kasal ni chief maido

Kagab-i dugay panumdom ko kon diin ako masugod, asta sang ulihi nag-decide na gid lang ako nga magsugod sa Plaza sang Jaro.  Ang Plaza sang Jaro upod sa simbahan anay sang Jaro kag ang palibot sini gin-design ni Fr. Juan Aguado sadtong mil sietesientos kwarentay kwatro sang nagdesidir sila nga halinon ang Jaro halin sa Lapaz, kay ang Jaro sang una didto pa sa Lapaz.  Naintiendihan nyo?  Libog ulo nyo no?  Ok.  Si Fr. Juan Aguado ang nagplano sang set-up sang Jaro nga tubtob karon makita pa naton – ang rectangular nga plaza nga napalibuton anay sang mga mansion sang mga peninsulares, kag ang bell tower nga nahamtang sa kilid sini sa atubang mismo sang simbahan nga sang ulihi nangin katedral, kag ang bandstand nga nahamtang sa tunga.  Apang ang waay sa plano ni Fr. Juan Aguado amo ang mas makahatag interes sa aton dira sa plaza sang Jaro. 

Sa sadto nga plaza ginpirmahan ni Gen. Martin Delgado ang surrender sang Panay sang ginlusob kita sang mga kano sa adlaw mismo sang piesta sang Jaro sadtong 1901 pagkatapos lamang sang tatlo ka tuig nga independence sa mga katsila nga iya gindeklarar sa Sta. Barbara.  Diri man naghalin ang ngalan sang bantog nga linog Lady Caycay kay sang 1948 sang nagatukar ang banda sang ambahanon nga ginatawag Caycay kag nagasinaot ang mga tawo, naglinog sing mabaskog kag natumba ang bell tower sang Jaro kag ang iban pa nga mga simbahan sa Iloilo. 

Madamo nga mga milagro ang nagakatabo sa plaza ilabi na gid kon dulomdulom na.  Sang madulom pa ang kaagahon nakita kuno sang mga tawo ang Mahal nga Birhen sang Candelaria didto sa bubon sang plaza samtang ginapaligoan niya ang iya bata nga si Jesus.  Kag sa pagtangla sang mga tawo sa nahamtangan sang Candelaria sa ibabaw sang katedral, matuod waay na didto ang Mahal nga Birhen.

Kadamo pa sang mga nagkalatabo sa plaza, mga hitabo, mga milagro nga waay ginplano, wala ginbuko, wala gani ginpaabot, apang nagbaylo sang lakat sang pangabuhi sang mga natungdan.  Siguro sa henerasyon sang mga malls, sang mga SM City, Gaisano City, Robinsons Place, ang plaza subong daw waay na gid man ginaisip nga makadala pa sang mga importante kag life changing nga mga handuman.  Apang kon kaisa may ara pa gid man sa aton nga may matahum nga handuman nga naangot sa plaza.  Isa sining importante kag life changing nga hitabo kag milagro amo ang pagkit-anay liwat for the second time around ni Vincent kag ni Myrna sa plaza sang Jaro.   Waay ginplano, waay ginpaabot, sa pagkamatuod ginkalimtan na gani nila ang nagliligad, apang sa ano man nga swerte nagkit-anay sila liwat sa plaza sang Jaro kag tungod sang hurobaton nga nagasiling – love is sweeter the second time around amo ina ang rason kon ngaa yari sila karon sa atubang sang altar.

Vincent kag Myrna katahum sini nga realisasyon, ang realisasyon nga natabo didto sa plaza sang Jaro nga luyag ko pamalandongan upod sa inyo sa adlaw sang inyo kasal.

Sa masami ang mga katigulangan naton nagasiling “ang tanan nasulat na sa mga palad mo,”  ukon masiling sila “anhon mo kay amo ina ang swerte mo.”  May mga swerte gid man nga dapat naton hungdon, may mga swerte gid man nga dapat naton himakasan kag tinguhaan.  Apang kon husisaon mo sing madalom ang kabuhi, may mga swerte man nga dapat naton hulaton.  Waay kita sing may mabuhat luwas lamang sa paghulat, kag halos sa kalabanan sa aton amo ina ang pinakabudlay buhaton – ang paghulat, ang paghulat nga matabo sang dapat matabo. 

Lantawa bala, kadamo sang mga butang nga kontani maayo ang aton maabtan kon kabalo lang kita mahulat gamay.  Sa akon kabuhi kadamo sang akon kapalpakan tungod kay masami indi ako kahulat.  Kag narealizar ko man nga kadamo man sang mga maayo nga mga resulta sa akon gin-obra tungod kay naghulat ako gamay.  Isa ini ka leksyon nga tinguhaon naton nga matun-an sa kabuhi.  Waay ako nagasiling nga nagapati ako sa swerte.  Siguro nagapati lang ako sa hambalanon nga nagasiling – waay pa nag-abot ang tion. (2X)  Halin sa pagpangaluyag tubtob sa pagpakasal, tubtob sa pagpadaku sang bata, tubtob sa paghamtong sa inyo relasyon bilang mag-asawa kinahanglanon ini nga pamatasan, ang pamatasan sa paghulat, ang kabubut-on sa pagsiling – wala pa nag-abot ang tion.

Ano bala ang aton natun-an sa aton mga kapaslawan?  Natun-an naton nga may mga butang nga indi naton mapilit.  Ano bala ang natun-an naton sa aton mga kaakig?  Natun-an naton nga may mga hitabo nga indi naton makontrolar.  Ano bala ang natun-an naton sa mga masakit nga mga pagbulagay kag di-paghangpanay?  Natun-an naton nga mga mga luyag kita kag handom nga mapatigayon lamang sing inanay kag sa patawhay.  Kon isipon mo duha man lang ka metodo ang sarang naton mabuhat sa isa ka situwasyon – santong paspasan ukon santong dasalan –sa papwersa ukon sa pahinay.  Importante nga sa nagakalain-lain nga kahimtangan makapanumdum kita kon ano ang nagakabagay sa sining duha.  Kag dira makita ang birtud. 

Vincent sang nagligad nga tuig makasiling ako subong nga waay pa siguro nag-abot ang tion.  Kon pinilit mo to remalaso ka gid.  Apang sa ano man nga swerte isa ka adlaw tungod kay ginsugo ikaw ni Fr. Richard, waay ginplano, waay ginpaabot, nagtabok ka lang sa plaza kag didto nag-abot gid man ang tion, kag napadyaan ang gamay mo nga hulat.  Dumdomon mo ina kay isa ina sa mga butang nga waay na naton natun-an sa subong nga panahon sang padasigay.  Isa, duha, ikatlo nga away desisyon lang kita dayon nga bulagan.  Pero kon kabalo ka lang maghulat gamay, maabot gid ina ang tion nga makasiling ka, “ka gamay man lang to gali nga problema” kag kadlawan ang imo kaugalingon.

Ngaa piliton mo gid nga areglahon dayon, basi pwede anay mapatawhayan.  Ngaa piliton mo gid nga patubuon, basi pwede man lang nga hulaton anay. 

Mga seminarista tandaan gid ninyo ini.  Nugay padasodaso.  May mga butang nga ginapangita, apang may mga butang man nga nagapakita lang bisan wala ginapangita.  May mga butang nga dapat naton patabuon, apang may mga butang man nga nagakatabo lang bisan wala pa naton ginapaabot. 

Ang mga apostoles naghulat gamay apang si Tomas indi makahulat kag sa iya kasubo nagsipak sia sa grupo.  Siguro abi niya waay na ini sing pag-asa pa.  Apang sa ano man nga swerte ang waay ginapaabot nagabot. 

Ang mga apostoles naghulat kag nag-intiendi gamay kay Tomas.  Indi nila mapapati si Tomas, apang waay na sila nag-insistir pa.  Hinulat gamay si Tomas, isa man lang ka semana, kag tungod sini si Tomas nagpahayag sang iya pagtuo.   Kag sa ano man nga swerte ang waay ginplano natabo.

May mga butang nga dapat naton himakasan, piliton kag tinguhaan.  Apang may mga butang man sa aton kabuhi ilabi na gid sa aton relasyon sa isa kag isa nga dapat lang naton hulaton gamay.  Relationship takes time, healing takes time, growth takes time, forgiveness takes time, spiritual life takes time.

Ang ikaduha nga butang nga dapat ninyo matun-an sa plaza makita man sa aton ikaduha nga balasahon.  There is a higher power up there that is in control of what is happening in our lives.  Kon kaisa ginatawag naton ini coincidence.  Sa masami ginatawag naton ini swerte.  Sa ikaduha nga balasahon ginakabig ini nga providence.  Amo ini ang kawsa sang aton paglaum. 

Vincent kag Myrna ang tsansa ninyo nga magkit-anay sa plaza sang Jaro sadto nga adlaw is 1 is to 1.8 million.  Kon sayuron pa mas posible pa nga magdaog ka first prize sa megalotto sang sa magkit-anay kamo nga duha sa plaza sang Jaro sa amo to nga adlaw.  Paano ina natabo?  Ambot . . . apang sa mata sang pagtuo nagapati kita nga may nagagiya sa aton kag sang aton kabuhi.  Sa aton pag-aha nga masarangan naton ang tanan nagakalipat kita nga may mga butang nga indi naton masarangan.  Sa aton pagpati nga mahibaloan naton ang tanan kag ma-explicar ang tanan, nagakalipat kita nga may mga misteryo pa nga nabilin sa aton kabuhi kag sa aton kalibutan.  Sa aton sobra nga pagsalig sa aton ikasarang, nagakalipat kita nga magpangayo sing bulig. Sa aton sobra nga bilib sa aton kaugalingon, nagakalipat kita nga kinahanglanon naton ang kusog nga nagagikan sa kahitaasan.   Ang hitabo sa plaza nagapakita lamang sa imo Vincent kag Myrna that there is more to this world than your eyes can see, that there is more to this world than your touch can feel, that there is more to this world than our strength can overcome.  Ang aton ikaduha nga balasahon nagasiling, “Ako ang kamunuan kag ang Katapusan.  Yari sa akon ang yabe sang kamatayon kag sang kalibutan.”  Vincent kag Myrna, sia ang naga-uyat sang yabe, sia ang kamunoan, sia man ang katapusan.  Importante nga makatuon kita sa sini nga kamatuoran agod indi kita magsalig sa aton lamang nga ikasarang.

Ang plaza.  Kadamo kamo sing matun-an sa inyo pagkitaay sa plaza.  Tugoti ninyo nga ang leksiyon nga dulot sining pagkitaay maggiya man sa inyo pag-asawahay.  Kag pananglitan malimtan ninyo ini nga mga leksiyon maayo gid nga mabalikan ninyo nga duha ang kamunoan sini tanan, ang ginsugdan sini nga kasal kag pag-asawahay – ang plaza sang Jaro.

PS hoy Luz kag Purang nugay gani pabenturar sa plaza sang jaro ha.  Basi makita ko kamo didto.  Gurang na kamo.