1st sun advent A I

Subong ginasugdan na naton ang pagsaulog sang panahon sang Adbiento.  Kon sayuron para sa kalabanann sa aton lapit na ang Krismas kag siyempre ang 13^th month.  Subong kon manutahan ninyo nagadulom na ang panahon, nagalawig ang kagab-ihon, ang mga krismas light ara na, ang krismas tree amat amat na nga nagaguwa.  Yari na kita sa panahon sang adbiento, indi pa ini Krismas kundi Adbiento. 

Ano kon sayuron ini. Adbiento halin ini sa tinaga adventus kung sayuron ang pagkari, the arrival.  Gani sang una kon magsiling sila adventus, ini nagakahulugan nga nag-abot na ang emperador kung sa aton pa subong si President Joseph Estrada nag-adventus kahapon – nag-abot sia kahapon.

Pero gin-islan sang una nga mga Kristianos ang kahulugan sini.  Imbes nga nag-abot ginhimo nila ini pag-paabot, imbes nga nagkari na, ginhimo nila paghulat sa pagkari.  Kag amo ina subong ang kahulugan sang Adbiento.  Ang Krismas amo ang pag-abot, ang Adbiento amo ang pagpaabot.

Ano ang aton ginapaabot sa sining panahon sang Adbiento?  Sin-o ang aton ginahulat nga magkari?  Isa lang ka persona ang aton ginapaabot si Kristo – apang ginapaabot naton sia sa duha niya ka sahi sang pag-abot – ang iya pag-abot sadtong nahauna nga Krismas kag ang iya ikaduha nga pag-abot  sa katapusan sang panahon.  Halin subong tubtub sa Diciembre 16 sa nahauna nga adlaw sang Aguinaldo nagapamalandong kita kag nagahanda sang ikaduha nga pag-abot sang Ginoo.  Kag sa Aguinaldo nga misa tubtub sa Diciembre 24 nagpamalandong kita kag nagahanda agud nga masaulog naton sing himpit ang iya nahauna nga pagabot diri sa kalibutan didto sa belen.  Gani duha ini ka butang – indi lang ini Krismas ukon ang nahauna nga pagabot apang lakip man diri ang pinakaimportante sa tanan - ang pagkari liwat ni Kristo.

Ang pagsugod gid sang Adbiento amo man ang bag-o nga tuig liturhiko sang simbahan – diri iya gasugod ang bag-o nga tuig sang simbahan kag indi iya sa new year sa kalendaryo sibil (Year A).  Gani subong ginasugdan man naton ang Year of God the Father.  Kadamo sang aton ginasaulog subong no – naintiendihan nyo man?  Indi bala ginsuguran naton ini nga paghanda duha na katuig ang nagligad – una year of Jesus Christ 1997, tapos sadto year of the Holy Spirit 1998, kag subong year of God the Father 1999.  Preparasyon ini tanan para sa paghiwat sang Jubilee sang aton kaluwasan sa year 2000.

Si Kristo nagkari sa pagpakilala sa aton sang amay – paagi sa iya binuhatan sa iya pagalagad, paagi sa pagtugyan ni Jesus sang iya kaugalingon sa kamatayon ginpakaita niya sa aton ang gugma sang amay.  Amo ini ang rason kung ngaa daku nga piesta ang krismas para sa aton – ginpakilala ni Kristo ang amay sa aton – sino ang Amay – ang Amay kag ako isa lang – kon makilala naton si Kristo makilala naton ang amay – ginpakita niya ang amay sa aton tanan.

Si Kristo magakari liwat sa pagdala sa aton pauli sa aton amay.  Amo ini ang rason kon ngaa ginahandaan naton ang iya ikaduha nga pagabot – he will bring us back home to our Father.  Kita mo kong nabatian ninyo ang aton kalantahon sa pagsabat ini nagasiling, I rejoiced when I heard them say, let us go to the house of the Lord. Isa ini ka sadya nga panahon tungod kay ini isa ka pagpaabot sang adlaw nga kita pagadal-on liwat sa balay sang aton amay.  Matuod ang balasahon kululbaan – pero amo ina ang rason ni Mateo - ginapakita na niya nga daan ang matabo agud nga indi na kita mahadlok sini nga hitabo kay nakahibalo na kita nga ini bahin sang aton alagyan panganlitan kita magapauli na sa aton balay upod sa amay.  Para sa akon amo ini ang kahulugan sang adbiento, ginaremind kita, nga nagapanglakaton kita diri sa duta pauli sa aton matuod nga balay upod sa amay – we are all going home.