mga pari nag-krismas sa binggawan 2013

Ining amon pagkadto diri, bisan sa malip-ot lang gid nga tini-on nga makapangamuyo kami upod sa inyo kag makapaniaga upod sa inyo, bunga ini sang inspirasyon nga ayhan gintuga sang aton Santo Papa Francisco.  Sang sia naghiwat sang pagsaulog sang katapusan nga panihapon sadtong nagligad nga Huwebes Santo, nakibot ang tanan sa iya desisyon nga hiwaton ini sa isa ka prisohan.  Kon si Fr. Doming Alimajen ang magahiwat sini sa prisohan daw wala man ina siguro sing may makanotisya total chaplain gid man sia sa prisohan.  Pero Santo Papa ni ya nga ang tanan niya nga hulag ginabantayan sang tanan.  Wala sia sa iya basilica, sa baylo didto sia sa prisohan.  Wala sia sa iya cathedral, sa baylo didto sia sa gym.  Wala man tani ini sa akon igtalupangod tubtob nga nabasahan ko ang isa ka bahin sang iya sinulatan sang Obispo pa sia didto sa Argentina.  Kon iparaphrase ko ang iya sinulat, nagsiling sia.  “Wala man ina tani kaso nga kon magbulig ka sa nagakinahanglan ihatag mo ang bulig mo paagi kay Msgr. Oso sa Jasac ukon kay Fr. Robert sa JAPS ukon paagi sa inyo parish priest.  Maayo gani na tungod kay organized sila kag makasigurado ka nga ang imo bulig matupa gid sa iya sakto nga tuyo.  Pero wala ina nagakahulugan nga sa imo pagbulig indi ka na lang magpakigkita kag magmangin personal sa imo ginabuligan.  Indi ina rason nga indi ka na lang mag-atubang sa mga nahalitan nga ginabuligan mo nga makabangon liwat.  Indi ka lang magpabilin nga nagasiling, madamo ang nabuligan ko didto sa Binggawan, sa baylo tinguhaa nga makasiling ka, ang atop ni Nong Baldo ginpalid kag nagbulig ako sa gamay ko nga masarangan agod maatupan liwat ang iya panimalay.  Ang banggirahan ni Lilia nawasdak kag gindal-an namon sia sang mga pinggan, kaldero, kutsara, tinidor, husto lang agod makasugod sila liwat. Kag kita ko gid ang mga yuhum sang kabataan sang ginhatagan namon sila sing dulsi kag mga hampanganan. The commitment to the poor should be person to person and in the flesh.”

Pero ang labing daku nga natalupangdan ko amo ang iya ginsiling nahanungod sa prisohan.  Nabudlayan gid sia magbisita sa prisohan ilabi na gid kay makita niya didto ang kabudlay kag ang kapintas sang kabuhi.  Apang, siling niya ang Dios luyag nga didto gid ako upod sa mga nagakinahanglan, upod sa mga nawad-an, kag upod sa mga naga-kasakit. Mabudlay pero luyag sang Dios.  Ang paghiwat sang Huwebes santo didto sa prisohan, sa adlaw kon sa diin ang Ginoo naghatag sang bag-o nga sugo sa paghigugma indi lamang isa ka ritwal nga ginhimo sang isa ka Santo Papa kundi isa ka pagpaninguha sang isa ka kristiano nga maghigugma sa nabudlayan niya higugmaon.

Indi bala nga ang kaalam sang mga santos nagatudlo sa aton nga pili-on naton ang mga mabudlay, ang mga mabug-at kay dira kita magatubo?

Kahapon nagsugilanon kami sang inyo parish priest kag ginsugiran niya ako sang inyo malawig nga pag-binaisay kon bala tugutan ninyo pakadto-on pa ang Obispo diri sa barangay ukon didto na lang sa katawhay sang poblacion kag konbento.  Bisan matuod wala ang Obispo subong human na yadto sa iya pensar nga magakadto sia diri sa barangay kag magatener diri upod sa inyo sa sini nga adlaw.

Ang akon pangagda sa mga pumuluyo amo nga indi kamo tani magmangin-upang sa amon misyon nga mapakita, mapabatyag si Kristo, mapatawo si Kristo sa inyo tunga indi lamang paagi sa mga mga sakramento nga amon ginasaulog kag ginahatag, pero ilabi na gid paagi sa amon presensya, ang personal nga presensya sang mga pari kag obispo.

Sang Sabado ginlunsar naton bilang arkidiosesis ang Tuig sang mga laiko.  May mga lingganay kita nga ginpatikpatik, may mga ambahanon kita nga ginkanta.  Apang kon wala sa tuyo, handum kag kabubut-on sang kaparian nga mangin yara kon sa diin man kamo nahamtang, yadtong paglunsar sang Sabado isa gid lang ka magahod kag kalong nga tunog nga wala gid man sing kabilinggan.  Kabudlay ipahayag sang absentee nga pari nga ang Ginoo Emmanuel, nga ang Ginoo kaupod naton.

Mga utod, may dala kami nga sin nga sarang ninyo maatop, nagdala man kami kagamitan sa kusina nga sarang ninyo malutu-an kag makan-an, nagdala kami mga hampanganan nga sarang mahampangan sang inyo mga kabataan.  Dala namon ini kag posible nga sarang ini makapahalipay sa inyo.  Apang nagkari kami diri sing personal agod nga ang amon presensya kag indi ang amon pagkabutang kag amot, ang magapaalinton sa inyo sang kalipay sang ebanghelyo kag sang paglaum nga makahatag sing kusog sa pagpadayon.  Sa misa, ang pari lang gid ang makasiling, “ang Ginoo yara sa inyo,” kag sa pari gid lang kamo makasabat, “kag yara man sa imo.”  Dira lang sa aton pagsumalangay, dira lang sa aton pag-atubangay kag pagtingob, bilang pari kag laiko nga ang Dios mangin Emmanuel, ang mangin Dios kaupod naton.  Kabay pa nga indi kami mawad-an sing matinuohon nga mga laiko, kag kabay pa nga indi kamo makulangan sang matutom kag mapisan nga mga pari.  Amen.