ascension A

Siguro nakakita kamo sang sine nga Gladiator.  Isa ini ka sports anay didto sa Roma.  Kon mahilig kamo magbulang daw amo amo man sini ugaling ang ginapaaway indi manok kundi tawo.  Ginahatagan sila sang armas, ispada, wasay, batuta bisan ano lang gna armas, ginapa-away kag madag-anay lamang kung mapatay na ang isa.  Isa ka adlaw may isa ka tigulang nga tawo nga bag-o lang mabunyagan nga Kristiano kag sa iya pagpamalandong daw indi gid magsanto nga ang isa ka Kristiano magtolerar lang sang sini nga sahi snag entertainment.  Gani siling niya untaton naton ini nga hampang.  Ang iya mga kaupdanan naglungolungo lang.  “Tyoy siling nila imol ka lang nga tawo, indi ka opisyal sang ciudad, bisan tanod lang waay ka gid rangko kag isa pa, isa ka lang paano mo mapauntat ini nga hampang kontrahon ka sang tanan.”  Apang ang tigulang nga Kristiano indi mapakali.  Against all odds siling niya “dapat tapnaon ko ini nga hampang kay indi bagay nga magpatyanay ang tawo agud ma-intertinar lang ang iban.”  Gani nagkadto sia sa Roman coliseum.  Kag didto sa pagkadamo nga mga tawo ang nagtambong agud maglantaw sang sini nga sahi sang hinampang.  Sang hana na nga magsugod ang away, samtang nagahanda na nga maglab-anay ang duha ka gladiators hinali lang nga may naglumpat sa arena kag nagpatunga sa duha.  Kag sa matunog nga tingog nagsinggit sia, “Indi bagay nga ang tawo magpatay sang iya isigkatawo agud maghatag sa aton sing kasadyahan.  Sala sa Dios ang magkuha sang kabuhi.”

 

Ang mga tawo naghipos kay nakibot kag sa hinali ang tanan nagkadlaw kag gin-buyayaw nila ang tigulang.  Apang padayon siya nga nagsinggit nga nagatambag sa duha ka gladiators.  “Sala sa Dios ang pagpatay sa isigkatawo.”  Kag sa hinali linabo sia sang duha ka espada.  Kag samtang nagatururagay ang dugo sa iya ulo kag sa iya dughan suminggit pa gid siya “sala ang pagpatay sa aton isigkatawo para lamang sa kalingawan.”  Kag natumba sia kag napatay.  Sa gilayon ang singkwenta mil ka tawo sa coliseum naghipos.  Malawig nga paghipos samtang ginatulok nila ang bangkay sining tigulang nga tawo.  Ang mga gladiators nagtulok man sa iya.  Kag sa amat amat, isa isa naguwa ang mga tawo sa coliseum.  Kag sugod sadto nag-untat na ang hinampang sang mga gladiators.  Kag sa istorya sang Roma amo yadto ang katapusan nga palagua-on sang mga gladiators.

The power of one.  He was the power of one.

Kadamo sang problema sang kalibutan, bisan na gid lang diri sa aton palibot.  Ano ang mahimo ko?  The power of one.

Ultimo man lang ako nga pumuluyo, waay ako sang tingog, waay ako rangko, ano ang ikasarang ko nga mahimo agud masolbar ini nga problema?  The power of one.

Taas na naman ang gasoline.  Mataas naman kuno ang plete.  Taas na man ini ang balaklon.  Sweldo ta waay man gataas.  Maayo pa pari may offering karon nga dala?  Ano na lang ni ang aton pungsod?  Ano gid bi ang ikasarang ko agud matapna ini nga problema sang aton pungsod.  The power of one.

Basura bisan diin lang ihaboy.  Kung magdulomdulom kadto sa suba nga itagbong, kalapad nga basurahan ba.  Ano gid bi ang mahimo ko, indi man ako opisyal sang baranggay.  Kag ano gid bi ang ikasarang ko agud matapna ko ini? The power of one.

Bay-i da sila natak-an na ako sa pamilya nga ina.  Patyanay da sila kon gusto nila.  Ngaa paryente ko na sila.  Waay man ako panublion sa ila.  Kag sin-o gid abi ako.  Waay man ako sina may mahimo sa ila?  The power of one.

Ang aton katilingban amo man sa gihapon.  Schedule sang BEC waay man may naga-attend.  May aktibidades sa simbahan, ang mga tawo waay man nagakooperar.  Ano gid bi ang mahimo ko sa sini nga problema?  Indi man ako pari.  May obra pa ako.  May panimalay pa ako nga asikasohon.  Waay ako tiempo.  Kag sino gid abi ako nga manaway ako, ukon masolbar ko ang problema? The power of one.

Mga utod siling nila ang relihiyon kuno opium of the people – kon sayuron ginaulo-into ya lang ka, palipaylipay gamay, singganon ya lang ka nga antusa lang kay ang padya ato sa langit – agud indi ka hagi reklamo kag magpabilin ka lang sa sina nga situwasyon.  Pero kon husisaon mo ang history, indi amo sina ang natabo.  Katulad sang istorya kaina, nga isa ka true story, ang pagtuo nga kristiano kung ginakabuhi lang sing maayo nangin kag mangin isa ka daku nga kagamhanan nga magabaylo sang kalibutan.  Kon ginaseryoso lang naton ang aton pagtuo, may mabatian ka gid sina nga tingog gikan sa imo tagipusuon nga magasiling – may mahimo ka.  Ngaa.  Kay amo ini ang ginasiling sang Ginuo, maghulat kamo sa Jerusalem tubtob nga ang gahom gikan sa ibabaw maga-abot sa inyo.  Amo ini ang dulot ni Kristo sa aton, ang kagamhanan nga ginbilin ni Kristo sa aton sa iya pagkayab sa langit.  May kagamhanan kita.  You, we have the power.  And the power of one can become the power of two, and the power of two can become the power of three, and four and five asta nga ang bug-os nga katilingban mangin isa ka makagagahom nga katilingban nga napun-an sang gahom ni Kristo nga magabaylo sang nawong sang kalibutan.  You have the power.