Nagapuyo ako sa
seminaryo. Nagapuyo ako sa lugar nga may
79 ka mga high school nga seminarista, 29 ka mga college ka 12 ka
pre-college. Dugang diri sa amon balay
may 8 kami ka mga kaparian, napulo ka mga kabulig, kag more or less 30 ka mga
baboy. Ining 30 ka mga baboy tuod-tuod
ni nga baboy kag indi figure of speech.
More or less may tatlo kami ka mga bubon. More or less siling ko kay kon kaisa
nagakawad-an tubig ang bubon, ti may mga bes nga duha na lang ukon isa na lang ang
amon bubon. Ipakita ko sa inyo ang amon
situwasyon. Mga 6:00 sa gab-i ang amon
schedule nagasiling, shower time. Sa
pagkamatuod ang ulihi ko nga shower sa seminaryo mga sobra na kinse ka tuig ang
nagligad. Naka-shower ako kay wala tawo sa seminaryo, bakasyon ang mga
seminarista kag mga pari, gani buraw ko ang tangke sang tubig, kag gani tumubod
ang shower. Apang sa bilog nga tuig,
sang seminarista ako naga-usar lang kami sang cabo sa pagpaligo - kon kaisa sa
banyo, kon kaisa sa bangirahan, kon kaisa dira sa tunga sang garden - kag kon sa
diin may tubig. Amo ina siguro ang rason
kon ngaa wala kami nagapasulod babayi sa seminaryo kay daw halos ang bilog nga
seminaryo banyo sang lalaki.
Tungod kay sa
seminaryo ako nagdaku halin first year high school makabig ko ang akon
kaugalingon nga beterano sa paligo-ay sa nagatulo-tulo lang kon kaisa nga
tubig. Beterano ako sa madamo nga mga
away, madamo nga mga agaway, paunaunahay, kag madamo nga mga tuntohanay agod
makapaligo. Kag sa masami kombinasyon
ini sang kaalam kag hampang. Kon
paloy-paloy ka imo, ukon ang ginatawag naton nga mga cry-babies indi ka gid
maka-survive sa seminaryo. Ngaa? Kay bisan diin man lang, ang tubig ukon ang
kakulang sini masami nangin tunaan sang away sa bagay nga bisan ang
pinaka-santo nga seminarista ginatubu-an sungay pananglitan may problema sa
tubig. Maayo man kay may kabo kami sang
una kay man sang una kon tuntuhon mo ako sa banyo, pakalu-an ta gid ka sing
kabo.
Nadumdoman ko ini
nga istorya sang ginbasa ko kagab-i ang aton mga balasahon. Ang mga Israelinhon nagkulomoron sa kay
Moises tungod kay wala sila tubig. Sang
didto sila sa ehipto nga nag-alagad bilang mga ulipon sang ginahrian, hagi sila
panawag nga panawag sa Dios nga magpadala sia sang isa ka manughilway sa ila sa
pagka-ulipon, apang sang ginhilway na sila kag ginpaagi sa desierto kumod naman
sila nga maayo pa nga napatay sila didto sa ehipto. Iban sa ila luyag na gani magbalik. Ngaa, kay wala tubig. Big believers during exodus now they all came
out as skeptics! Why? because of the lack of water, specifically
because of thirst. Ang kakulang sang
tubig, ang kauhaw nagbaylo sa ila halin sa isa ka masinaligon nga katawohan,
apang karon puno na sang pagpangduhaduha; halin sa mapinasalamaton nga banwa,
apang karon puno na sing pagpanomboy kag pagyaguta. Our need for water, our thirst can change us
overnight from decent men to brutes.
Kon ara ka na gani
sa situwasyon sang kauhaw, sa situwasyon sang kagutom, sa situwasyon nga
nagabatyag ikaw sang daku nga kakulang, nagabaylo man ang imo pamatasan, ang
imo panulok kag sa iban bisan gani ang ila idealismo nagakadula. Ang kauhaw sa manggad nagahimo sa aton nga
makawat kag dayon, kag butigon bisan kon kaisa manggaran na kita; ang kauhaw sa
paghigugma nagatulod sa aton sa kahisa, sa selos kag kon kaisa sa pagpatay; ang
kauhaw sa acceptance nagatulod man sa aton sa mga addictions sang malain nga
mga ilimnon, druga kag makahililo nga mga barkada; ang kauhaw sa poder
nagatulod sa aton sa pag-angkon sini bisan pa sa mahigko kag mapintas nga paagi. Wala lang ako nagtumod sa kauhaw nga mabulong
sang tubig, ukon kagutom nga mabusog sang pagkaon, ukon kakulang nga masabat
sang mga pagkabutang. Pero lakip man
diri ang kakulang nga mabatyagan naton sa aton pagkatawo.
Ang Ginoong Jesus
nagsugilanon sa isa ka babayi nga nagkadto sa bubon sa tuyo nga mabulong ang
iya kauhaw sa tubig. Didto kay Jesus
natalupangdan niya nga ang iya kauhaw indi lang tubig. Kag didto man sang babayi natalupangdan nga
ginsabat niya ining kauhaw sa iya kabuhi dira sa iya pagkambio-kambio bana sa
bagay nga nakalab-ot na sila sa lima. Si
Jesus nagpakita sa iya nga Sia, si Jesus, amo ang nagpakita sang iya
matuod-tuod nga mga kauhaw, kag si Jesus man, ang mesias kag Dios, ang mangin
bulong sinang iya kauhaw.
Matuod sa aton
dutan-on nga mga kauhaw, diin ka lang bala nakakita sang tawo nga nabulong niya
ini dira sa iya mga pagkabutang ukon sa mga nagakalain-lain kag nagalumpat-lumpat
nga mga relasyon, ukon sang bisyo? Kon
kaisa nagakatingala kita kamanggaranon naman ina sa iya ngaa mangawat pa sia,
ngaa mahangad pa sia bisan pa sang indi iya?
Kon kaisa makita mo kaayo sang asawa, kaayo sang pamilya, ngaa mangirida
pa, ngaa indi kontento sang isa? Sandaling
kaligayahan, pahiram ng isang umaga, indi lang ini mga titulo sang pelikula
kundi balatyagon sa kabuhi sa aton hangad nga mabulong ang mga kauhaw kag ang
emptiness nga yara sa aton. Ang tawo
indi gid mangin kontento. Tungod sang
kaluya sang aton natura ang kauhaw kag kagutom sang tawo indi mabulong sang mga
butang sang kalibutan. Siguro inang
kauhaw kag inang kagutom hungod nga ginbutang sang Dios sa aton agod nga indi
kita mag-untat magpangita sa iya, ang matuod nga makabulong, ang matuod nga
maka-satisfy. Siling ni Sta. Teresa “Solo
Dios basta.” Only God is enough. Ang Dios lang ang maka-kontento, ang Dios
lang ang makabulong sa mga kagutom kag mga kauhaw.
Kag diri luyag ko
i-advertise sa inyo ang pagkapari kag ang pagkamadre. Ang pagkapari kag ang pagka-madre indi lang
isa ka hilikuton, indi lang isa ka ulobrahon, indi lang isa ka sahi sang
kabuhi. Isa man ini ka simbolo, simbolo
nga sa mga kauhaw sang aton tawohanon nga kabuhi, ang mga tinuga, ang mga
pagkabutang, ang manggad, ang poder, ang relasyon sa magti-ayon indi bastante
nga makabulong. The things of this world
cannot fully quench our real thirst. Ang
pagkapari, ang pagkamadre isa ka simbolo nga solo Dios basta, nga ang Dios lang
ang maka-kontento, ang Dios lang ang makabig naton nga bastante. Only God can fully satisfy, only God is
enough.
Sa subong nga
panahon yara na kita sa isa ka kritikal nga tion kon sa diin amat-amat na nga
nangin secular ang kalibutan. Ang sobra
nga pagsalig naton sa binuhatan sang tawo, ang sobra nga pagsalig sa iya sini
kaalam kag kinaadman. Indi nyo pa siguro
masyado mabatyagan ina nga hitabo kay masiling kamo, ti puno man ang
simbahan. Pero kon husisaon mo 10 tubtob
15 porsyento lang ang nagasimba kada domingo. Diin ya ang nabilin nga 85 porsyento ka mga
katoliko? Dugang diri sin-o lang bala sa
aton ang nagapamati pa sa mga ginatudlo sang simbahan. Sigurado ko nga kalabanan gani sa aton wala
nagasapak sa RH Bill nga ginapamatukan sang simbahan nga kontra sa iya moral
nga pangabuhi. It is not just the church
that is becoming insignificant. God is
also becoming more and more insignificant.
Siguro once in a while ining mga katalagman nga nagakatabo sa aton, nga
indi naton mapunggan, nga bisan ang pinaka-advance nga nasyon indi gani
makapugong, ini nagapakita sa aton sang aton kaluya, nagapakita sa aton sang
aton kakulang, nagapakita sa aton nga kon wala ang Dios bisan anano ta kaalam
kag ka poderoso we are bound to fail.
Pero padayon kita nga nagabiya sa Dios, padayon kita nga nagapalayo sa
iya kag nagasalig lang sa mga butang sa kalibutan.
As we become
materialistic wala na sing luyag nga magpari, wala na sing luyag nga magbiya sang
security sang kalibutan kag magkabuhi nga nagasalig sa Dios lamang. Bisan kami nga mga pari naapektohan sini kag
ang tentasyon nga mangin more secular, more materialistic tam-an gid kakusog.
Gani indi
mahamutig nga nagadiutay man ang kaparian sa kalibutan. Diri sa aton arkidiosesis sa tagsa 15 mil ka
mga tawo 1 lang ka pari ang makaalad, nga kuntani ang sakto nga ratio is 1
priest to two thousand. Ang tanan luyag
na mag-OFW kay dira ang madasig nga kwarta, kay dira makapatindog ka dayon sang
matahom nga puloy-an kag makabalay sang seguridad sa imo panimalay. Apang sa nasiling ko we cannot be really
secure and the things of this world can never satiate - may kulang gid pirme,
may kulang gid. Kag inanag kakulang
mabulong lamang sang Dios.
Karon nagkadto ako
diri sa inyo - basi may luyag kamo nga papari-on sa inyo panimalay, basi may
luyag sa inyo nga magpari, basi may yara dira nga nagahangad nga magpari. As a priest you will be invited to become a
symbol to our secular and materialistic world nga ang Dios lang ang bastante,
ang Dios lang ang makabulong kag makasabat sang kauhaw sang kalibutan.
No comments:
Post a Comment