epiphaniya; ang pagpahayag sang ginoo A

Si Jesus waay gid nakaagi lantaw sang basketball.  Gani isa ka adlaw gindala siya ni Juan sa cuneta astrodome sa paglantaw sini.  Amo na ini ang championship, sa best of seven nga ginahampangan sa tunga sang mga Protestant Alaska kag Catholic San Miguel.  Sa ngalan sang mga humalampang makita na naton nga ini hampang magapakita kon sin-o ang pinakamabakod nga relihyon - ang Protestant Alaska bala ukon ang Catholic San Miguel. Didto makita naton si Msgr. Piamonte nga halin pa sa Jaro nangin coach sang Catholic San Miguel kag didto man makita si Chief Pastor Calasara nga halin pa sa CPU nangin coach sang Protestant Alaska.  Madamo ang tumalan-aw kag upod didto si Jesus nga nagalantaw kon ano ini ang hampang nga basketball.  Mainit ang hampang kag ang una nga nakapasulod sang bola amo ang Catholic San Miguel.  Si Jesus nagtumbo sa iya pulungku-an kag nagbirabira cheer para sa ila.  Sa dili madugay ang Protestant Alaska naman ang nakapasulod sang bola, kag si Jesus nagtumbo-tumbo sa iya pulungkuan kag nag-cheer naman sing matunog.  Natingala gid ang nagalantaw sa iya likod kag nagpamangkot, “Excuse me sir, sin-o ang ginaapinan mo?”  “Ako,” hambal ni Jesus, “waay ako may gina-apinan.  Ari ako diri para mag-enjoy sang hampang.”  Kag ang nagpamangkot nagbalikid sa iya upod kag naghutik, “Balimbing!” dala ang tudlo kay Jesus.

Pagkatapos sang hampang ginpamangkot siya ni Juan kon bala waay gid man sa iya pamatasan ang pag-apin sa mga contrahanay. Kag si Jesus nagsiling, “Naga-apin ako sa tawo kag indi sa relihiyon.”

Mga utod subong bisan sa aton parokya makita naton ang iskandalo ang nagakatabo sa aton Kristianismo - ang iskandalo sang pagbinahinbahin.  Ang relihiyon nga nagatudlo nga kita maghigugmaanay nagabulag sang aton katilingban bisan pa sang aton panimalay.  Madamo nga mga pagbinaisay ang nagakatabo sa opisina, sa balay, sa mga tiendahan, sa radyo, sa mga calle kon ano gid ang sakto nga relihiyon.  May yawyawanay nga nagakatabo, sa iban nga bahin may patyanay nga nagakatabo.  Kag sa aton mismo katilingban kag panimalay nagatuga ini sang di-pagsapakanay, kag pagpakanubo sa isa kag isa.  Ang kristianismo ginpundar sa pagtudlo sang paghigugma, apang ang resulta subong amo ang pagirinaway kag pagtamay.  Kag dugan pa diri may mga organisasyon kita diri sa parokya nga nagapaindisindis sugid kon sin-o gid bala sa ila ang sakto kag may maayo nga pamaagi.

Ang kapiestahan subong sang Epiphaniya nagapahayag sa aton nga ang kaluwasan indi lamang para sa isa ka grupo, indi lamang maangkon sang isa ka grupo.  Sa aton ebanghelyo ang una nga mga tawo nga ginpahayagan sang Ginuo sang iya kaugalingon, amo ang mga mangin-alamon halin sa sidlangan.  Nagapahayag ini nga si Kristo ginpadala indi lamang sa isa ka rasa kag indi lamang sa mga Israelinhon, kundi ginpadala siya para sa tanan. Apang ang kamatuoran nga ginpakita sa aton istorya amo ang realidad naton subong.  Sa masami daw ginapilit naton si Kristo nga magsuporta kag mag-apin sang aton mga kawsa, sang aton relihiyon, sang aton organisasyon, sang aton mga pamaagi, sa bagay nga ang iban nga indi miembro sang sina nga sahi sang relihiyon, sa sina nga sahi sang organisasyon, indi ka man maluwas. 

Ang kaluwasan para sa tanan.  Kag si Kristo yara sa tanan nga nagapangita sa iya nga may sincero nga taguipusuon.  Ang ginapakamahal sang Ginuo amo nga kita tanan mag-isa, mga mag-ulolotod sa isa lamang ka Amay.  Nga kita tanan protestante man ukon catoliko, Muslim man ukon Kristiano makabuligay sa pagpatigayon sang katin-aran sang tawo.

Ano karon ang aton buhaton agud nga ang Epifania sang aton Ginuo mangin mapuslanon para sa aton tanan.

Una, ang pagtahod sang pagtuo ukon sa pamaagi sang iban sa pagsimba sa Dios.  Luyag ko lang diri i-emphasize nga ang waay nagatahod sa pagtuo sang iban, nagapkita lamang nga siya indi sincero sa iya pagtuo.  Ang pagtahod sa pagkatawo sang iban, lakip diri sang iya mga panindugan kag pagpati, bahin sang kasugoan sang paghigugma.  Ang pag-atake, ang pagtamay sang iban tungod sang ila pagtuo, batok sa pamatasan sang tanan nga relihiyon.  May ara man iya for example nga nagprotestante ang ila mga ginikanan, kon mapatay naga-insistir gid nga bendisyonan sang katoliko.  May ara man iya nga nagborn again ang mga kabataan, kon mapatay ang ila ginikanan nga katoliko indi nila pagpamisahan sa katoliko - ini nagapakita nga waay kita pagtahod sa pagtuo sang iban - nagapakita lamang nga indi kita sincero sa aton pagtuo.  To prove nga sincero ka kag conbinsido ka sa imo ginatuohan indi na kinahanglan nga magdebate ikaw, indi na kinahanglan nga mangtamay ikaw sa mga waay nagatuo sang imo ginatuohan, indi na kinahanglan nga magbarefoot procession ikaw nga may mga placards to make your point, indi na kinahanglan nga isinggit nimo ukon mangwak-li ikaw sang iban.  Ikabuhi ang imo ginatuohan, kag tuman na ina.  Ikabuhi lang ang imo pagtuo.  Maghigugma ka, magmangin matinahuron ka.

Ikaduha, may ara man iya nga dumdum nila palareho na lang ang  nga relihiyon.  Masiling sila palareho man lang ina ang tanan hagi ka gid paggamo.  Ano pa kon kaisa kon magsunggod kita sa pari kahapos lang sa aton magsiling nga masaylo na lang kami relihiyon.  Para sa akon amo ini ang mga tawo nga indi convincido sa ila pagtuo, mga tawo nga waay tinindugan, ukon mga tawo nga waay nakahangop sang ila pagtuloohan.  Mga utod, ginapahayag ko ini kay kung indi kita conbinsido sang aton iya gintuohan bilang katoliko, indi man kita  makatahod sang pagtuo sang iban.  Indi kita makaappreciar sang pagtulon-an sang iban.  Gani tun-an naton ang aton pagtuo, i-review naton ang aton catechesis.   Indi lamang kita magsiling kon ginapamangkot kita kon ngaa nagatuo kita sini, indi lamang kita magsiling “kay amo na ya ang ginatudlo sa amon.”  Understand your faith, learn to explain it kay indi kita makaapreciar sang sinceridad sang iban sa ila ginatuohan kon indi man kita conbinsido sang aton ginatuohan.

Ikatatlo, Let us work together for the good of all regardless of our beliefs.  Mag-ugyon kita sa pagbulig sa mga nagakinahanglan bisan pa lain-lain ang aton pagtuo, kag bisan pa la-in ang pagtuo ang aton ginabuligan.  Ang Ginoo nagsiling nga higugma-on naton ang tanan, tahuron naton ang tagsa tagsa kag indi lamang ang pareho naton nga katoliko. 

Pamalandongan naton ini.