Sa tuod-tuod lang
nagalibog ang ulo ko kon ano ang i-sermon ko karon nga adlaw tungod kay kadamo
sa dapat ihambal. Una ang ebanghelyo
nahanugod kay Tomas nga apostol. Ikaduha, dapat man ipahayag ang biatiko publiko nga aton pagahiwaton pagkatapos sang sini
nga misa. Ikatlo, karon nga adlaw piesta
sa Divine Mercy nga sa masami ginadumdom sang kadam-an ilabi na gid sa a las
tres ang takna sa hapon. Kag sa
katapusan, ang ikaapat, amo ini ang adlaw nga igadeklarar ang anay Santo Papa
nga si Juan Pablo Ikaduha bilang beato ukon blessed.
Ang himuon ko
subong nga adlaw amo ang paghatag sang malip-ot nga mga pagpahayag sining apat
ka mga butang.
Una, ang
pagpangduha-duha ni Tomas nga Apostol. Sa
ikaduha nga pagpakita ni Jesus sa iya mga gintuton-an gin-agda niya si Tomas
nga igulo niya ang iya mga tudlo sa pilas nga tuga sang bangkaw sa iya kilid,
kag sa mga iangyan sang mga lansang sa iya kamot kag tiil. Ini nagapakita nga sa pagkabanhaw dala sa
gihapon ni Jesus ang mga kasakit nga iya gin-agyan, nga bisan ara na sia sa
himaya dala niya sa gihapon ang mga agi sang iya kasakit. Kon magtangla kamo sa ibabaw sang catedral makita
ninyo ang iban nga mga apostoles nga nagadala sang kabangdanan sa ila kamatayon
para sa ebanghelyo. Si San Simon
halimbawa ginapati nga gin-utod ang iya lawas paagi sa lagari. Si San Andres nagadala sing kahoy tungod kay
ginapati nga sia ginlansang sa krus pero suli.
Dira sa ibabaw sang koro may makita kamo dira nga mga santos nga may mga
higot, may ara dira nga may lansang ang iya ulo kag iban pa. Sila yara na sa langit kag ginadala nila ang
mga inagyan sang ila mga pag-antus nga daw mga tropeyo. They bring with them the symbol of their
suffering like a medal, a badge of honor, a trophy before God’s throne in
heaven. Ti kon mapatay kita, ano iya ang
aton dala, ano nga tropeyo ang aton ipresentar sa Dios bilang aton pamatuod nga
kita nagpangabudlay para kay Kristo. Ano
iya ayhan ang akon dala? Sang ginpamangkot
ako sini sang isa ko ka istudyante dayon ko sabat - luy-a. Ngaa luy-a?
Kay man amo ini ang ginahampol ko sang una sa akon arthritis kon
magtam-an na ka sakit. Ti kon magsantos
ako nagabitbit ako luy-a. Daw kalaw-ay
no. So mangita kita sang aton
tropeyo. Ano bala ang ipresentar ko kay Kristo
bilang marka sa akon lawas tungod sang akon pagpangabudlay para sa ebanghelyo? Ano ayhan ang akon kag ang inyo?
Ikaduha, karon nga
adlaw biatiko publiko. Ginatipon ang mga
nagamasakit sa duha ka balay diri sa Jaro agod nga matuman nila ang ila
obligasyon sa sining panahon sang pagkabanhaw - ang obligasyon sa
pagkalawat. Nagapasalamat kita sa
panimalay sang mga Ledesma kag mga Jalandoni nga nagapadayon sini nga
tradisyon. Bisan matuod nga sa tagsa ka
mga barangay naton may ginahiwat na kita nga biatiko publiko sa tagsa ka tuig
kon sa diin ginapakonpesar naton ang mga nagamasakit kag mga tigulang,
ginabadlisan kag ginapakalawat, ining seremonya nga pagahiwaton naton tapos
sang misa isa ka reminder sa aton nga may obligasyon kita sa mga nagamaskit kag
mga tigulang sa aton mga puloy-an kag panimalay. Kay kon kaisa nagadumdom kita nga mapatumar
lang naton sila sing bulong kag mapakaon tuman na ina. Indi lang amo sina ang kinahanglanon sang mga
nagamasakit kay ang bulong kag pagkaon para lang sa lawas, pero dumdomon naton
nga kita may kalag - may katungdanan kita nga saguron, kag masagod ang kalag,
may katungdanan kita nga mabulong indi lang ang lawas nga mapatay kundi may
labing daku kita nga obligasyon nga mabulong ang kalag nga magakabuhi sing
dayon. May utang kita nga kabalaslan sa
aton mga katigulangan kag sa mga nagamasakit, nga aton maatipan indi lang ang
ila lawas kundi ilabi na gid ang ila kalag.
Iban sa aton da panaminami gid kita lungon, pamisa-misa kita sa madamo
nga mga pari, padamo-damo bulak - pero anhon mo ina kon ang napatay wala
nabadlisan, wala nakakonpesar, wala nakakalawat. Kon si Msgr. Nilmar pa sang una, masiling na
sia, ay inday bisan sabyahan mo na ka bendita ang lungon kon wala ina
nakakonpesar kag nakakalawat sang biatiko wala pulos ina nga bendita. Ti bahala kamo da.
Ikatlo, ang piesta
sang Divine Mercy, ang piesta sang diosnon nga kaluoy. Ginasaulog naton ini nga piesta sa
pagpadumdom sa aton sang kaluoy sang Dios nga dapat naton saligan. Jesus I trust in you. Pero isa pa gid ka reminder sa aton sang
diosnon nga kaluoy amo nga kita magmangin maluloy-on sa isa ka g isa. To become merciful to each other. Dumdomon naton nga ini nga debosyon nagtuhaw
sadtong world war two, sadtong tion nga ang kapintas sang tawo sa iya
isigkatawo tuman gid kaayo. We are reminded
not jsut of the mercy of God but also to be merciful to each other, to be
sensitive to the needs of each other. We
are invited to be sensitive, mabinatyagon.
Hinaya lang radyo mo kay nagakatulog na ang iban. Patya cellphone mo kay nagapangadi ang iban. Kis-a wala na gid pasuna-id ang iban sa
aton. Ang aton lang ang ginapanumdum
naton. Limpiyohi maayo ang imo tangkal
kay nagabinaho to sa imo mga kasilingan.
Kita mo nga nagabulubakintol, buligi man. Ti sigi, untaton ko na ining akon sermon, kay
iban sa inyo nagadali na mapuli kay madigamo pa. Na amo ina ang kaluoy - sensitivity,
mabinatyagon sa balatyagon sang iban.
Ti tapuson ko na
lang ini paagi sa paghimo sang announcement nga ang anay Santo Papa
pagahingadlan na nga beato karon sa hapon.
Kon sayuron ginakilala sang simbahan ang iya pagkabalaan. Gani ang tawag naton sa iya sugod subong Beato
Juan Pablo Ikaduha. Karon nga adlaw
makasiling kita nga mga taga-jaro nga once in our life nakakita gid man kita
sang isa ka santo kag yadto nga santo nagtener diri upod sa aton sa isa ka
gab-i. I-ampo naton nga kabay pa buligan
kita ni Beato Juan Pablo - Blessed John Paul II, igampo mo kami.
No comments:
Post a Comment