3rd sun of easter A

Ang aton ebanhelyo subong nagalarawan sang aton Ginuo nga isa ka Maayo nga Manugbantay.  Amo ini ang pinakamatahum nga imahen sang Dios sa Santos nga Kasulatan.  Apang maintiendihan lamang naton ini kon nahangpan naton ang papel kag pamatasan sang isa ka manugbantay sang karnero sa kahimtangan sang mga tawo sang una, sa tiempo sang Ginoo. 

Si Fr. Arthur Tonne sa iya libro nagsaysay anay sang isa ka insidente nga makabulig sa aton hangop sining mga dinalan.  Siling niya:  May isa anay ka turista nga Americano nga nag-sightseeing didto sa Syria, sa Middle East.  Kag didto may nasumalang siya nga tatlo ka mga manugbantay sang karnero nga nagdala sang ila panong nga dululungan sa pag-inom didto sa isa ka suba.  Pagkatapos nga makainom ang mga karnero, ang isa sa mga manugbantay nagsinggit, “men-ah, men-ah” nga kon sayuron, “lakat kamo, sunod kamo sa akon.”  Kag ang iya lamang mga karnero naglakat kag nagupod sa iya bisan nagasilimpon ini sila sa suba. Pagkatapos sini, ang ikaduha nga manugbantay nagpanawag naman sa iya mga karnero nga nagasiling, “lakat kamo, sunod kamo sa akon!” Kag sa gilayon nagsunod  sa iya ang iya mga karnero kag ang manugbantay naglakat nga waay nagabulubalikid.  Waay gani niya gin-isip kon igsakto ang mga karnero nga nag-upod sa iya kay nakahibalo siya nga ang iya lamang karnero ang magasunod sa iya.  Ang turista natingala gid, gani pinalapitan niya ang manugbantay kag nagsiling:  “Abi pahulama ako sang imo kunop, sang imo turban kag sang imo sungkod kay ako man ang magapanawag sa imo mga karnero.”  Ginpahulam siya sang manugbantay kag ang turista nagsinggit sa linguahe sang mga manugbantay “Lakat kamo, sunod kamo sa akon.”  Apang ang mga karnero waay nagsapak sa iya.  Ginliwat niya ang iya panawagan. Apang amo man sa gihapon ang natabo.  Waay ginkilala ang iya tingog kay tingog ini sang isa ka istranghero. Gani ang turista namangkot:  “Tiyoy ang imo karnero, waay gid bala sila nagasunod sa iban luwas lamang sa imo?”  Ang manugbantay nagyuhum kag nagsiling:  “Ah, kon kaisa may mga karnero man ako nga tam-an ka masakiton kag gani nagasala sila kag nagasunod  sa iban nga tingog.”

Mga utod ang Ginoo amo ang maayo nga manugbantay.  May duha ini ka mensahe para sa aton.  Una, ginapahayag sa aton ang pamatasan sang manugbantay sa iya mga karnero kag ikaduha, ginasaysay sa aton ang pamatasan sang mga karnero sa ila manugbantay. 

Una, kon ang aton Ginoo maayo nga manugbantay, ini tungod kay nakilala niya ang iya panong, ang iya mga karnero kag handa siya nga maghalad sang iya kabuhi para sa ila.

Mga utod ang pagkilala, to know sa paghangop sang biblia indi katulad sang aton pagpangilala subong, nga makapamangkot lamang kita sang ngalan, idad, trabajo, itsura tama na ina nga pangilala.  Indi amo sini.  Ang pagkilala sa Biblia daw katulad sang pagasawahay, ilabi na gid sang dugay na gid nga pagasawahay.  Nakilala sang asawa ukon sang bana ang karacter sang iya esposa, ang iya pamatasan, kag kon kaisa ang iya panghunahuna kag mga reaksiyon.  Amo man ini ang pagkilala sang aton Ginuo ang maayo nga manugbantay sa aton tanan kag mas sobra pa gani diri.  Kilala niya ang aton bug-os nga pagkatawo, ang aton mga tinutuyo, ang aton bug-os nga balatyagon kag ang aton mga ginahangad. bisan indi pa kita mahangpan sang aton na gid suod nga abyan. Nahangpan niya ang aton mga ginabuhat, ang aton mga kapaltahan, ang aton mga kinahanglanon.  God sees through our hearts and He knows our deepest yearnings and intentions.

Mga utod daku ini nga konsolasyon para sa aton tanan.  Sa tion sang kapiotan sang aton kabuhi nakahibalo kita subong nga may nakahangop sa aton, may nagabatyag sang aton man ginabatyag. May magapamati sa aton nga makahangop bisan indi pa kita mahangpan sang iban.  Jesus knows me like no other even though I feel seperated from others, rejected and misunderstoood.  But deep inside I know that I am never alone, for Jesus is with me, afterall He is my Good Shepherd.

Mga utod amo ini ang rason kon ngaa ang imahen sang Ginuo nga maayo nga manugbantay isa sa mga pinakamatahum nga imahen sang Dios.  Ini tungod kay nagapakita ini sang realidad sang iya mainonongon nga pagtatap, pag-ulikid kag paghigugma sa iya mga karnero.  Paghigugma nga indi makabatas magpabaya kag magpapulupatawhay.

Ikaduha nga punto, kon ang Ginuo amo ang akon manugbantay ti kilala ko ang iya tingog kag ako handa sa pagsunod sa iya.

Mga utod, kon ginakabig naton ang Ginoo nga maayo nga manugbantay ini nagakahulugan nga handa kita sa pagsunod sa iya tingog kay nagahambal siya sing kamatuoran. May salig kita sa iya.  Indi siya labutaw.  Waay siya nagapanunto.  Waay siya nagapromisa sang mga butang nga indi man niya pagatumanon.  Nakahibalo ako nga bisan kon tani may luyag ako nga buhaton, may nanami-an ako nga buhaton, apang kon magpanawag ang Ginoo dapat untatan ko ini kag sundon ko sa gilayon ang iya tingog, kay Siya nakahibalo sang akon taguipusuon kag kon ano ang maayo para sa akon.

Tungod kay siya amo ang akon manugbantay magapamati ako sa iya.  Magapamati ako sa iya sa santos nga kasulatan.  Magapamati ako sa iya sa iya panawagan sa akon sa santos nga misa, sa mga ginatudlo sang simbahan tungod kay nakahibalo ako nga kon nagapamati lamang ako sa iya indi gid ako magtalang, indi gid ako pagpabayaan.

Mga utod, ang Ginuo amo ang aton manugbantay. Kon yara kita sa iya indi gid kita makulangan. 

Mga utod sa daan nga testamento ginatawag man nila ang ila mga lideres nga maayo nga manugbantay.  Ini tungod kay gintugyanan sila sang Dios sang responsibilidad sa pagtatap, sa pagkabalaka kag sa pagpatigayon sang ila kinahanglanon.  Ginatawag ang mga lideres sang Israel nga mga Manugbantay tungod kay ginapaabot sang Dios nga ang mga tawo magpamati sa ila kag magsunod sa ila. 

Buas nga adlaw maga kadto kita sa mga presinto kag magapili sang aton mga kandidato, mga kandidato nga mangin manugbantay naton sa atonkatilingban. Himuon naton ini mga utod nga isa ka serioso nga ehersisiyo.  Indi lamang ini naton pagpatarasakan.  Panumdumon naton, ang aton ginapili amo ang magapadalagan sang aton kabuhi, sila mangin aton manugbantay sa sulod sang tatlo ka tuig kag ang ila nga pagabuhaton kag indi pagbuhaton sa puesto, maga-influensiya bisan lamang sang magamay nga butang pareho abi sang bili sang kalamay hasta sa sahi sang edukasyon nga pagabatunon sang aton mga kabataan.

Sa aton pagboto, pamalandungan naton ang pamatasan sang Maayo nga Manugbantay kag pili-on naton ang mga tawo nga sa banta naton may pamatasan, mga characteristic nga katulad sang Maayo nga Manugbantay.  Matuod indi sila makatupong sa aton Ginuo kay tawo man lang sila.  Apang pamangkuton naton ang aton kaugalingon kon bala, at least may kaanggid siya sa isa ka maayo nga manugbantay kay sila mangin manugbantay man sang aton banwa. Katulad bala sila sang Ginuo nga nakakilala sa aton, sang aton mga kinahanglan?  Nagakabalaka gid bala sila sa aton?  Handa bala sila sa paghalad sang ila kabuhi, sa pagsakripisyo sang ila panahon para sa pagpatigayon sang aton mga kinahanglanon? Katulad bala sila sing Maayo nga Manugbantay nga waay nagapanunto, nagatuman sang ila mga promisa?

Mga utod, husisaon naton ini nga mga pamatasan agud ang aton mapili-an isa ka manugbantay nga may taguipusuon katulad ukon kaanggid na gid lang sang aton Maayo nga Manugbantay.

Subong man, pamangkton man naton ang aton kaugalingon.  Kita mga karnero nga dapat magpamati sa aton Maayo nga Manugbantay.  Sa tion sang eleksiyon ano gid bala ang aton ginapamati-an?  Ano gid bala ang aton ginasunod?  Ginasunod ta bala ang tingog ni Kristo ukon ang lagting sang kwarta nga ginapanagtag sa eleksiyon?  Ginasunod ta bala ang maayo nga tingog sang aton konsiensiya sa pagboto ukon ginsunod naton ang mga kandidato tungod lamang sang ila popularidad, sang ila katahum ukon sang utang nga kabalaslan?  Kita nga mga karnero, sin-o gid bala ang aton ginasunod.  Basi katulad kita sang mga karnero sa aton istorya nga may malubha nga masakit sa espiritu sa bagay nga indi na sila makahangop kag nagasalasala kon bala tingog pa ini sang Dios, sang aton kaalam ukon tingog lamang sang kadalok, kasakon, kag ahaw nga mga emosyon? 

Mga utod, sa tunga sining kalinong mangayo kita sang guiya sang aton Maayo nga Manubantay.  Itugyan naton ang aton panghunahuna sa iya kay nakahibalo kita nga siya magaguiya sa aton padulong sa kamatuoran.