2nd sun of easter A

Nakabati na bala kamo sang istorya nga ang tungatunga sini kag ang iya ending indi suno sa aton ginapaabot, indi suno sa aton ginapaminsar nga matabo, kag waay nagasinanto? Ano ang reaksiyon mo sang nabati-an mo ini?

Sang nagligad nga duha ka bulan may nabasahan ako nga fairy tale.  Familiar kamo tanan sang ginatawag nga fairy tale - usually kasubong sini ang fairy tale - may prinsipe nga sa pagkaguwapo, mapisan, maisog, hero; may princesa nga sa pagkaguwapa, ginbiktima sang aswang ukon ginadakop sang dragon nga nagabuga sing kalayo; ang prinsipe lamang ang makaluwas sa iya - ginluwas ang prinsesa tungod sang kaisog sang prinsipe, ginkasal sila and they live happily ever after.

 

Apang ang akon iya ginbasa nga fairy tale sang nagligad nga mga binulan la-in - tam-an ka lain.  Ang prinsipe, malaw-ay, matamad kag tarantado. Gindakop siya sang dragon. Ang prinsesa maisog (waay ginmentionar kon law-ay siya ukon guwapa). Siya lamang ang makaluwas sa prinsipe.  Gani ang prinsesa nagpakig-away sa dragon sa pagluwas sa prinsipe, ginluwas sang prinsesa ang principe, apang tungod kay nasupladohan ang prinsesa sa prinsipe nga matamad, waay sila nagpakasal and they did not live happily ever after. 

Pagkabasa ko sini, sa una ko nga reaksiyon nakasiling ako “anano to, binuang ini.”  Waay ko gid ini ginpaabot nga istorya, gani indi ako makapati sang akon binasa bisan bal-an ko nga ang tanan nga fairly tale indi mapatihan, pero sobra gid ini.  Indi ini mabaton sang akon paminsaron. Indi amo sini ang ginapaabot ko, indi ini logical, indi ini coherent suno sa akon ginapaminsar nga matabo.  Makakilibot nga istorya, waay data.  I dismissed the story, and of course I doubted the story.  I became sceptical of the story.

Tanan kita nakasugata sini nga sahi sang mga istorya, mga istorya nga indi logical, indi coherent, waay nagasinanto kag waay ginapaabot nga matabo.  Kag ang mala-in pa, kay ang kalabanan sini nga mga istorya, mga matuod nga istorya nga natabo kag nagakatabo sa aton kabuhi.  Katulad kay Thomas.  Bisan matuod nga ginsiling sang Ginuo nga siya mabanhaw, waay gid bisan isa sa ila ang nagpaabot nga amo ini ang matabo, nga ang patay mabanhaw, nga ang nakita nila nga pinatay sa Krus mabanhaw, mabuhi liwat.  Mga utod, kon husisa-on naton kag panumduman sing malawig, the more we look at ourselves, the more we will understand what Thomas did - kon mahangpan lamang naton ang aton kaugalingon, maintinedihan man naton kon ngaa kasubong sadto ang reaksiyon ni Tomas sang ginsugiran siya nga si Jesus nabanhaw.  Nangin skeptical sia, nagduda siya, kag waay siya nagsalig,  ngaa? tungod kay waay niya ini ginapaabot nga istorya, waay niya ini ginapaabot nga matabo.

Katulad kay Tomas, one time or the other may natabo man sa aton kabuhi sa diin nakasiling kita, ”anano ato” ukon nakapamangkot kita, “ngaa kasubong sini, waay ko ini ginaexpecktar, ngaa natabo ini?”  

Ginsiling sang kasulatan nga ang magpanuktok, pagasabton, ang magpangayo, pagahatagan, ngaa sa masami waay man ginahatag sang Dios ang akon ginapangayo sa iya - nagpangamuyo ako nga bayaan sang akon bana ang iya pagpahubog, ngaa waay man may natabo;  nangamuyo ako nga ang akon kabataan manginmatarong, ngaa may drug addict ako nga bata, diin ako nagkulang?  These stories are not expected because this is not what the bible says, at least not the way I understand what the bible says, but they continue to happen in our lives everyday, they defy logic, they defy the logic of the way things should be.

Ginasiling sa aton nga amo ini ang matuod nga simbahan; ‘ti ngaa nga may mga katoliko nga tiko gid ang paminsaron, ngaa ang masami nga nagapangurakot, nagapamatay, nagabuhat sang krimen, amo lang  ang pareho ko nga katoliko, ngaa may mga pari nga iskandaloso nga ila pangabuhi, ngaa ang simbahan lain ang iya ginawali, lain man ang iya ginabuhat?  Tuluka ang pangabuhi naton subong, ang kaimolon nga nagapabilin kag nagapaantus sang isa ka Kristiano nga nasyon  - they defy logic, I did not expect these stories to happen, waay ko ini ginapaabot nga matabo, apang amo ini ang natabo kag nagakatabo, kag ini nagatublag sa akon, kag posible nga ini nagapapatay ahat sang akon pagtuo.

Ginasiling nga isa ka malipayon nga pangabuhi ang pagpuyo upod sa Ginoo, ‘ti ngaa nagdamo na gid ahat ang akon mga trials sang pagpuyo ko upod sa Ginuo, nagdamo na gid ahat ang akon palaligban?  Siling nila ang pangamuyo isa ka pagpahuway, prayer is a loving communication with the Lord.  Loving . . . ti ngaa nga kon magpangamuyo ako natak-an ako, daw ginatutdan ang buli ko, ngaa nga nabudlayan ako magpangamuyo?  Siling nila ang Dios maayo, nga kon maayo ka sa iya hatagan niya ikaw sang grasya kag indi niya ikaw pagpabay-an; ti ngaa may cancer ang akon iloy, ngaa naputo ang akon negosyo, ngaa pirme lang ako dimalas. They defy logic, waay ko ini ginapaabot nga matabo, waay ako sing sabat sa sini nga mga pamangkot, apang ini padayon nga nagakatabo, ini nagahatag sing kakibot, ini nagakatublag sang akon pagtuo pareho sang pagkatublag sang pagtuo ni Tomas.

Bilang pari ninyo kamo nagakadto sa akon sa pagpangita sang sabat sa sini nga mga pamangkot, apang ginakasubo ko sa pagsiling nga kasubong sa inyo waay ako sing sabat, kay katulad ninyo ako Kristiano man nga nagapangapkap sang akon alagyan.  Sa akon makitid nga panan-awan indi amo sini nga ginapromisa sa aton sa santos nga kasulatan, bilang pari ninyo makasiling ako nga indi amo sini ang binubuot sang Dios.  Apang kon ngaa kasubong sini, waay ako sing sabat, waay ako kahibalo.

Subong magduku kita sa pagpangamuyo - tanan kita magpangamuyo sa pagpangita sang kadalag-an sang pagkabanhaw ni Kristo sa tunga sang aton kagamo, sa tunga sang aton mga sala, sa tunga sang madamo nga mga waay ginsabat nga mga pangamuyo, sa tunga sining pagkahipokrito - mangamuyo kita kag pangita-on ang kadalag-an sang nabanhaw nga Kristo sa sining mga hitabo - pangita-on naton sa pangamuyo ang prueba, ang pamatuod sang iya kadalag-an.

Ginuo sang tanan, buligi kami sa pagtuo kag sa pagsalig.  Nga sa tunga sang kagamo kag kapintas, buligi kami sa pagsalig sa isa ka mahigugma-on nga Amay.  Sa tunga sang madamo nga mga frustration tungod sang mga pangamuyo nga waay nasabat, buligi kami sa pagtuo sa isa ka mabinalak-on nga Dios.  Sa tunga sang pagkahipokrito sang amon simbahan kag sang iya mga lideres, buligi kami sa pagsalig sa imo padayon nga  presensiya nga nagapabilin sa imo simbahan.  Sa tunga sang kabudlay sang pangabuhi, buligi kami sa pagsalig sa imo tago nga gahum.  Sa tunga sang kasakit tungod sang balati-an, buligi kami sa pagsalig sa imo gahum sa pag-ayo.  Sa tunga sini tanan Ginoo, buligi kami kami sa pagsiling, Ginoo ko kag Dios ko, sa pagkilala sang imo presensiya sa amon kabuhi.  Buligi kami sa pagbatyag sang imo pagkaGinoo kag sang imo pagka-Dios sa tanan nga tion, kag sa nagakalainlain nga hitabo sang amon kabuhi, Amen.