investiture sang altar boys 2010

Subong nga adlaw ang aton mga mass servers masukloban sang mga panapton nga magapakita sang ila hilikuton sa pagtipon sang kristiano nga katilingban sa santos nga misa.  Ini nga mga panapton magapadumdum sa ila sang ila katungdanan kag subong man sang aton pagpakamahal sang santos nga misa.

Kon manutahan ninyo ini nga mga bayo indi ordinaryo.  Kon maglagaw kay sa SM nga amo sini ang imo ginasuksuk masal-an ka gid nga buangit.  Ngaa, tungod kay indi ini ordinaryo nga panapton nga ginagamit sa ordinaryo nga hilikuton.  Ang sutana ninyo amo ang pinasahi nga panapton nga ginagamit sa pinasahi nga hilikuton.  Amo ina ang pagkabig naton sang santos nga misa nga inyo pagaserbihan - isa ini ka pinasahi nga hilikuton nga nagakinahanglan sang pinasahi nga panapton.  Kabay pa nga amo ini ang inyo pagkabig man sa santos nga misa - isa ka pinasahi nga hilikuton, nga nagakinahanglan sang pinasahi nga panapton kag labaw diri kag dugang diri sang isa pinasahi nga disposisyon.  Bisan ang imo panglakat sa misa indi pareho sang imo panglakat sa plaza, ang imo panghulag kag pagginawi sa santos nga misa indi pareho sang imo panghulag kag pagginawi sa iskwelahan ukon sa komputeran.  Isa ini ka pinasahi nga hilikuton nga nagakinahanglan sang pinasahi nga disposisyon nga ginasimbolo, ginatanda sang imo pinasahi nga panpton.

Ngaa pinasahi?

Una tungod kay ang misa sagrado, ang misa balaan.  Ginapabalaan ini tungod sang tinutuyo sang nagatipon nga katawohan nga luyag magpalapit sa Dios, kag ginapabalaan ini tungod sang presensya sang Dios sa sining ila pagtipon.  Diin ninyo nahamtang ang inyo kamot kon kamo magtindog kag maglakat?  Ginahamtang ninyo ini sa inyo dughan - duha ka palad nga natakop.  Ngaa? tungod kay ining natakop nga kamot sa dughan nagapatimaan nga yara ikaw sa presensya sang balaan.  Imo ginakilala nga yara ikaw sa presensya sang balaan.  Ginapaalinton nimo, ginapabalo nimo sa tanan nga yara kita sa presensya sang balaan.  Sa santos nga misa ang Dios nagahambal, ang Dios nagapakisugilanon sa aton.  Sa santos nga misa ang Dios nagapamati, ang Dios ginahalad, ang Dios nagahalad, ang Dios ginahalaran.  Sa Santos nga Misa yara sia sa iya pulong, yara sia sa pari, yara sia sa iya katawohan kag labaw sa tanan yara sia sing matuod sa tinapay kag bino nga aton ginakalawat.  Ang Misa sagrado, ang misa balaan tungod kay ang Dios yara sa aton tunga - gani indi ini ordinaryo.  Ini isa ka pinasahi nga hilikuton nga nagakinahanglan sang pinasahi nga panpton tungod sang presensya sang Dios nga balaan.

Ikaduha ngaa ang misa pinasahi nga hilikuton nga nagakinahanglan sang pinasahi nga panpton - ngaa?

Tungod kay ang Misa amo ang sakripisyo ni Kristo sa Krus.  Sa tanan nga ginbuhat sang Dios sa iya katawohan, amo ini ang pinakamataas, amo ini ang pinakamakagagahom nga buluhaton, amo ini ang pinakadungganon nga ginbuhat sang Dios sa iya katawohan kag aton ini ginasaulog kag ginadumdom sa Santos nga Misa.  Agod nga ang tawo maluwas si Jesus nagpakatawo, si Jesus nagpakatawo agod nga sia mapatay kay kon sia magapabilin lang nga Dios indi sia mapatay - kay ang Dios wala nagakamatay.  Sia nagpakatawo agod nga sia mapatay agod nga sa iya pagkamatay iya kita maluwas kag matubos pabalik sa iya.  Amo ini ang giansaulog naton sa Misa - si Kristo natawo agod nga sia mapatay kay sa iya lamang pagkamatay iya kita matubos liwat kag mapabalik sa Amay.  May mas pinasahi pa bala sang sa sina nga buhat?  May mas dungganon pa bala sa sina nga hilikuton?  May mas himpit pa bala nga makahigugma nga mabuhat niya ina para sa iya mga ginhigugma sing lubos.  Pinasahi ang misa, pinasahi nga hilikuton, pinasahi nga buhat, kay pinasahi ini nga gugma sang Dios. Gani pinasahi ang panapton.

Kabay nga inyo ini isuksuk nga may pagpabugal.  Kabay nga isuksuk ninyo nga nagasantu sang inyo disposisyon, sa inyo panghulag, sa inyo pamatasan sa sulod sang misa.  Kabay nga amligan ninyo ini, halungan ining inyo nga panapton kay pinasahi ini nga panapton nga ginsuksuk sa pinasahi nga hilikuton.