bendisyon sang bungsod - aguinaldo

Isa sa mga exciting nga mga buluhaton sang pari amo ang pagbendisyon sang balay.  Exciting tungod kay kon kaisa indi ka kahibalo kon ano gid man bala ang bendisyonan mo, kag kon kaisa ang ginapabendisyonan sa imo wala pa sa libro.  Halimbawa may nagkadto anay sa akon kay mapabendisyon sang balay.  Pag-abot ko waay balay – mapaobra pa lang sia sang balay.  Apang anhon mo kay yara gid ang lima ka bungsod nga masakop sang balay.  Gani antes mapaobra ang iya balay, pabendisyonan niya anay ang balay sang iban.  Ayawan man ako pangita sa libro waay gid nila nadumduman nga may mapabendisyon gali sang bungsod. 

Pero balik ta anay sa bendisyon sang balay.  Sang na-assign ako sa Pototan makita mo nga may dugo sa mga poste sang balay.  Sang ara na ako sa ciudad, sosyal na, may haboy-haboy na sinsilyo.  Sa isa pa gid ya ka balay may nakita ako nga isa ka daku nga planggana puno sang lain-lain nga mga paka – mga figurines sang paka nga may sinsilyo sa ila baba.  Ngaa amo sini.  Siling nila, “Father suerte ina.”

Suerte.  Kita nga mga pinoy mahilig sa suerte kag madalom ang aton pagtuo sa suerte.  Bisan sa ano lang nga bagay.  One time pinamangkot ko ang isa ka istudyante.  Ti preparado ka na sa exams?  “Hay, father, Pasuerte na lang ini.”  Sang nakapasar na sia, “baw suerte gid father, nakapasar ako.”  Tanan tanan lang ginapadalagan sang suerte.  Kon maayo ang patubas, maayo lang kay suerte.  Kon mag-abot ang bonus, masiling, suerte lang kay may inugasto kita sa Krismas.  Kon makapamana foreigner ukon makapa-abroad, “grabe no suerte gid sila no?”  Kon maayo ang negosyo, na suertihan. Kon magdaog sa sugal, “suerte ako subong nga gab-i.”  Kon mapierde “yugs malas.”  Tanan tanan ginapadalagan sang suerte bisan damgo patdan kay suerte. 

Kita nga mga Pilipino nagapati nga ang aton kabuhi ginadumalahan sang makagagahom.  Sia ang nagapatikang sang tanan kag sia ang nagagiya sang tanan.  Tanan ginasalig naton sa iya.  Tuga ini sang aton madalom nga pagtuo.  Waay lang kita nagasalig sa aton ihibalo, sa aton kusog, sa aton kaalam kag sa aton pagpaninguha.  Nagapati kita nga ang tanan nagadepende sa ibabaw, nagadepende sa makaako.  Gani sa masami nagasiling kita kun kamustahon kita, sa kaluoy sang Dios maayo man.  Bisan gani nahanungod sa aton mga plano sa paalabuton nagasiling kita, “kon pagbuot sang Dios basi pa man lang.”  We are a deeply religious people.  Kag makita ini sa aton pamatasan nahanungod sa suerte.

Apang ini nga pamatasan may iya man nga halit kag kalainan.  For example masalig na lang kita sa pasuerte sa aton exams kag indi na kita magtuon todo-todo – daw indi naman ina sakto.  Imbes nga manumdon ka, magpalitik sang imo ulo kon paano mo mapatin-ad ang imo negosyo masiling kita, “bahala na, pasuerte lang ini.”  Imbes nga magtuon kita kon paano magsagod baboy, kon paano magtanom sa scientific nga paagi, paano magtin-ad ang aton buluhaton masiling kita, bay-i da kung suerte mo suerte mo gid na ya, kag kon daw duda ka suerte mo nagakonsulta kita sa almanake.  Kon sayuron pa laban-laban sa aton pangabuhi patupa. 

Amo ini mga utod ang punto sang ebanghelyo kag sang aton balasahon.  Tuod may Dios nga makagagahom nga nagagiya sang aton kabuhi, nga nagadumala sang lakat sang panahon kag sang aton kasaysayan.  Apang waay ini nagakahulugan nga nagadepende ang tanan sa iya, ukon sa suerte.  Ang duha ka baw-as nagbusong – suerte.  Buhat ini sang Dios.  Ang duha ka tigulang nagbusong – suerte.  Buhat ini sang Dios.  Pero waay ina nagakahulugan nga hasta lang dira ang istorya.  Kon mangin ano ang ila ginbusong, kon mangin ano ang ila kabataan, nagadepende pa ina sa pagpaninguha sang ila mga ginikanan kag ang mismo pagpaninguha sang ila kabataan.  Ang response sang ila bata nga si Samson, ang response sang ila bata nga si Juan amo ang magadetermine sang ila buasdamlag.  Pasuerte lang – indi.  Patupa lang – indi.  Ang ila kabuhi nagadepende sa ila pagsabat sa panawagan sang Dios. 

Amo man ina sa aton.  We are in control of our destiny.  We are in control of our lives.  Kon amo ini ang aton nasyon indi ini suerte naton, gintugtan ta ini nga matabo.  Kon pigado Krismas ta subong indi ini suerte – gintugutan ta ini nga matabo.  Kon luyag naton nga mabag-o na ang aton panghimanwa – indi ina mabag-o sa suerte – ikaw kag kita tanan ang makapatabo sina.

Amo ina ang rason kon ngaa gintukod naton ang kabalaka project.  Nagapati kita sa grasya sang Dios, nga kon wala ang grasya sang Dios indi kita makagiho, indi kita makahulag.  Pero wala ina nagakahulugan nga katulad ni Juan Tamad manganga na lang kita sa idalom sang bayabas sa handum nga may mahulog sa aton baba.  Ang pilosopia sining aton handum nagasiling katuwang para sa kinaugalingon nga katibawasan.  Katuwang.  Buligan ka sa pagtindog, pero ikaw tindog.  Buligan ka nga makatibawas, pero ikaw ang magpaninguha.  Buligan ka nga makakaon sing bayabas, buligan ka namon nga makasaka sa bayabas, pero ikaw saka.  Kinaugalingon nga katibawasan.  Buligan ka pero ikaw mismo ang maghilway sang imo kaugalingon.  Amo ina ang rason kon ngaa importante nga bulig sa tawo amo ang values formation.  Ang pormasyon sa maayo nga pamatasan, sa sakto nga pagpaninguha.  Indi niya nga hatagan ka lang, kay hatagan ka kon wala sing sakto nga pamatasan, kon wala sing pormasyon, wala man ina sa gihapon pulos.  Ang kabuhi indi ni iya madala sa pasuerte.   You determine your destiny.  You decide for your future.  Kon ano man kita subong ina bahin sang aton gindesisyonan sang una.  Kon ano kita sa palaabuton ina bahin man sa ginadesisyonan naton subong.  Si Samson natawo sa grasya sang Dios.  Si Juan Bautista natawo sa grasya sang Dios.  Kon nangin ano sila pagkatapos nga sila natawo wala lang ina tanan nasulat sa ila palad.  Sila nagpatikang agod nga mabuhat nila ang ginapaabot sa ila.  Kon nagpalpak si Samson ina tungod sang iya mga choices.  Kon nagpanumbalik sia kag nian nagpanumbalik man ang iya kusog ina tungod kay ginpili niya nga mangin kasubong sina ang matabo.  Ang kabuhi indi pa-suerte.  Kon amo ina ang paminsaron mo, ti amo ina ang una mo nga malas kag may magasunod pa na.