nga mga ginabuhat, gamay nga tuod nga bahin, apang ginakilala mo nga ang inyo tanan ginapatindog amo ang templo sang Dios.  Indi lang salog, indi lang isa ka bahin sang salog, kundi ang salog sang katedral para sa Dios.

Amo man ini sa aton tagsa ka buluhaton.  Ang iloy nga nagatudlo sing may kaukod sang katekesis sa iya bata magdumdom lang nga kagamay man lang sang iya gina-obra, apang wala sia makatalupangod nga sa iya pagbuhat sini ang iya mga kaapohan, pati na ang kaapohan sang iya mga kaapohan magatindog kag mabalay sa ibabaw sining bato nga amo ang iya anak nga iya gintudluan karon sang katekesis.  Gamay nga panugod apang daku ang iya mabuhat.  Ang bata nga gintudluan sang katekesis magadako kag magahamtong, kag magatudlo sa iya man kabataan, kag ang iya kabataan magatudlo man sa ila mga kabataan. 

Ang ginasugdan naton subong possible nga indi pa gid klaro ang iya sini padulungan, apang nagasalig kita nga kon ginabuhat lamang naton ang aton bahin, ang Dios nga nagapalano kag nagapanghikot sini tanan magadala sini sa iya katumanan.

Si San Juan isa lamang sa mga bato nga ginpatindog sa paghanda sang pag-abot sang Ginoo.  Kita man katulad niya mangin bahin man sining dalagku nga plano sang Dios kon kita handa sa paghalad sang aton kaugalingon agod ining Diosnon nga plano mahatagan katumanan.

Sa sining panahon sang Adbiento, kita ginahatagan sang panan-awan sa mga ginabuhat sang Dios sa aton kabuhi – ang tanan may padulungan, ang tanan bisan ano pa kagamay may importante nga bahin sa maragtas sang kalibutan kag sa iya sini kapupun-an kag kahimpitan sa panahon sang Dios.