Hay
salamat matapos na gid man ang aguinaldo.
Halin pagsugod sang aguinaldo wala gid ako sakto nga tinulugan. 3:30 bugtaw na ako bisan pa nga natulugan ako
mga alas onse sa gab-i. Bisan wala gid
man ako nagamisa sang aguinaldo kada adlaw pero mapilitan gid ako sa
pagbugtaw. Una nagapanumdom ako kon bala
may nagaluto na sing taho. Ikaduha
gina-asikaso ko kon nag-abot na ang pandesal.
Ikatlo katunog sang lingganay.
Ikaapat, ang speaker sa guwa sang catedral natuon gid sa akon
bentana. In short mapilitan gid ako sa
pagbugtaw. Bilog nga adlaw nagapangita
ako sang lugar nga makapangalit tulog.
Pero kis-a kon malason wala gid.
Gani bilog nga adlaw nagapangluya ka.
Bilog nga adlaw nagapanguy-ab ka.
Bilog nga adlaw indi ka makapanumdom sing maayo. Gani bilog nga adlaw daw wala ka gid man may
matapos nga ulubrahon. Kaulugot sang
aguinaldo. Ang akon naandan na nga
routine ginguba niya. Kuntani tulog pa
ako sa sini nga oras. Kuntani
nagapangurumbot pa ko sang habol.
Kuntani kon maayo tulog ko damo ako maobra. Pero tungod sang aguinaldo ang naandan ko nga
buluhaton indi ko na mabuhat. Ang
naandan ko na nga skedyul ginguba, ano pa nagabinansuli subong ang akon
ginabuluhaton.
Pero
indi bala amo ini ang katuyuan sang aguinaldo?
Ngaa tam-an pa ini ka aga? Ngaa
ginapukaw kita samtang dulom pa kon sa diin ang iban sa aton nagakalasandad,
nagakabulasot, kag nagapangapkap sang switch sang suga. Ang iban sa aton tiko ang ila eyebrow tungod
kay madulom pa kag indi kita katultol sang aton mga kilay. Pero ngaa tam-an pa ka aga. Basi puede man kita ka aguinaldo sa a las
siete sa aga ukon basi puede man kita ka aguinaldo sa alas siete sa gab-i. Kon amo sina nga oras ang imo aguinaldo indi
ina aguinaldo – misa huo, pero indi ina aguinaldo tungod isa sa mga katuyuan
sang aguinaldo amo nga kita makaeksperyensiya sang kasisidmon, ang aguinaldo
tam-an ka aga agod maeksperyensiahan naton ang pagpamanagbanag sang adlaw, ang
aguinaldo nagasugod sa kadulom sang kaagahon, samtang nagapalauli na ang mga
aswang, agod makita naton ang lakat sang panahon halin sa kadulom pakadto sa
kasanag – the transition from darkness into light. Ngaa, kay amo ini ang tanda sa naturalesa nga
nagapahayag sa aton, nagapakita sa aton sang pag-abot ni Kristo – halin sa
kadulom pakadto sa kasanag.
Si
Zacarias sa iya ambahanon nga bag-o lang naton nabati-an nagsiling:
Pabutlakon niya (sang
Dios) ang adlaw sang kaluwasan sa aton,
Kag pasilakon niya ini
gikan sa langit
Sa tanan nga nagapuyo
sa madulom nga landong sang kamatayon,
Sa pagtuytoy sang aton
mga tikang sa dalanon sang paghidait.
Sa tuod-tuod lang ini nga ambahanon ni
Zacarias ginakanta man sa patay – samtang ginaprosesyon ang patay pakadto sa
simbahan ukon sa sementeryo. Kay ang
kamatayon amo man ang kasisidmon, ang pagpamanagbanag, ang tion sa diin
pabutlakon na sang Dios ang adlaw sang kaluwasan sa aton. Gani kita nga nagabugtaw sa aguinaldo
nagapraktis na sa pagsugata sang kasisidmon, nagapraktis na kita sa pag-angkon
sang fulfillment sang aton mga handom nga mahatagan sang bug-os nga katuman sa
aton pagsulod sa ginharian sang Dios sa kamatayon. Ang mga nagahayanghayang pa da subong sa ila
katri nagapraktis na ya sila maghayang sa ila lungon kay siling sang isa ka
manunulat sleep is the sister of death.
Gani indi kamo da hagi tulog samtang gasermon ako.
Nagabugtaw kita sa kaagahon samtang
dulom pa agod makita naton ang pagpamanagbanag sang adlaw kay amo ina ang
simbolo sang pagkatawo sang Manluluwas.
Magkadto kamo sa catedral makita ninyo nga may ginpinta sila nga clouds
sa dome – kon wala kamo still neck pareho sa akon sarang ninyo ina matangla
didto. Pero ang kolor sang clouds kolor
sang pagtunod sang adlaw, kolor sang pagsugod sang kagab-ihon. Ngaa kabag-ihon? Tungod kay natapos na ni Kristo buhat ang iya
buluhaton diri sa kalibutan. Nakasiling
sia sa krus consumatum est, natapos na.
Natapos na ang iya buluhaton, natapos na ang iya ulubrahon gani gab-i na
kag kita nga mga nabilin yara sa kagab-ihon nga nagahulat sang kaagahon, sang
bag-o nga adlaw, sang pagpamanagbanag.
Sang una kon mapatay ka ginalubong ka sa
bagay nga nagaatubang ka sa lugar sa diin nagabutlak ang adlaw. You face the east. Ginapaatubang ka sa sidlangan. Ngaa kay nagapati sila nga si Jesus magabalik
liwat nga daw adlaw nga magahalin sa sidlangan.
Gani sa sidlangan ka ginapatubang agod to pagbangon mo sa lungon sa
pagkabanhaw sang mga minatay indi ka na magtalangtalang kag mamangkot hoy diin
sia, diin na sia.
Ginadala ko lang ni sa pakadlaw pero amo
ina ang pagpati naton, ang pagpati nga ang pag-abot ni Kristo is closely
associated with the coming of the light.
Nahadlok kita sa kadulom. Pero
kon kaisa nami-an man kita sa mga madulomdulom nga lugar, ano pa kis-a ang iban
nagapalipod-lipod agod indi makita.
Nahadlok kita sa kadulom kay sa pagkamatuod mga anak kita sang
kapawa. Iya kita ni Kristo nga amo ang
indi malupig nga kapawa. Gani ang
sidlangan ginatawag nga puloy-an sang kapawa apang ang nakatundan ginatawag nga
puloy-an sang kadulom kag kalaut.
Si Kristo matawo na. Sia ang kapawa nga magalupig sang kadulom
sang aton kalag – ang akdulom sang kahakog, kadalok, ang kadulom sang kahisa
kag pagbinahinbahinay, ang kadulom sang mga nagakabuhi sa landong sang kalaut
kag sang sala, ang kadulom sang mga nagapulopanago, nagapulopalipod, kag mga
nagatulutihin kay nahadlok sila nga mabal-an ang ila itom nga mga handum kag
buhat. Yara man ang kadulom sang
kaimolon kag ang mga bisyo nga dala sining sahi sang kaimolon – ang
pagpangawat, ang pagpanunto, ang pagbutig, ang pagpatigayon sang mga illegal
nga mga buhat. Indi kamo magkataka, indi
kamo magkahadlok, indi kamo magkulbaan kay magaabot gid ang pagpamanagbanag kag
ang kadulom lupigon kag tasakon sang mga anak sang kapawa.
Karon nga tuig sa sining aguinaldo
ginsugdan naton ang ginatawag naton nga kabalaka project. Isa ini sa mga matawag naton nga pagpanghikot
sang mga anak sang kapawa agod madula, malupig amat-amat ang kadulom nga tuga
sang kaimolon kag kakulang sang palamugnan.
Suportahan naton ini. Kon luyag
mo nga maghari na ang kapawa, kon luyag mo nga maghari ang kapawa, kita nga mga
anak sang kapawa magabuhat sang mga tikang nga aton maamat-amat lupig sang
kadulom sang kaimolon sa aton tunga.
PS Kadamo sa aton ang nagpamutang sang ila
mga krismas lights halin pa sang oktubre.
Tam-an pa ka temprano, ano pa pag-abot sang krismas karon nga gab-i
ponder na ang iban sini. Kay-uhon ninyo
ang ponder, pasigaha ang inyo mga suga kay karon sa gab-i magasugod na ang
piesta sang kasanag, piesta sang mga suga kay si Kristo, ang kapawa sang
kalibutan matawo kag magalupig sang aton mga kadulom.
No comments:
Post a Comment