20th Sun B 2

May isa anay ka babayi nga ginpamangkot, “Manang ngaa waay ka sa simbahan, Domingo subong, ngaa waay ka nagsimba?”  Nagsabat ang babayi, “Puede man ako makapangamuyo diri ngaa makadto gid ako sa simbahan? 

Tuod no, puede man lang gali ako makapangamuyo bisan diin – indi bala ang Dios bisan diin man lang, ngaa makadto gid ako sa simbahan kada Domingo – ngaa didto gid ako mangamuyo? 

Ang sabat igsakto kag sala.  Igsakto tungod kay indi gid man kinahanglan nga diri gid kita sa simbahan mangamuyo, puede man kita makapangamuyo sa idalom sang saging, ukon sa banyo kon gusto ninyo.

Pero sala man ini nga sabat.  Ngaa?  Kay ang pangamuyo nga ginapangabay sa aton sang Dios sa adlaw nga Domingo indi lamang nga mangamuyo ako kundi mangamuyo kita sing tingob.  Indi kay magmasig-masig lang, kundi magatipon kag magpangamuyo sing tingob.Duha ka rason:  Una nagatipon kita sa pagpangamuyo sing tingob sa santos nga misa agod mabaton naton ang lawas ni Kristo.

Sa China sa diin ginadumili-an ang pagpractice sang religion may istorya sang isa ka intsik nga pari nga nagapuyo sa isa ka banwa nga nagpakunokuno nga isa ka trabahador.  Paagi sa mga ginkasugtan nga mga sinyal, ang mga katoliko sa sina nga lugar nakahibalo kon ano ang dapat nila buhaton kag kun diin sila makadto sa pagpakigkita sa sini nga pari.  Ang pari magaplastar sa isa ka balaligyaan sa tienda nga nagabaligya sang habon.  Paagi sa sekreto nga sinyal ang mga Katoliko magabakal sang habon kag tagaan sila sang pari sang duha ka bilog nga naputos sang papel.  Kag sa tunga sining duha ka habon makita ang nakonsagrahan nga ostias.  Dal-on nila ini sa ila balay, magatipon ang bilog nga panimalay sa lamisa, magapangamuyo sila sing tingob kag ginakalawat ini nga Ostyas. 

Matuod ini nga istorya kag diri makita naton ang daku nga paghangad sang mga Katoliko sang China nga masaulog ang Eukaristiya kag mabaton nila ang lawas ni Kristo.  Nakahibalo sila nga ining ila ginabuhat makatalagam para sa ila panimalay.  Apang padayon nila ini nga ginabuhat.

Sa kalabanan sa aton subong diri, daw indi na gid man kasubong sini ang aton nga paghangad sa Eukaristiya.  Kabug-at sang aton tiil basta ginahagad kita sa pagtingob sa kapilya.  Bal-an ko ang iban sa inyo nagapamangkot na – san-o pa ini matapos man, kadugay, kalawig sang sermon.  Apang kon may pagtuo lamang kita kuntani nga si Kristo matuod gid nga aton ginabaton sa Eukaristiya katulad sang ginasiling niya mismo sa Ebanghelyo, basi pa man lang nga maghangad man kita katulad sang paghangad sang mga katolika sa China sa pagbaton sang Eukaristiya.  Kontani may pagtuo lang kita nga ang aton ginakalawat amo gid ang lawas ni Kristo.

Ikaduha, nagatipon kita sa pagpangamuyo sing tingob sa santos nga misa agod nga mangin lawas kita ni Kristo.  Indi lamang sa pagbaton sang lawas ni Kristo kundi nga kita man mangin lawas ni Kristo.

May isa ka tribu didto sa Africa nga ang ila palangabuhian amo ang pagsagod sang baka.  Waay sila sing permanente nga lugar, ginatawag naton sila nga nomadic - kon sa aton pa may pamatasan nga ati: pirme lang nagahalin-halin. 

Tungod kay mga Kristiano sila ginasaulog man nila ang santos nga misa.  Kon diin sila nahamtang sa sina nga semana ginakadto-an sila sang pari.  Ang pari nagakuha sang berde nga hilamon kag ginabutang ini sa isa ka alat.  Ginapasa-pasa ini nga alat sa tagsa ka pamilya, kag hulaton ina sang pari sa sulod sang isa ka semana nga magbalik sa iya nga berde man sa gihapon.  Kon magbalik ini, sinyal ini nga maayo ang kahimtangan sang tanan kag puede sila makamisa.

 Apang kon ang isa ka panimalay may kaakig sa isa man ka panimalay, waay sila ginapasahan sang alat, kag gani naga-untat ang pagpasa-pasa sang alat.  Malaya ang hilamon kag ang alat indi na makabalik sa pari.  Gani, sinyal ini sa pari nga nagahulat, nga maghalin na lang sia sa sina nga lugar, kay indi sila puede makaselebrar sang misa.  Ngaa?  tungod kay may kaakig ang isa sa ila.  Indi hugpong ang bilog nga tribu, waay nahiusa ang tribu, waay sing paghidait, gani waay man sang misa.  Indi sila makatipon tungod kay indi sila mangin isa ka lawas ni Kristo, indi sila mahugpong kag matingob.

Nagatipon kita agod nga kita indi lamang makabaton sang lawas ni Kristo kundi subong man agod nga kita mangin lawas ni Kristo.  Apang paano ini kon waay kita nagahanpanay, kag wala sing tuyo nga mag-ayohay; paano ini kon padayon kita nga nagahupot sing aligot-got sa isa kag isa?

Balikan naton ang pamangkot sang babayi, ngaa magatipon gid kita sa pagpangamuyo – nagatipon kita agod mabaton naton ang ang lawas ni Kristo kag nagatipon kita agod nga kita mangin isa ka lawas ni Kristo.