Nakatilaw na bala kamo nga ginpukaw
kamo sang mga kalag? Nga samtang
mahamuok ang imo katulugon gulpi lang nga daw may nag-uyog sang imo katri, indi
gani may nanguhit sang imo dapa-dapa?
Gusto nyo bala ini matilawan?
Sang nagsulod ako sa seminario mga 30
anyos na ang nagligad, gintudluan kami nga mga palatulog nga indi makabati sang
bagting sang lingganay kada aga, nga magpangamuyo sa mga kalag sa purgatoryo
kada gab-i antes magtulog kag singganon namon ang mga kalag nga pukawon kami sa
sini nga oras. Primero duda man
kami. Pero sang ginhimo ko ini nga advice
sang pari nga nagabantay sa amon, nadula ang akon mga pagpangduha-duha. Sobra pa sa alarm clock. Sobra pa sa relo. Very accurate. Sugod sadto wala na ako naburaw ukon na-late
magbugtaw. Testingi ninyo. Siguradoha lang nga pagbugtaw mo, pagmuklat
sang imo mata, nakahalin na kon sin-o man ang nagpukaw sa imo, kay basi
mabugtawan mo nga ara pa sia nga nagayuhum-yuhum sa imo. Ina ya bisan indi ka na mangapi, tabog gid
sigurado ang imo katuyuhon.
Ginsugid ko ini sa inyo kay amo ini
ang luyag ko pamanlandongan sa kabuhi sang aton mahal nga patron. Si San Nicholas ginhingalanan ni Papa Leo
Trese nga patron sang mga kalag sa purgatoryo, patron sang purgatoryo. Kita ninyo, ang patron sang aton barangay kag
ang patron sang purgatoryo pareho. Amo
ina siguro kon kaisa nga nagasiling kamo, hay ano man ini nga balay man daw
purgatoryo, ukon, hay ano man ini nga chapel man, sa kainit, daw
purgatoryo. Pareho gali aton patron.
Ngaa kasubong sini, nga ang aton
patron, patron man sang purgatoryo?
Naggikan ini sa kabuhi sang aton
mahal nga patron. Isa ka bes tungod
siguro sa sobra niya nga pagpuasa nakakita ni San Nicholas sang isa ka
palanan-awon ukon isa ka vision kon sa diin ang isa sa kilala gid niya nga monghe
nga si Brother Pellegrino naga-antus sing tuman tungod sang madamo nga mga
kasakit sa purgatoryo. Ang iya dagway
puno sang mga kasakit, ang iya bayu gisi, kag nagpangabay sia kay San Nicholas
nga pangamuyuan niya si Pelligrino kag ang iban pa nga mga kalag sa purgatoryo
agod nga mapa-untat ang ila mga kasakit kag mapadali ang ila pagsulod sa
langit.
Gani, amo ini ang ginbuhat ni San
Nicolas. Sa sulod sang pito ka adlaw sia
nangamuyo, nagpuasa kag naghalad sang santos nga misa para sa mga kalag ilabi
na gid para sa iya abyan nga si Brother Pelligrino. Ginbuhat niya ini sa sulod sang pito ka
adlaw. Pagkatapos sang pito ka adlaw
nagpakita liwat si Brother Pelligrino pero karon napabayuan na sia sing tuman
ka puti nga panapton kag manayanaya na ang iya nawong. Nagsiling sia nga nagapamilinbilin kay San
Nicholas nga padulong na sia sa langit upod sa madamo nga mga kalag kay natapos
na ang iya purgatoryo. Nagyuhum sia kay
San Nicolas, nagpasalamat sing tuman kag naglakat pasulod sa langit.
Tungod sini nga palanan-awon nagtubo
kay San Nicolas ang labing daku nga paghigugma kag debosyon para sa mga kalag
sa purgatoryo. Kada gab-i wala gid sia
nagakalipat sa pagdumdum sa ila, ginahalad niya ang iya pagpuasa para sa ila,
kag sa iya pagsaulog sang santos nga misa ginahimo niya ini nga may labing daku
nga debosyon kag iya gid ginahinambit ang intensyon para sa sini nga mga kalag.
Ano ang mensahe sini sa aton? Duha ka butang.
Una, may purgatoryo. Isa ini sa mga butang sa aton pagtuluohan nga
nagahatag sa akon sing daku nga paglaum kag kalipay. Ngaa.
Ti bal-an nyo naman siguro nga indi gid man ako nami-nami na gid nga
tawo sa bagay nga mapatay ako deretso ako sa langit. Pero ti indi gid man ako siguro malain na gid
kaayo nga tawo nga maderetso gid ako sa impierno. Ambot.
Pero salamat kay sa daku nga kaluoy sang Dios ginhatagan pa niya kita
sing purgatoryo agod to nga kon indi gid man kita masyado gid kaayo kag ka
debotado katulad ni San Nicolas nga kaapat gid ka beses magpuasa kada semana,
at least may tsansa pa ako nga nabilin nga makapalangit. May kahigayunan pa nga nabilin agod nga
matinlo-an ako sang Dios ang akon kalag para nga, bisan amo lang ako sini,
pirme lang tinguha nga tinguha nga mangin maayo, bisan amo lang ako sini, may
tsansa pa nga nabilin agod nga makapalangit ako. Sin-o gid abi sa aton ang takus nga
makapalangit kay putli gid sia, wala gid sia sing dagta, abi bayaw kamot. Bisan gani si San Nicolas nadulaan sang
paglaum nga indi na sia makapalangit. Maayo
lang kay nagpakita sa iya ang mahal nga Birhen kag nagpasalig sa iya sa
pagsiling “yara ka na sa tagipusuon ni Jesus, indi ka magdula sing
paglaum.”
Pero para iya sa aton, salamat sa
Dios kay may purgatoryo. Gani kon kaisa
nagapangamuyo man ko sa Dios, Lord, bisan kabit-kabit lang ako, bisan
mapapurgatoryo pa ako sa sulod sang isa ka gatos ka tuig, basta sa ulihi
pasudla man ako sa langit, bisan sa banggirahan lang sang langit, puede na.
Sigurado ko halos tanan sa aton
nagatinguha nga mangin but-anan, nga mangin kristiano sa aton pagginawi, pero
kon kaisa tungod sang aton kadungol, katig-a sang ulo kag kahuyang, makasala
gid kita sing gamay-gamay nga sala. Pero
indi kita magdula sing paglaum. Padayon
kita nga magatinguha nga mangin maayo kag balaan bisan pa kita kon kaisa
nagakatipalo, nagakatabingas, nagakadasma, nagakasandad. Salamat sa Dios kay may purgatoryo.
Tungod sini nga kamatuoran makadto
kita sa ikaduha nga punto. Kinahanglan
naton nga mga buhi pa diri sa duta sa pagdumdum sa mga nag-uluna na sa aton sa
kamatayon. Isa ini ka kamatuoran nga
ginatudlo sa aton ni San Nicolas, ang pagtuo sang simbahan sa katilingban sang
mga santos, nga bisan nag-uluna na sila sa kamatayon padayon kita nga magabuligay
agod madab-ot naton ang aton matuod nga puloy-an sa langit. Kita nga yari pa sa duta nagabulig sa mga
yara sa purgatoryo. Sila nga yara na sa
langit nagabulig sa aton nga yari pa sa duta.
Sang si San Nicolas yari pa sa duta
ginkabig niya nga isa niya ka misyon ang pagbulig sa mga kalag nga yara pa sa
purgatoryo. Nangin bantog sia sa sini
nga debosyon sa bagay nga ang mga tawo sa Tolentino nagakadto sa iya sa
pagpangayo sing bulig agod madumdum ang ila mga minatay. Si San Nicolas naghalad sing santos nga misa
para sa mga minatay, nagpangamuyo para sa ila, nagpuasa para sa ila, nagapulaw
sa pagpangamuyo para sa ila.
Kon kaisa nagakalipat na kita sang
sini nga obligasyon naton, sang kabalaslan naton para sa aton mga minatay. Isa siguro nga panghangkat sa aton, diri sa
aton barangay sa pag-ilog sang halimbawa sang aton mahal nga patron, amo nga
makuha naton kuntani ang mga sugal sa tion sang haya sang aton mga minatay. Ginahaya naton ang aton minatay agod aton sila
mapangadian, mapabalunan sang aton mga pangamuyo. Nagapulaw kita indi tungod kay basi kawaton
ang bangkay sang aton minatay, kundi nagapulaw kita kay nagapati kita nga ang
pangamuyo nga gina-updan sang sakripisyo sang pagpulaw mas makagagahom nga
pangamuyo. Kon mapulaw ka man lang kag
indi mangamuyo, ano ang pulos sina?
Ano abi kon dula-on na lang naton
sugal. Basi puede man kita kapulaw, nga
wala sugal. Magapulaw kita sa
pagpangamuyo. Siguro may hampang nga
gamay pero wala sing pustahanay kwarta.
Basi puede ta mabalik ang masadya nga mga luha, tugon ni sinta patay buhi
batuna.
Sa tuod-tuod lang daw nasaw-ahan ko
ya nga nahamyang ako dira tapos ginasugalan ang akon bangkay - patay ka na,
disoriented pa ang imo kalag tapos ang mabati-an kag makita mo ukay sang
bagongon, tumbo, kag pusoy dos. Basi
puede na kita makapamilinbilin na nga daan, nga kon mag-abot na ang tion nga
suno sa pagbuot sang Dios bawi-on na gid man niya kita, singganon ta na nga
daan ang aton kabataan kag kaapohan nga pangamuyu-an gid nila kita ang aton
kalag kag indi magpasugal. Singgana sila
nga kon magpasugal sila padamagon mo sila, kag balik-balikan mo sila sa bagay
nga ang ila joker eye insinggit nila nga pong.
Ibalik ta ang pangamuyo sa aton mga
haya - ang pagpangadi sing tingob sang kasakit ni Jesus, ang pagpangadi sang
santo rosaryo sa nagakalain-lain nga takna sang adlaw kag gab-i kag indi lang pag-isalig kay Nanay Miling. Dumdumon naton sila sa ila anibersaryo, sa
piesta minatay, sa aton kapiestahan, sa aton mga birthday, kag bisan pa gani sa
matag-adlaw nga tanan. Amo ini ang
gintudlo sang aton mahal nga patron, kag bantog sia sa sini nga debosyon. Amo gani nga gintawag sia nga patron sang mga
kalag sa purgatoryo - patron sang purgatoryo.
Sa katapusan daw kasaw-a tuod nga sa
adlaw sang aton piesta naga-sermon ako sang mga patay, haya, bilasyon kag kalag. Ti anhon ko abi kay sia ang aton patron kag
indi man ako ang nagpili sa iya, kay ang napili-an amo man ang patron sang
purgatoryo. Gani sa sining misa sang
aton piesta dumdomon naton ang aton mga minatay, (daw sang san-o lang nga upod
pa naton si Tay Emon, si ____ ) - ipasakop man naton ang aton mga katigulangan
nga nag-uluna na sa aton, ayhan ang iban sa ila ara pa sa purgatoryo, kag
i-ampo naton sila paagi sa pagbulig sang aton mahal nga patron, si San Nicolas
de Tolentino sa sining iya piesta. Kabay
pa nga padayon kita nga magpakig-angot sa ila, bisan wala na sila sa aton
panulukon paagi sa aton mga pagdumdum kag pagpangamuyo, kay nagatuo kita sa
katilingban sang mga santos, nga ang nag-uluna na sa aton bahin pa sa gihapon
sang aton panimalay kag katilingban sang aton pagtuo. Kabay nga si San Nicolas padayon nga
magpangamuyo sa aton nga mga buhi kag sa aton mga minatay.
PS.
Piesta subong pero hagan-haganon ang kaon, hagan-haganon ilabi na gid
ang inom kag wala away sa baylihan. Indi
kita luyag nga sa subong nga adlaw may maga-una na sa aton didto sa purgatorio.
No comments:
Post a Comment