2nd sun of advent A

May isa anay ka tawo nga nagpalapit sa pari sa pagkonfesar.  Siling niya:  “Father, Bendisyoni ako kay nakasala ako.  Ay abaw Father, palapamuyayaw gid sa akon.  Indi ko gid mapunggan ang akon baba - nagapamuyayaw man ako sa gihapon.  Pero subong Father, sugiran ta ka, indi na gid ako mamuyayaw.  Hijodipuga Father, indi na gid ako mamuyayaw.  Bisan mag-inano pa Father, ah, #%#%^& indi na gid ako mamuyayaw.”

Siguro mga utod makayuhum man kamo sa sahi sang paghinulsol sining tawo, apang talupangdon naton nga kon kaisa amo man kita sini.  Indi manegar nga may mga situwasyon sa aton kabuhi nga ang aton ginahambal ukon ang aton ngalan waay nagasanto sa aton mga ginabuhat.  May mga bes man nga ang aton ginabuhat sa sulod sang simbahan indi man makita sa aton ginabuhat sa aton balay, sa aton opisina, sa aton olobrahan.  Subong si Juan Bautista nagasiling sa aton “magpamunga ka bilang pamatuod sang imo paghinulsol.” 

Matuod man mga utod, ano man lang magsiling, “praise the Lord”, ukon “Ginoo nagahinulsol ako.”  Mahapos man lang magsiling sini.  Ano man lang magpanguros kada labay mo sa simbahan; mahapos man lang magpapilit sang sticker sang aton religious organization sa wind shield sang aton salakyan, kag kahapos man lang maghatag ebidensiya nga ikaw binunyagan nga Kristiano - dira sa aton opisina tag-viente pesos man lang ang baptismal certificate - o Kristiano ka na.  Apang ang ginapangita sa aton subong amo ang bunga - bunga nga magapamatuod sang aton paghinulsol, bunga nga magapamatuod nga kita mga Kristiano.

Kag ano ini nga sahi sang bunga ang ginapangita sa aton subong?  Diin ini makita?  Ano bala ang palatandaan nga kita naghinulsol kag nagbiya na sang aton mga sala?

May isa anay ka buyong nga masami lang nagahatag sing gamo sa ila nga baryo.  Pirme lang hubog, nagapangita away kag nagapanglagas sang binangon.  Kagamo sini nga baryo tungod sining tawo kag amo ini ang rason kon ngaa madamo ang nagalikaw sining baryo agud malikawan ang gamo, kag ang tawo nga nagapanglagas sing binangon.  Isa ka adlaw may milagro nga natabo.  Ining buyong nag-intra sa Charistmatic.  Nagkambio siya, nagbuot siya, waay na siya nagapahubog, waay na sing gamo ang ila nga baryo, kag for the first time naglinong ini.  Kag dugang pa diri ang mga tawo sa sina nga baryo nagnangin mapinangamuyon.  Kada alas seis sang gab-i withour fail waay na may nagalagaw sa sina nga baryo kay ang tanan nagapangamuyo sang santo rosario, bata, tigulang, sa ila nga chapel.  Natingala gid ang mga nagalabay sa sina nga baryo, nga sang matapos lang maconvert ang buyong nga nagapanglagas sang binangon, pati ang tanan nga yara sa baryo nagnangin matarong. Imposible, siling sang kadam-an.  Apang sang ulihi natalupangdan ang kawsa sining hinali nga pagkambio sang bilog nga baryo:  Isa ka gab-i ang charistmatic nga buyong nakita nga nagatindog sa puerta sang kapilya sang baryo nga nagabantay sa mga nagapangamuyo - may dala siya nga binangon.  Ginabantayan niya sing matutom ang mga nagapanamuyo sang santo rosario sa ila kapilya.

Mga utod, indi kasubong sini ang pagbiya sang sala.  Indi amo sini ang bunga sang matuodtuod nga conbersiyon kay bisan matuod may kalinong nga natabo kag may paghiusa nga nagluntad sa baryo, apang ining kalinong tuga sang kahadlok nga lagson sang binangon.

Sa aton nahauna nga balasahon makita naton ang epekto, ang bunga sang matuodtuod nga pagbiya sang sala - ang lobo nagdu-aw sa mga karnero, ang leopardo magatulog upod sa tinday sang kanding, and tinday sang baka kag ang leon upod nga magakaon, kag ang gamay nga bata magagiya kag magahampang upod sa ila.”  Sa malip-ot nga tinaga amo ini ang tion sang paghiliusa - harmony - may maayo nga kaangtanan ang isa kag isa, may reconciliation nga matabo sa mga kaaway, may maayo nga pagtamod nga matuga sa tunga sang tanan nga mga tawo.  Amo ini ang bunga sang conbersiyon - amo ini ang prueba, ang ebidensiya sang pagbiya sang sala.  Diri makita naton mga utod nga ang conbersiyon indi lamang gali pag-untat sa paghimo sang sala kundi lakip diri ang pagtuga sang maayo nga relasyon indi lamang sa Dios kundi pati na sa aton isigkatawo.  A converted man becomes respectful, a converted man becomes sensitive to the needs of others, a converted man becomes extraordinarily caring, a converted man becomes open to people of all persuasions or beliefs.

Mabudlay ini mga utod kon kaisa.  Mabudlay mag-relate kon kaisa sa aton mga kabulig, sa mga tawo nga manubo sa aton panulok.  Mabudlay magpamati sa suggestion sang iban ilabi na gid kon sa imo pagpati mas maalam ka pa sang sa ila. Kabudlay man magsuggest sa mga tawo nga dumdum nila sila lang ang maalam.  Mabudlay magbaton kag magtahod sa imo mga kaingod nga indi mag-agree sa imo mga ginapanghambal, bisan pa conbinsido ka nga ang imo ginahambal maayo.  Mabudlay magbaton sa mga tawo nga nagtamay sa imo sang una.  Mabudlay magpamati kag magtahod sang opinyon sang iban, ilabi na gid kon indi ako luyag sini. Mabudlay magpakigbagay sa tawo nga nagpahayag sa imo nga sala ang imo ginbuhat.  In other words, mga utod, mabudlay magpatabo sang harmony sa tunga naton.

Apang amo ini ang ginapangabay sang aton mga balasahon subong, this is the condition and the evidence of conversion.  We are preparing for the coming not just of the Lord, but primarily we are preparing for the coming of his kingdom - sa diin ang tanan mahiliusa, ang tanan magakabuhi sa paghidait, nga bunga indi sang kahadlok, kundi sang madalom nga paghigugma kag pagtahod sa isa kag isa, sa diin ang tanan mangin isa ka katilingban. 

Gani sa sining ikaduha nga Domingo sang adbiento, mangamuyo kita “come Lord Jesus, dalidali ka kag ibalay ining harmony, ining paghiliusa sa tunga sang imo mga anak.”