4th sun of advent B

May isa anay ka Maryknol nga pari nga pagkatapos sang 20 ka tuig sa prisohan sang mga komunista ginhilway sia.  Kag ang una niya nga ginbuhat amo ang pag-husisa kon bala buhi pa ang Kristianismo sa iya pungsod pagkatapos sang malawig nga tinuig bilang komunista.

Gani pagguwa niya sa dalan una niya nga nasumalang amo ang isa ka 11 anyos nga bata kag gani iya sia pinamangkot:  “Toto, nagatuo ka bala ka Jesukristo.”  Ang bata nagpundo kag nagtulok sa iya sing masakit kag pagkatapos sang malawig nga hulat nagsabat:  “waay, waay ako nagapati kay Jesukristo mo.”  “Ngaa toto?” pamangkot sang pari, “ngaa waay ka nagapati kay Jesukristo.”  Kag ang bata nagsabat:  “Indi bala nga ang Dios naghimo sang elepante kag ang elepante naghimo sang iban pa gid nga mga elepante?  Ang Dios naghimo sang manok kag ining manok nangitlog kag naghimo pa gid sang iban pa gid nga manok.  Ang Dios naghimo kay Jesuskristo, pero ngaa waay man ako may nakita pa nga iban nga Kristo - ang nanay ko palasugal, ang tatay ko palahubog waay sila panahon para sa akon, ang mga kautoran wala man sa balay - gani waay ako nagapati sa imo Jesukristo, kay wala ako sing makita nga iban pa gid nga Kristo.”

May isa man anay ka nanay nga nagsugid sini nga istorya.  Isa ka gab-i kuno sang nagasugilanon sila sang iya bata nga babayi, gulpi lang nga hinakos sia sang iya bata  nga nagasiling - “nay’ mas maayo pa ikaw sang sa  Dios , mommy you are better than God.”  “Hoy, inday,” sabat sang nanay, “sin-o ang nagtudlo sa imo sina, indi ka magsiling sina.” 

“Pero nay, tuod nga mas maayo ka pa sang sa Dios.” 

“Kag ngaa nakasiling ka sina?” pamangkot sang nanay.  Kag nagsabat ang iya bata, “Tungod kay mahakus ko ikaw nay.”  Kag hinakus niya sing mas hugot ang iya nanay.

Sang si David nagplano sa paghimo sang matahum nga templo, sang puloy-an para sa Dios, agod nga mapadumdum pirme ang katawohan sang Israel nga ang Dios yara sa tunga nila, wla sia gintugutan sang Dios.  Sa baylo nagpromisa ang Dios nga paagi kay David, paagi sa linahe niya, ang Dios magapuyo sa iya katawohan; paagi kay David, paagi sa linahe niya  ang Dios magahatag sing paghidait kag kauswagan sa iya katawohan; paagi kay David, paagi sa iya linahe, ang Dios maga-pauntat sang mga pag-antus sang iya banwa; kag paagi kay David ang Dios magahatag sing pahuway kag kalipay sa iya katawohan.  Indi paagi sa templo, indi paagi sa simbahan nga bato nga mabatyagan ang presensya sang Dios sang iya katawohan kundi paagi kay David, paagi sa linahe ni David.  Amo ini ang buot silingon sang Imamnuel.

Nahangpan nyo na bala ang mga istorya nakon kaina? 

Ang Dios Immanuel - sia nagapuyo upod sa aton. Apang ang Dios nagpili nga usaron si David kag ang iya mga kaliwat agod mabatyagan sang katawohan ang kabalaka, ang pag-atipan kag ang presensya sang Dios.  Ginpili sang Dios labaw sang sa mga bato sang templo kag labaw sang sa mga krismas lights, ginpili niya ang tawo mismo, ikaw kag ako, agod nga sia makita kag matandog sang iya katawohan.  Luyag niya nga matawo sa aton taguipusuon.  Luyag niya nga mabatyagan sang iban ang iya presensya paagi sa aton, nga sa aton paggahom makita sang iban ang kaluoy sang Dios, nga sa aton panghambal mabatian sang iban ang kalulu sang Dios, nga sa aton pagpaambit sang aton pagkabutang sa iban mabatyagan nila ang kaalwan sang Dios.  Amo ini ang matuod nga kahulugan sang Immanuel - ang Dios kaupod naton, nga si Kristo nagahimo sang iban pa gid nga Kristo.  Immanuel - nga mapakita naton nga ang Dios sarang hakson, nga sia isa ka Dios nga puede mahakus dira sa aton.

Ginasiling nga si Maria antes niya ginpanamkon si Jesus sa iya taguangkan, ginabaton na niya si Jesus sa iya tagipusoon, ginpatawo na niya si Jesus sa iya buluhaton, sa iya kabalaka, sa iya pagpabilin nga bukas sa kabubut-on sang Dios. 

Subong sa sining katapusan nga Domingo sang aton paghanda sa pag-abot sang Ginoo, magduku kita kag mangayo sing patawad sa iya.

Sa mga bes Ginoo nga mas ginpasulabi pa namon nga patahumon kag pintahan ang simbahan nga bato sang sa patahumon namon ang amon kabuhi paagi sang mga birtud sang paghigugma kag kaalwan, patawara kami Ginoo.

Sa mga bes nga mas ginpasulabi pa namon nga butangan sing mga suga kag mapasanag ang amon simbahan, plaza, kag balay, sang sa mapakita ang imo kasanag paagi sa amon maayo nga mga binuhatan, patawara kami Ginoo.

Sa mga bes nga ginpasulabi pa namon nga maghalok sa Niño sa hayub-hayub sang Belen, sang sa paghatag sing pagtamod sa mga nagakinahanglan dira sa madamo nga mga hayub-hayub sa amon palibot, patawara kami Ginoo.