piesta sa maasin 2013

Siguro tungod sang kadamo na gid man nga piesta ang nag-agi, magluwas pa nga sa sini nga banwa, sa isa ka tuig, duha ka beses naton ginaselebrar ang piesta ni Santiago Mayor, nasugid na gid man siguro ang tanan nga sarang mahibaluan sa kabuhi sang aton Mahal nga Patron.  Dugang pa diri ang realidad nga diutay man lang gid ang nahibaluan naton sing pat-ud nahanungod sa kabuhi ni Santiago.  Nag-abot na gid man siguro sa punto nga ang mga sermon sa misa sang piesta daw pulopareho na man lang, kag kon may kinalain man, indi na gid man sa kaundan sini, kundi sa istilo na lang.

Gani sa sining sermon luyag ko lang tipunon ang mga nagakalain-lain nga mga dinalan sa Biblia nahanungod kay Santiago Mayor kag nian pamalandongan kag tun-an, agod may makuha kita nga mga leksiyon nga sarang naton ma-usar sa aton kabuhi kag sa aton relasyon sa Dios.

Si Santiago upod sa iya utod nga si Juan gintawag ni Jesus nga magsunod sa iya samtang nagapanghimos sila sang sahid sa kilid sang linaw upod sa mga tinawo sang iya amay nga si Zebedeo.  Ginsaysay sang ebanghelyo nga sang pagtawag ni Jesus sa mag-utod ginbayaan nila sa gilayon ang ila amay kag nag-upod kay Jesus.  Kon kaisa nagakalipat kita nga ang promptness isa ka birtud.  Ang kaabtik kag ang pagsabat sa gilayon sa kinahanglanon kag sa panawagan sang panahon isa ka pamatasan nga indi naton ikalimtan.  Gani ang kalaminday, ang bwas lang, ang karon lang, sa dason lang, mag-retire lang ako, indi lingwahe sang mga naga-alagad sa Dios.  May hurobaton kita nga nagasiling justice delayed is justice denied; ukon he gives twice who gives quickly.  Maayo gid nga ma-remind kita liwat sang kaabtik ni Santiago kag sang iya utod nga si Juan sa pagsabat sa Ginoo.

Si Santiago kag si Juan gintawag nga Boanerges ukon mga anak sang daguob.  Natabo ini tungod kay isa ka bes sang naglabay si Jesus kag ang iya mga gintuton-an sa isa ka samariahanon nga banwa, wala sila gin-amuma sa ila pag-abot.  Nagapaabot sila kuntani nga amumahon. Nagapaabot sila tani nga i-welcome kag batunon sing may kalipay.  Wala ini natabo.  Sa kainit sang ulo ni Santiago kag ni Juan ginpangabay nila kay Jesus nga paulanon kalayo sa sadto nga lugar.  Ginsaway sila ni Jesus.  Ngaa amumahon gid?  Ngaa abi-abihon gid?  Kon kaisa sa aton mga parokya kag mga kabarangayan nagakadula na ang aton missionary spirit nga bisan indi kita pag-amumahon sa sina nga lugar, nga bisan kulang ang ila pag-abi-abi sa aton, makapabenturar kita sa gihapon sa aton pagdala kag pagpakilala kay Kristo. Kon kaisa nagakadula na ang handom nga mag-reach-out sa mga malayo kag nagapalayo sa simbahan.  Isa ini ka pamatasan nga kulang kay Santiago sang didto sia sa Espana sa bagay nga ginkadto-an gid sia sang aton Mahal nga Iloy agod matudlu-an sia nga magbatas kag magpadayon sa tunga sang madamo nga mga discouragements sa iya misyon.  Ang mahal nga Iloy nagpakita sa iya sa Zaragosa – Nstra. Senora del Pilar, to help him recover the missionary spirit, the audacious and enterprising spirit.

Makatuon man kita sa ebanghelyo nga bag-o lang ginbasa sa pagpangamuyo tungod kay ini nagasaysay sa aton kon paano ginapamati-an ni Jesus ang aton pangamuyo kag pangabay.  Una, bisan ano pa kon kaisa ka buang sang aton ginapangayo kag ginapangabay nga himuon ni Jesus sa aton, si Jesus gali nagapamati sa gihapon.  Katulad sang ginpangayo sang Iloy ni Santiago kag ni Juan, bisan matuod kahuluya, still Jesus shows interest.  This is a great consolation.  Kon panumdumon ko lang ang mga ginpangamuyo ko sang bata-bata pa ako sang una, sus kahuluya, pero diri ginapabalo sa aton nga bisan amo sini ginseryoso kita sa gihapon ni Jesus.

Ikaduha, sa aton pagpangayo kay Jesus daw ginasiguro niya kon bala buot kita nga magsakripisyo, buot kita nga maghimakas agod maangkon ang aton ginapangayo sa iya.  Makainom bala kamo sa kopa nga akon paga-imnan?

Kag ikatlo mahatag lamang ni Jesus ang aton ginapangayo kon ini nagasantu sa tinutuyo sang Dios para sa aton.  Nagasantu bala ini sa kabubut-on sang Dios para sa akon?  Sa aton pangamuyo maayo gid nga may kasubong kita sini nga panimuot.

Kag sa katapusan si Santiago Mayor suno sa Binuhatan sang mga Apostoles ginpapatay ni Haring Herodes Agripa paagi sa espada. Una sia sa mga apostoles nga naghalad sang iya kabuhi para kay Kristo.  Una sia nga nag-inom sang kopa nga gin-imnan sang Ginoo.  Ang pagbalita sini sa Binuhatan sang mga Apostoles tam-an ka lip-ot – pinatay sia sa espada, period.  Siling sang anay Santo Papa nga si Benedicto daw ka matter of fact lang sang pagbalita – pinatay sia period.  Daw ka normal lang nga hitabo.  Wala na damo pa nga pasikot-sikot – saksak, patay period.  Siling sang Santo Papa daw ka normal lang sang pagbalita sini, daw sa waay lang ang pagbalita sini tungod kay bal-an sang tanan nga amo gid man sina ang maabtan sang isa ka kristiano.  Sacrifice is the norm for a Christian.  Suffering is the normal occurrence.  Kon maba-is ka, daw sabton ka bala nga, ngaa ano ang ginapaabot mo haw?

Pamalandongan naton ini. 

Kag kabay nga makatuon kita sa  kabuhi kag kamatayon ni Santiago Mayor.