piesta sa barotac nuevo june 13 2013

Ginabaton ko nga ang akon gid lang nahibaluan nahanungod sa santo amo nga sia ginatawag pananglitan may mga pagkabutang kita nga nadula kag indi na naton makit-an.  Matuod makilala ko ang iya imahen nga nagabayo sang Franciscano, nagadala sang bukas nga biblia kag nagakugos kay Niño Jesus nga natungtong sa bukas nga biblia.  Natalupangdan ko man nga sala gali sang una ang akon gin-sermon nga si San Francisco nagwali sa mga isda.  Si San Antonio gali ang nagwali sa mga isda kag si San Francisco iya ang nagwali sa mga pispis.  Tungod sang inyo halad humay sa seminaryo binudlayan ako magpamalibad sa pagbaton sini nga hilikuton karon nga aga kag gani na-obligar ako sa pagkilala kay San Antonio de Padua.

Sa akon pagpamalandong kon ano ang akon ipaambit sa inyo, natalupangdan ko nga si San Antonio isa ka doctor sang simbahan, doctor kon sayuron manunudlo, ginakilala ang iya pagtulun-an nga labing importante sa aton pagtuluohan.  Luwas diri ginakilala pa gid sia nga labing maayo kag bantog nga manugwali.  Sa pagkamatuod ang iya dila wala madunot matapos nga ginkalkal ang iya bangkay pagkatapos sang sobra tatlo ka gatos ka tuig – palatandaan siling nila nga indi lang tawo ang naka-uyon kag nakahimulos sang iya mga sermon kundi pati ang Dios naka-uyon gid.  It was a seal of divine approval.

Gani naglibog ang akon ulo.  Ano ang itudlo ko sa inyo nahanungod sa ginakilala nga manunudlo sang simbahan.  Ano ang iwali ko nahanugnod sa bantog nga manugwali bisan ang Dios naka-uyon sang iya ginwali.  Ano pa iya ang akon di?

Gani subong nga aga tugutan naton si San Antonio nga sia ang magatudlo kag indi ako, nga sia ang magawali kag indi ako.  Kon sayuron pa, Msgr. Bing puede mo mabuhinbuhinan ang akon stipend kay ining akon ihambal indi original, indi gid man akon.  Suliton ko lang ang mga gintipon ko nga sermon ni San Antonio de Padua.  Buhini lang diutay kay ini nga sermon may gamay man nga pangabudlay kay ang sermon sadtong ika-dose nga siglo sa panahon ni San Antonio nagalab-ot sa duha ka oras, kag sigurado ko indi kamo luyag nga kopyahon ko lang sing bug-os ang tanan niya nga ginhambal.  Gani may pangabudlay man ini nga diutay.

Magsugod wali si San Antonio he begins his sermons by preaching to preachers.  Ginasugdan niya ang iya pagwali paagi sa pagwali sa mga manugwali.  Kon sayuron pa ginasermonan niya anay ang iya kaugalingon antes sia magsermon sa iban.  Wala lang niya ini ginatago sa iya kaugalingon, ginahambal niya ini, ginabuyagyag niya ini agod mabati-an sang tanan as if to hold him accountable as to what he was about to say to the people.  Gina-unahan niya ang mga tawo,  Daw pareho lang bala nga nagsiling sia - indi ka lang gani mag-sermon-sermon da  ha, indi ka lang gani magtudlo-tudlo da ha.  Very unique to St. Anthony.  He preaches first to himself before he preaches to others.  “Sa paglampos sang manguwali sa salsalon dapat indi lang sia maghatag kakulba sa mga tagpalamati kundi magbaylo man una sang iya pamatin-an.”  Siguro importante ini and it will help explain kon ngaa kadamo sang mga santo during his time, during the time of St. Anthony – may nagawali anay sa mga manugwali, may nagasaway anay sa mga manugsaway, kag ang ginasaway nagapamati kag nagabaton sang mga pagsaway.  I believe this is important for the holiness of preachers.  Amo ina kon ngaa sa imahen ni San Antonio makita nga ang Nino Jesus nga iya ginakugos nagapungko sa naabrihan nga biblia.  Ngaa?  Because the word cannot remain word, the word must be made flesh, the word must be enfleshed, ang pulong dapat mangin unod, ang mga tinaga dapat mangin pamatasan, ang sermon dapat ikabuhi.

Sa pagkamatuod indi gid man masyado ka orihinal si San Antonio.  Ang quotations niya isa ka tambak – San Geronimo, Isidro, Agustin, Gregorio, Bernardo, bisan pa si Aristotle, si Plato, Horacio kag si Pliny, ilakip mo pa gid ang iya mga quotations sa biblia sa bagay nga gintawag sia ni Pope Gregory IX nga “kaban sang duha ka katipan sang biblia.”  Ang talent ni San Antonio amo nga kon paano niya matingob ini tanan sa bagay nga dali ini mahangpan kag indi dali malimtan bisan pa sang ordinaryo nga tawo. 

Ano ang pagtuo?  Siling ni San Antonio may tatlo ka lain-lain nga paghangop sang pagtuo - lain man kon magsiling ka “nagatuo ako nga may Dios,” lain pa gid kon magsiling ka “nagatuo ako sa Dios,” kag lain man ini sa pagsiling “ginatuohan ko ang Dios.”  Kon magsiling ako nagatuo ako nga may Dios, nagatuo ako nga matuod gid nga may Dios ang kalibutan - pero bisan ang yawa nagapati sina.  Kon magsiling ako “nagatuo ako sa Dios,” nagapati ako nga ang iya ginahambal matuod – pero bisan ang mga malaut nga mga tawo nagapti man sina.  Apang kon nagasiling ako ginatuohan ko ang Dios ini nagakahulugan nga ginahigugma ko sia, ginatuman ko ang iya kabubut-on, nagalapit ako sa iya sa akon pag-ampo, napasakop ako sa katilingban nga amo ang simbahan. 

Ini nga pagtuo wala sing pulos kon wala sing paghigugma.  Siling ni San Antonio ang mga elepante pananglitan may isa sa ila nga nagamasakit, maluya ukon nahalitan, ila ini sia ginapalibutan, ginabantayan kag ginadampigan ilabi na gid kon sila ginahingabot sang iban nga mga sapat.  Gani kasubong man ang katilingban ni Kristo.  Ang aton pagtuo nagatulod sa aton pagdampig sa mga maluya nga katapo.

Ini nga pagtuo dapat itudlo ilabi na gid sa mga kabataan.  Sa iya pagpamalandong sa isa ka bahin sang libro ni Job si San Antonio nag-anggid sang mga ginikanan nga wala nagatudlo sang ila kabataan sa pagtuluohan kag kristohanon nga pamatasan, mga ginikanan nga wala nagadisiplina kag nagahatag sang maayo nga mga laygay sa ila kabataan, nga daw mga ostrich - nga isa ka salimpapaw nga pispis nga puno sang pakuno-kuno - daku matuod ang lawas, apang gamay ang ulo, malapad matuod ang pak-pak pero indi kalupad, kag worst of all ginabilin lang niya ang iya itlog sa duta nga wala sing paghalong nga basi matapakan ini sang mga sapat.  Ang ginikanan nga wala nagatudlo sa pagtuo sa iya kabataan ostrich.

Sa pagkabuhi sang pagtuo nagpaandam man si San Antonio sang aton kahuyang nga nagapahulog sa aton sa sala.

Ginkomparar ni San Antonio sa isa ka sahi sang insekto nga ginatawag sa ingles nga dung-beetle ang isa ka dalok kag sakon nga tawo.  Ining dung-beetle magapangabudlay sa bug-os niya nga kabuhi sa pagtipon sang higko sang mga sapat kag ang pag-porma sini nga daw mga bola, adlaw gab-i tipon sang higko, pagkatapos sining pagpangabudlay  nag-agi ang baka kag tinapakan sia.  Goodbye.  Kon dalok ka dung-beetle ka nga nagatipon sang higko.

Maghalong man sa sala sang pagkaibog.  Amo ini ang sala nga ginkomparar niya sa man-og.  Ang man-og madanlog madali magsulod sa tagipusuon kag budlay hawiran.  Ang man-og mahilig sa landong, didto na sia pirme sa madulom-dulom, mahilig sia sa tago-tago.  Kita mo kasagad gid ya kay San Antonio – sa dulom, tago-tago.

Sa bilog niya nga pagwali kontra gid niya ang kadalok bisan ang milagro niya gina-usar sa pagtudlo sang kaalwan ilabi na gid sa mga nagakinahanglan.  May isa anay ka nagapa-five-six nga napatay.  Sang gindala sa simbahan wala ni San Antonio ginapasulod tungod kay siling niya yara na sia sa impierno.  Kag nian kinuha niya ang espada kag gin-abrihan ang dughan sang tawo kag didto nakita sang tanan nga sa baylo sang isa ka tagipusuon, nahamtang ang isa ka gamay nga kaban nga puno sang sinsilyo kay kon diin ang imo manggad didto man ang imo tagipusuon.

Apang pananglitan mahulog ka sa sala, bangon ka sa gilayon paagi sa pagkonpesar.  Kon wala ka nagakonpesar tungod kay nahuya ka, hibaluon mo nga ang kahuya bahin sang pagpenitensiya, ang kahuya bahin sang paghinulsol.  Indi bala kon nahuya ka nagablush ka, medyo nagapula-pula ang imo nawong.  Gintawag ini ni San Antonio nga sa isa ka brilliante, isa ini ka jewel – the amber of confession, the red blush of confession.  Suksuka ina nga daw isa ka briliante kay naghalin ina sa nagadabadaba nga kalayo sang paghinulsol.

Apang labaw sa tanan importante ang atong relasyon sa Dios nga ginasustener sang pangamuyo.  Ang pangamuyo may apat ka pamatasan, siling ni San Antonio – una ang pagbukas sang aton tagipusuon sa Dios, walay likom kundi bukas ini sa Dios nga may pagsalig; Ikaduha, ang pagsaysay sang aton paghigugma sa iya; ikatlo, ang paghalad sang aton mga pag-ampo kag mga kinahanglanon; kag ikaapat ang pagpasalamat kag pagdayaw sa iya.