inaswang sa krismas - aguinaldo

Karon nga aga sa ano man nga dimalas ang gin-assign sa akon nga pamalandongan amo ang sementeryo, ang patyo.  Naglibog ang ulo ko kon paano ko maangot sa sining ikapito nga adlaw sang aton misa aguinaldo ang patyo.  Siling ko basi puede ko sia maangot sa natabo kahapon, ukon to be more exact, puede ko sia maangot sa wala natabo kahapon nga end of the world.  Kay sa pagkamatuod kon natabo ang natabo kahapon, wala na kinahanglan kuntani ang patyo, kay sin-o pa abi ang malubong sa aton?  Pero tungod kay ari pa kita tanan subong nga aga, pues kinahanglan ta gid hambalan nahanungod sa patyo, indi bala? 

Ang patyo para sa aton nga mga katoliko indi lamang isa ka praktical nga instrumento kon sa diin ginalubong ang aton mga minatay.  Indi lang ini kabahin sang isa ka hygienic nga buluhaton agod ang tanan nga mga minatay matingob sa isa lang ka lugar.  Sa baylo ang patyo bahin sang aton pagtuo.  Ang patyo isa ka importante nga konsekwensiya sang aton pagtuo.  Kag ano ini nga pagtuluohan?  Nagatuo kita nga ang Dios magatuman sang tanan niya nga ginsaad sa aton.  God will fulfil his promises.  God has begun making good his promises.  Pero indi pa ini kompleto.  Ginapaabot pa naton ang kapupun-an sang tanan, ginapaabot pa naton ang katumanan sang tanan.  Amo ina kon ngaa ang kristianong katilingban may kristiano nga lulubngan, may patyo, kay sa pagkamatuod ang sementeryo nagakahulugan nga isa ka hululatan.  Nagahulat sang ano?  Nagahulat sang kapupun-an sang tanan. 

Maistorya kita anay inaswang?  Total wala pa ang Krismas, mahaloween kita anay. 

Ang aton pagtuo nagasiling nga kon mapatay ang isa ka tawo either makadto sia sa impierno ukon sa langit ukon mahapit anay sa purgatoryo antes sia magpalangit.  Amo lang ina, wala na.  Kon mapatay kita indi puede ka lagaw-lagaw ang kalag.  Siling sang isa ka bantog nga exorcist diri sa Pilipinas nga si Fr.  Jose Francisco Syquia, kon nagapabatyag gid man ang kalag sa imo, indi ina tungod kay may mga unfinished business sia.  Ginatugutan sila nga mamugno agod makapangayo sila sang pangamuyo.  Pero other than that, indi puede.  Ang nagalagaw-lagaw kuno, siling ni Fr. Syquia, amo na sila ang mga galamay sang yawa, indi na sila kalag, mga yawa na sila nga nagapanggamo sang aton kabuhi.

Anyway kon madumduman ninyo sang una sang bata pa ang iban sa aton, kon magsakit gani aton ulo, ukon matrangkaso, ano ang ginahimo?  Mapatawag sang manugluy-a.  Ay ambot kon ngaa.  Sang una si nanay kag si tatay nagapanag-iya sang pito ka botika, pito ka bilog nga botika, pero kon magmasakit kami ang ginapatawag manugluy-a.  Tapos makadto na si Lola Bebang, amo na sia ang bantog nga manugluy-a sa San Nicolas, Oton sang una.  Mapukpok na sia luy-a , dayon ipaligid-ligidon niya sa iya palad, tapos kum-on niya, ibutang sa ulo, sa alimpuros, kag huypon, huypon nga daw nagahuyup sang balloon.  Sa iya paghuyup, nagalantaw kami sina tanan, kay ang ginabantayan namon kon manguy-ab.  Kon manguy-ab sia, matulukoy kami sina kag magsiling, ginbugno.  Ginbugno sia ni anhing Andong, ginbugno sia ni anhing Paway.  Kon ginbug-no pues mangamuyo isa ka amay namon, isa maghimaya ka Maria, isa ka gloria patri para sa kalag.    Ngaa mamugno, ngaa mangamuyo sa aton minatay, ngaa may sementeryo ukon patyo, ngaa ginabalik-balikan ta ang patyo, ngaa gina-amligan ta ang patyo - why - because we believe that God will still fulfil his promises to us.  Ang Dios magahatag pa sang bug-os nga katumanan sa tanan niya nga mga saad sa aton.  We are holders of the promises of God.

Amo ini ang reminder sa aton ni Maria sa iya ambahanon.  Ang akon tagipusoon nagadayaw sa Ginoo.  Nagakaluoy sia sa tanan nga nagakahadlok sa iya, sa mga kaliwatan kag mga kaliwatan.  Gintuman niya ang iya saad sa aton mga katigulangan, kag wala sia magkalipat sa pagkaluoy sa kay Abraham kag sa tanan niya nga mga kaliwat sa walay katubtoban!"

God had made promises, God never forgets his promises, God has begun fulfilling his promises, generation after generation after generation until the day when God will fulfil all his promises.  This is what Christmas is all about - gintuman sang Dios ang iya promisa, gintuman niya ang iya saad nga magpadala sia sang mesias, sang manluluwas.  Gintuman niya ini paagi kay Birhen Maria.  Gintuman niya ini una didto sa Belen. Gintuman na pero wala pa nahuman

Gani, ano ang kaangtanan sang patyo sa misa de aguinaldo, sa Christmas.  Yara na, pero wala pa. Ang promisa, ang saad sang Ginoo gintuman na, yara na, pero indi pa kompleto, indi pa katumanan sang tanan, wala pa. Yara na pero wala pa.

Subong nga tuig pagkatapos nga nakapahuwayhuway kita gamay sa pakay-o sang simbahan, ginpakay-o naman naton ang patyo.  Hasta subong ginakaayo pa ina.  May suga na, gina-amat-amat kaayo ang mga alagyan, may canal na agod indi pagteneran sang tubig.  Subong nga tuig sugdan na ang bag-o nga patakaran nga ang mga minatay sa nicho dapat masaylo sa bone boxes pito ka tuig tapos ang lubong agod maggamit man sang iban ang mga nicho, otherwise kita nga mga buhi pa subong wala na sing nicho nga ocuparon.  Bisitahi ninyo karon ang patyo kay human na ang mga bone boxes kag ginhimo gid ini nga maayo agod kuntani voluntaryo nga saylohon ninyo ang inyo mga minatay halin sa mga nicho, para maggamit man ang nicho nga ginhalinan sang iban. 

Dayon bulig man kamo mentenar sang aton nga patyo kay sa nasiling ko this place is a reminder that God will still fulfil his promises to each one of us.  Paandam:  kon indi ninyo pag-amligan ang aton patyo, may mamogno gid sa inyo.  Ipangamuyo lang nga wala lang sing may manguhit.