piesta sa MH del Pilar, Jaro 2011

Antes ako magsugod sang aton pamalandong importante anay nga hibaluon naton kon paano nagsugod ining labing dumaan nga debosyon sang Espana sa Nstra. Sra. Del Pilar.

Tawgon ko ini nga introduksiyon nga Istorya sang Duha ka Iloy.  Ang una nga Iloy ambisiyosa, kag ang ikaduha nga iloy mapainubuson.  Ang una nga iloy asawa ni Zebedeo kag ang ikaduha nga iloy asawa ni Jose.  May duha sila ka mga anak - si Juan kag si Santiago.  Si Juan kag si Santiago mga natural nga anak sang ila Iloy nga asawa si Zebedeo.  Kag sang ulihi si Juan kag si Santiago nangin inayupan nga mga anak ni Maria nga asawa ni Jose sang gintugyan ni Jesus didto sa krus ang iya iloy kay Juan kag si Juan gintugyan ni Jesus kay Maria nga mangin iya anak.  Tungod kay si Juan kag si Santiago mag-utod sarang naton makabig nga sila nga duha kag indi lang ang isa sa ila ang inayup kag ini mapamatud-an karon sa istorya sang Nstra. Snra. de Pilar.

Sa ebanghelyo kon madumduman ninyo ginpresentar sang ambisyosa nga iloy ang iya mga anak nga kon mahimo sila magapungko sa wala kag tuo ni Jesus sa pag-abot sang iya ginharian.  Stage mother - ginpresentar ang iya mga anak agod papungkuon sa puesto.  Apang sang nagpamangkot si Jesus kon bala ining iya mga anak sarang makainom sa kupa nga iya paga-imnan, kon sayuron sa kasakit nga iya paga-agyan - sin-o ang nagsabat sang pamangkot?  Ang stage mother wala na kitaa - nagpalikod kag naghipos kay ang nagsabat amo ang mga anak.  Indi sia luyag nga mag-antus ang iya mga anak, pero luyag niya nga sila padyaan.  Indi niya luyag nga sila magpangabudlay sa kasakit upod kay Kristo, pero luyag niya nga sila makapuesto.

Sulod karon ang ikaduha nga iloy - ang iloy nga nag-ayup sang mga anak ni Zebedeo.  Pagkatapos nga si Jesus mapatay, mabanhaw kag nagkayab sa langit, si Maria kag si Juan nagkadto kag didto nagpuyo sa Efeso.  Apang si Santiago nagkadto sa Espana kag didto sa Zaragosa nagwali sia sang pulong sang Dios sa tuyo nga makonbertir ang mga tawo didto para kay Kristo.  Pila na ka adlaw, pila na ka bulan wala sa gihapon bisan isa.  Dumduma ninyo ang panimuot ni Santiago.  Sila man sini ang nagsuggest kay Kristo nga paulanan kalayo ang isa ka lugar didto sa Samaria tungod kay wala sila ginabi-abi sang mga pumuluyo - paulani sila kalayo.  Na! amo na sila ka abtik mangakig - indi makapasiensiya, kadali madulaan sing paglaum, indi makapaumod.  Sa amo man sini nga panimuot - sa tunga sang iya kainit nga wala gid sia may nakonbertir bisan isa naglakat sia, nagdagundagun puli. 

Apang sa wala niya ginapaabot nagpasilabot naman sa iya kabuhi ang isa pa gid niya ka Iloy.  Nagpakita sa iya ang Birhen Maria nga sa sadto nga tion buhi pa kag didto naga-istar sa Efeso upod sa iya utod nga si Juan.  Ini nga Iloy may lain iya nga mensahe sang sa una niya nga iloy, may duha sia ka mga pangabay.  Una luyag niya nga magpabilin si Santiago, antuson anay ang mga pagyaguta kag pagpatumbaya sang tawo, gamay na lang nga pasiensiya, gamay nga pagpaubos sa pagbaton sang iya una nga kapierdihan kay sa dili madugay, sa padayon nga pagtinguha, sila magapamati sa iya. Kag ikaduha nangabay ang iya Iloy, ang Birhen Maria nga angatindog sa ibabaw sang poste, nga pagkatapos niya sa Zaragosa magabalik sia sa gilayon sa Jerusalem sa paghakus sang iya ulihi nga pag-antus sa diin pagapatyon sia sa espada. 

Lain sang sa una nga iloy.  Ining iloy wala nangayo sang puesto para kay Santiago.  Sa baylo nangayo sia sa pagbatas sang tuman nga kabudlay lakip diri ang makangilidlis nga pag-antus kag kamatayon.  Sa pagpalip-ot sang malawig nga istorya, ginhimo ni Santiago ining duha ka mga pangabay – nagpabilin sia sa Zaragosa bisan sa tunga sang kabudlay sa pagkonbertir sang mga tawo kag sa pagtukod sang una nga simbahan sang Espana, kag ugaling bumalik sia sa Jerusalem sa diin sia ginpatay ni Haring Herodes Agripa.  Amo ini ang istorya sang duha ka iloy.

Karon ang aton parokya nagatukod sang duha ka simbahan - ang simbahan nga nahimo sa bato, kag ang simbahan nga napasakupan sang mga pumuluyo sining parokya.  Katulad ni Santiago nagapangatubang kamo sang madamo nga mga kabudlayan kag siguro mga sablag.  Siguro, sa una ninyo nga simbahan nga ginatukod, ang simbahan nga bato, nabudlayan na kamo magpaamot, nabudlayan kamo magdesisyon sang  desinyo, nagabinaisay kamo kon ano ang maayo, nakapoy na kamo, wala man sa gihapon nahuman. 

Siguro, sa ikaduha kag labing importante ninyo nga simbahan nga ginatukod, ang simbahan nga amo ang katawohan sang Dios, nakasumalang kamo sang madamo nga mga sablag kag pagtilaw sang inyo pagtinguha - damo ang nagapabaya, damo ang wala sing pagsapak, damo nga wala nagapasilabot.  Siguro iban sa inyo natak-an na, nabudlayan, kag luyag na nga mag-untat.  Dugay na nga BEC wala man gihapon kahumanan.  Dugay na pagtinguha amo man sa gihapon ang aton nadangtan. 

Pero luyag ko itugyan man sa inyo ang duha ka iloy, mga iloy ni Santiago kag ni Juan. 

Ang una nga iloy, ang stage mother, nagasiling, padag-a sila pero indi sila pagpabaka-bakaha; papuestoha sila pero idahu lang sa ila; papungkoa sila sa sulod sang matahum nga simbahan nga wala nila ginpangabudlayan;  himoa sila nga BEC pero easy-easy lang; paakiga sila kon wala may nagasabat sa ila pangagda - kon mangadi sila sa Dios, paulani kalayo ining mga tawo nga wala nagapasilabot kag walay pagsapak, kabay pa magtuod - maayo na kay magtarong sila; kon natak-an na sila papuli-a sila nga nagasiling, bahala sila da, natak-an na ako.  Kon awayon ka nila indi ka magpasupil kay mas importante ka, mas bida ka sang sa ila.

Apang ang ikaduha nga iloy may iya man nga panug-an sa inyo - mangin madinalag-on ka kon magpabilin ka nga mapag-on sa imo tuyo; bisan mabug-at, kargaha, kay sa katapusan may katuman gid ang inyo handum; kon ginalibak ka na nila kag ang panan-aw nila sa imo daw sobre, sige lang, batasa, mayo-mayo na lang na nga sobre ka lang sang sa tawgon ka nila nga daw kahon sang kolekta;  magpamati kamo sa isa kag isa bisan kon kaisa natak-an na kamo sing liwat-liwat, liwat-liwat, sulit-sulit; magtuon kamo sa pagbaton sing kapaltahan - magpaubos bisan kon kaisa kabudlay tunlon sang ila ginahambal kag ginahimo; padayuna bisan kadamo sang mga upang; maglaum bisan kon kaisa puno na kamo sing kataka; indi maghagi sunggod kay tigulang ka na; handa-a ang imo kaugalingon sa pagbaton sang mga kasakit sa inyo mga pagpaninguha para kay Kristo.  Indi magdula sing pagsalig sa Dios kay sia gid lang ang makahatag sing katumanan sa mga kaayuhan nga aton ginsugdan.

May duha kamo ka iloy.  Sin-o ang inyo pamati-an?  Depende sa inyo.