5th sun of easter A

Ang mga griego nagapati nga ang Dios amo ang Indi-Makita.  Ang mga Hudiyo nagapati nga ang makakita sa Dios mapatay.  Sa daan nga katipan sang biblia ang Dios nagpakita gid man kay Moises, apang ginpakita lamang niya ang iya likod kag indi ang iya guya kay ang makakita sa iya mapatay.

Gani ang ginhambal ni Jesus sa aton ebanghelyo nagtuga sing kakibot kag pagpangduhaduha sa iya mga tagpalamati.  Ang nakakita sa akon nakakita sa Amay.  Ang iya pulong, pulong sang amay, gani ang nakabati kag nagapamati sa iya, nakabati kag ang nagapamati sa mga pulong sang Amay.  Ang iya buhat buluhaton sang Amay, gani ang nakakita sang iya mga buhat, ang natandog sang iya kabalaka kag pagpang-ayo, ang ginhilway sang iya pagpatawad kag paghigugma nakakita man sang mga buhat sang Amay.

Sa sini lamang naton mahangpan ang tinaga ni Jesus nga nagasiling – ako amo ang dalan, ang kamatuoran kag ang kabuhi, wala sing may makakadto sa Amay kon dili sa akon.

Si Fr. Oscar Orbos may programa sa radyo sa diin ang mga tagpalamati nagatawag kag nagapakigsugilanon sa iya.  Sa isa sining iya programa sa kagab-ihon may nagtawag sa iya.  Pinamangkot sang pari kon pila ang iya idad kag ang sabat niya 15 anyos.  15 anyos, bugtaw ka pa sa sining kagab-ihon – mga alas diyes na sadto ang takna.  Ang bata nagsiling nga bag-o lang natapos ang iya dialysis gani indi pa sia katulog.  Si Fr. Orbos nakabatyag nga ining bata masinadyahon kag ang iya kadlaw bisan sa tunga sang iya ginaantus makalalaton.  Gani, ginsingganan  sia sang pari – kinahanglan makakit-anay kita.  Ang sabat sang bata – Father, daw indi ina posible nga magkit-anay kita kay bulag ako.  Ini naghatag sa pari sang kabalaka kag nagpamangkot sia, ngaa sa sining iya kahimtangan nga bulag kag ginadialysis makakadlaw pa sia, malipayon ang iya tingog kag may pagsalig pa sia sa gihapon sa Dios.  Ang bata nagsabat – Bal-an ko nga ginahigugma ako ni Jesus.

Ako amo ang dalan, ang kamatuoran kag ang kabuhi, wala sing may makakadto sa Amay kon dili sa akon.  Sa tanan nga dinalan sa ebanghelyo amo ini siguro ang namemorize sang kalabanan kay masami naton ini makita – I am the way, the truth and the life.  Pero ano ini sa pangabuhi?  Ano ini sa aton pamatasan kag pagginawi?  Ano ini para sa aton panan-awon sa kabuhi?

Yadtong kinse anyos nga bata nagpahapos sa aton sa paghangop sini nga dinalan kag kon paano ini makabaylo sang aton panan-aw, kon paano ini makaliso sang aton pamatasan, kag kon paano ini makadihon sang isa ka nagakabagay kag kristiano nga panimuot.  I am the way, the truth and the life.  Paano ini sa aton kabuhi.

Sa isa ka bata nga bulag kag may balati-an sa kidney ini nagakahulugan nga si Jesus nagahigugma sa akon.  Ang Dios ini malayo.  Ang Dios may kahilabtanan sa mga nagakatabo sa akon pangabuhi.  Si Kristo amo ang alagyan sang iya kabalaka, sang iya paghigugma, sang iya pag-upod sa mga maluya, sa mga naga-antus kag sa mga nadulaan sang paglaum.  Jesus has made the love of God tangible, he has made God’s ways understandable, he has made God’s action concrete and perceptible.

Amo ini kon ngaa ang katekesis nagatawag kay Jesus nga sakramento sang Amay.  Ang isa ka sakramento may duha ka elemento nga indi mahamulag sa isa kag isa  – ang makita kag ang indi-makita.  Ang makita indi mahamulag sa iya ginadala nga indi-makita.  Ang makita nagapahayag sang indi-makita.  Paagi sa pagkatawo ni Kristo, paagi sa iya makita nga mga buhat, paagi sa iya mabati-an nga mga pagpanudlo, ginpakita niya, ginpabati niya ang Amay sa aton tunga, kag ginadala niya ang kaluwasan nga ginatanyag sang amay sa tagsa-tagsa sa aton.

Tungod sini dapat man naton pakamalahalon ang mga sakramento sang simbahan – kay ini nagapakita kag nagapahayag kag nagadala sang mga butang nga indi-makita – sang paghigugma sang Dios, sang iya kaluwasan, sang iya kabalaka, sang iya pagpatawad, sang iya pagpang-ayo, sang iya pagpanghilway, sang iya paglaum.

Bal-an ko nga ginahigugma ako ni Jesus.  Ka simple man lang sini nga mga tinaga apang nagapabuhi ini sa aton tunga kag nagapamatuod nga si Jesus amo gid man ang alagyan, ang kamatuoran kag ang kabuhi kag wala sing may makakadto sa Amay, kag wala sing may makakilala sa Amay kon dili paagi sa iya.